|
 Redaksiyamızın
ən kiçik qonaqlarından birinin adı daxili dünyası kimi
böyükdür: Dəniz... Dənizin iri, qara gözlərinin bu
dünyada gördüyü gözəlliklər, möcüzələr artıq bizim də
nağılımıza çevrilib. Dəniz haqqında yazdıq, hekayəsini
oxutduq oxucularımıza. İndi Dənizdən daha bir yenilik
var. İlk kitabı işıq üzü görüb: "Bahar, Dəniz, bir də
bütün dünyamız".
İsmayılova Dəniz özünü belə təqdim edir:
"Mənim adım Dənizdir. 2004-cü il dekabrın 24-də Bakıda
anadan olmuşam. Eldar Məmmədov adına 189 nömrəli
məktəbdə 4-cü sinifdə oxuyuram. Dörd yaşımdan kitab
oxumağı öyrənmişəm və elə o vaxtdan da kitablar mənim ən
yaxın dostuma çevrilib. Əlimə düşən, başa düşəcəyim,
maraqlı bildiyim bütün kitabları oxuyuram. Təbiət,
insan, kainat haqqında lap çox şey bilmək istəyirəm.
Dünyanı gəzmək, ölkələr görmək, həm də ölkəmi bütün
dünyaya tanıtmaq istəyirəm. Həkim olmaq, görməyən
insanların gözünə işıq vermək istəyirəm. Atamın, anamın
ürəklərinin istədiyi kimi övlad olmaq istəyirəm. Bütün
uşaqlar kimi, arzularım o qədər çoxdur ki... Axı mən də
dünyamızda yaşayan milyon-milyon uşaqdan biriyəm.
Əlbəttə, bunlar hələ arzulardı və arzularımın gerçək
olması üçün bacardığım qədər çalışacağam. Sonrasını
həyat göstərər. Hələ ki mən də həyatı belə görürəm...".
Dəniz özü haqqında lazım olanları dedi.
Özü haqqında dedikləri həm də elə kitabı haqqında
deyəcəkləridir. "Mən hansı peşəni seçəcəm?" essesində
həkim olub, görməyən insanların gözünə işıq vermək
arzusunda olan balaca Dənizin nə böyük fəlsəfəsi var:
"Heç bir gözəlliyi olmayan insanın gözləri onun yeganə
gözəlliyi ola bilər". Əlbəttə, haqlıdır Dəniz. Bütün
gözəllikləri gözəl görən gözlər yaratmırmı? Dənizin iri,
qara, dərin gözləri deyilmi dünyanın gözəlliyini görüb
sözlərlə təxəyyülümüzə naxış salan?! "Təbiət qızı",
"Persefonanın oğurlanması", "Ən çox sevdiyim fəsil",
"Səfər", "Səni unutmaram" hekayələrində yaradılan
möcüzələr bu gözlərin məhsuludur. Dənizin ilk
yaradıcılıq qədəmlərinə uğurlar diləyirik.
Könül NƏHMƏTOVA,
"Azərbaycan müəllimi" |
