ARXİV

24 Yanvar 2015 - №03

Müəllimlər Prezidentin sərəncamını yüksək qiymətləndirirlər

Azərbaycan Respublikasının Prezidenti İlham Əliyev yanvarın 16-da "Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında" sərəncam imzalayıb. Sərəncamla  diaqnostik qiymətləndirmədən keçən müəllimlərin  dərs yükü norması 1,5 dəfə, aylıq vəzifə maaşları isə orta hesabla 2 dəfə artırılıb.

Müəllimlərin maddi şəraitinin yaxşılaşdırılması məqsədi ilə verilən bu qərarı dövlət başçımızın şərəfli peşə sahiblərinə, ziyalılara diqqətinin bariz nümunəsi hesab etmək olar. Bu addım onu göstərdi ki, dünyada baş verən proseslər nəticəsində yaranmış əlverişsiz şəraitdə belə ölkə Prezidenti sadə insanların rifahı haqqında düşünür. Müəllimə  böyük qayğı  ilə yanaşı  ölkədə insan kapitalının inkişafına yönəlmiş növbəti addım kimi də  mühüm dəyər  daşıyan bu sərəncamı müəllimlərimiz necə qiymətləndirirlər? Bu sualla paytaxtın məktəblərində işləyən bir neçə müəllimə müraciət etdik. Onların fikirlərini oxuculara təqdim edirik.

Bu addım müəllimləri daha həvəslə işləməyə sövq edəcək 

Lalə Alıyeva,
Bakı şəhəri 261 nömrəli məktəb-liseyin ibtidai sinif müəllimi 

Azərbaycan Respublikasının Prezidenti cənab İlham Əliyevin "Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında" imzaladığı sərəncam bütün müəllimlər kimi, məni də çox sevindirdi. Hamı bir-birini təbrik edir, sevinirdi. Bu addım nəinki müəllimlərin, həmçinin neçə-neçə ailələrin sevincinə səbəb oldu. Belə bir vaxtda, dünyada baş verən siyasi-iqtisadi çətinliklərə baxmayaraq, Prezidentimizin müəllimlərin rifahı haqqında düşünməsi bir daha onun xalqına diqqət və qayğısından xəbər verir. Bizə bu diqqət və qayğısına görə dövlətimizin başçısına minnətdarlığımı bildirirəm.

İnanıram ki, bu sərəncam müəllimləri öz çətin, məsuliyyətli və şərəfli işində daha həvəslə, əzmlə çalışmağa sövq edəcək və təhsilin keyfiyyətinin yüksəlməsinə birbaşa təsir edəcək. Bununla da Azərbaycan təhsili özünün yeni  inkişaf dövrünə qədəm qoyacaq.

Bu inam və etibarı öz işimizlə doğruldacağıq 

Mətanət Eminova,
Bakı şəhəri 26 nömrəli tam orta məktəbin Azərbaycan dili və ədəbiyyat müəllimi

Təhsil müəllim əqlinin gücü ilə cəmiyyətin inkişaf amilinə çevrilən bir prosesdir. Gənc nəsil məhz müəllim zəkasının nurundan, müəllim qəlbinin hərarətindən pay alaraq formalaşır. Bu baxımdan mən sinif otağına daxil olarkən üzərimə düşən məsuliyyətin önəmini hiss edirəm.  Bilirəm  ki, dərs dediyim şagirdlərin hər biri bu millətin gələcəyidir, sabahıdır. Cəmiyyətimizdə müəllim əməyinə verilən yüksək qiyməti, dövlətin təhsilə, müəllimlərə qayğısını son illər daha çox hiss edirik. Xüsusilə də "Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında" Azərbaycan Respublikası Prezidentinin 16 yanvar 2015-ci il  tarixli sərəncamını müəllimlərin əməyinə dövlət tərəfindən göstərilən diqqətin ən gözəl nümunəsi sayıram. Bu sərəncam dövlət başçımız cənab İlham Əliyevin daim sadə insanların rifahı haqqında düşündüyünü bir daha təsdiq edir. Müəllimlərin maddi vəziyyətinin yaxşılaşdırılması məqsədilə verilən bu qərar, əməyimizə göstərilən dövlət qayğısı deməyə əsas verir ki, Azərbaycan öz gələcəyini daha etibarlı və inamlı görmək əzmindədir. Bu inam və etibarı öz işimizlə doğrultmaq üçün daha məsuliyyətlə çalışacağıq. Belə bir humanist addıma görə Azərbaycan Respublikasının Prezidenti İlham Əliyev cənablarına dərin minnətdarlığımızı bildiririk.

Maaş artımı müəllimlərin sosial durumunu xeyli yaxşılaşdıraçaq 

Sevil Musayeva,
Bakı şəhəri 53 nömrəli tam orta məktəbin ingilis dili müəllimi

Müəllimin çətin, eyni zamanda şərəfli olan əməyi həmişə dövlətimiz tərəfindən yüksək  dəyərləndirilir, onların fəaliyyətini stimullaşdırmaq üçün mütəmadi tədbirlər həyata keçirilir. Təsadüfi deyildir ki, "Azərbaycan Respublikasında təhsilin inkişafı üzrə Dövlət Strategiyası"nda da bu məsələ strateji hədəflər sırasında qeyd olunmuş, bu istiqamətdə bir sıra tədbirlərin həyata keçirilməsi, o cümlədən səriştə və nəticə əsaslı diferensiallaşdırılmış əməkhaqqı sisteminin yaradılması nəzərdə tutulmuşdur. Ötən ilin yayından keçirilməsinə start verilmiş müəllimlərin bilik və səriştəsinin sınaq qiymətləndirilməsini bu yolda atılan ilk addım kimi dəyərləndirmək olar. Həmin qiymətləndirmə zamanı mən də yüksək nəticə göstərmişdim və əməkhaqqımın artacağını gözləyirdim.

 Möhtərəm Prezidentimizin bu günlərdə imzaladığı sərəncamla bilik və bacarıqlarının diaqnostik qiymətləndirilməsi aparılan müəllimlərin aylıq vəzifə maaşları orta hesabla 2 dəfə artırılıb. Bu, biz müəllimlərə göstərilən olduqca böyük dövlət qayğısıdır. Müəllimlərin əməkhaqqı son illər mütəmadi artırılsa da birdən-birə bu qədər yüksək  artım olmamışdı. Doğrusu, mən də artımın bu qədər çox olacağını gözləmirdim. Ona görə də sərəncamı oxuyanda hədsiz sevindim. Bu mürəkkəb və çətin zamanda ölkə başçısının biz müəllimlərə göstərdiyi böyük diqqət və qayğını yüksək qiymətləndirir və möhtərəm Prezidentimizə atdığı bu humanist addıma görə minnətdarlığımı bildirirəm.

Əminəm ki, yeni əməkhaqqı artımı müəllimlərin sosial durumunu xeyli yaxşılaşdırmaqla yanaşı, təhsilimizin keyfiyyətinin yüksəlməsinə də  böyük təsir göstərəcəkdir.

Ölkə başçısının bu qərarı  gənclərdə müəllimlik peşəsinə marağı artırıb 

Zümrüd QULİYEVA,
Bakı şəhəri 188 nömrəli  tam orta məktəbin tarix müəllimi

2015-ci ilin 16 yanvar tarixində möhtərəm Prezidentimiz cənab İlham Əliyev Azərbaycan dövlətinin təhsil sahəsinə necə önəm verdiyini bir daha sübut etdi. Müəllimlərin əməkhaqqının artırılması biz müəllimlər tərəfindən arzu etdiyimiz bir məsələ olsa da, beynəlxalq aləmin yeni ilə  daxil oldugu iqtisadi çətinlik şəraitində bir qədər mümkünsüz görünürdü. Neftin qiymətinin aşağı düşdüyü bir vaxtda dünya dövlətlərində iqtisadi böhran yaşanır, ayrı-ayrı müəssisələr öz işçilərini ixtisar edirlər. Lakin belə bir şəraitdə müəllimlərin əməkhaqqının nəzərəçarpacaq  dərəcədə artırılması ilə Azərbaycan hökuməti həm beynəlxalq aləmə iqtisadiyyatımızın nə qədər möhkəm əsaslar üzərində qurulduğunu, onun neftdən asılı olmadığını sübut etmiş oldu, həm də təhsilin inkişafının dövlətimiz üçün necə prioritet  bir sahə olduğunu və bu sahədə həqiqi islahatlar keçirildiyini nümayiş etdirdi. Biz müəllimlər üçün gözlənilməz olan bu qərar təkcə özümüzü deyil, ailələrimizi də sevindirmiş oldu. Bu qərar bizdə işimizə olan sevgini və inamı daha da gücləndirdi. Son bir həftə ərzində müəllimlik peşəsinə olan marağın gənclər arasında da artdığının şahidi olduq.

Zəhmətimizə verilən bu qiymətə görə ilk növbədə cənab Prezidentimiz İlham Əliyevə dərin minnətdarlığımızı bildiririk. İnanırıq ki, hər bir müəllim dövlətimizin ona göstərdiyi etimadı doğruldaraq cəmiyyətimiz üçün tərbiyəli, savadlı insanlar yetişdirilməsində əlindən gələni əsirgəməyəcəkdir.

Gələcək uğurlarımız təhsilin keyfiyyətinə bağlıdır 

Südabə Muradova,
Bakı şəhəri 220 nömrəli məktəb-liseyin kimya müəllimi 

Dünyada və ölkəmizdə baş verən sürətli dəyişikliklərlə bağlı təhsil sahəsində çalışan insanların üzərinə xüsusi məsuliyyət düşür. Siniflərdə təhsil alan bugünkü şagirdlər gələcəyin elm və mədəniyyət xadimləri, təsərrüfat işçiləri, idarəçilikdə yer alan insanlar olacaqlar. Odur ki, xalqın rifahı və  gələcək yeni uğurlarımız birbaşa təhsilin keyfiyyətinə bağlıdır.

Ümumtəhsil məktəblərində müəllimlərin öz peşəkar səviyyəsini daim artırması, biliklərini yeniləməsi, baş verən dəyişiklikləri gözdən qaçırmaması vacib şərtdir.

Mən 2014-cü ildə Təhsil Nazirliyinin Bakı müəllimləri arasında keçirdiyi sınaq imtahanlarında kimya fənni üzrə yüksək bal toplamağa müvəffəq oldum. Təbii ki, istənilən insan öz əməyinin qiymətləndirilməsinə, ona dəyər verilməsinə ehtiyac duyur. Ona görə də cənab Prezidentin müəllimlərin maaşının artırılması ilə bağlı verdiyi məlum sərəncamı təhsil işçilərinin əməyinin stimullaşdırılması istiqamətində atılmış mühüm addım sayır və dövlət başçısına minnətdarlığımı bildirirəm. Prezidentimizin təhsil sahəsinə xüsusi qayğısının ifadəsi olan bu qərar müəllimləri daha yüksək nəticələr əldə etməyə ruhlandırır.

Müəllimlərin biliyinə görə əməkhaqqının müəyyənləşdirilməsi düzgün yanaşmadır 

Afət Axundova,
Bakı şəhəri 60 nömrəli tam orta məktəbin coğrafiya müəllimi

Xəbər verildiyi kimi, möhtərəm Prezident İlham Əliyev cənabları diaqnostik qiymətləndirmədən keçən müəllimlərin əməkhaqqının  artırılması barədə sərəncam imzalayıb. Fürsətdən istifadə edib cənab Prezidentə öz təşəkkürümü bildirirəm. Doğrusu, bu mənim üçün gözlənilməz  və çox sevindirici xəbər oldu.

Mənim  fikrimcə, müəllimlərin biliyinə görə əməkhaqqı sisteminin müəyyən edilməsi doğru yanaşmadır. Ümid edirəm ki, əməkhaqqımız hesablanarkən sınaq qiymətləndirilməsində göstərdiyimiz nəticələr nəzərə alınacaq.

Müəllim cəmiyyətdə həmişə aparıcı qüvvə olub, insan kapitalının inkisafinda mühüm rol oynayır. Təhsil sahəsində islahatlar uğurla həyata keçirilir, bu danılmazdır. Bizim savadlı, işgüzar və dərin intellektə malik  nazirimiz var. Dövlət başçısının düzgün kadr seçimi öz nəticəsini göstərir. Bugünkü gündə cənab nazir müəllim nüfuzunun qalxması və əvvəlki hörmət-izzətinin müəllimə qaytarılması üçün var qüvvəsi ilə çalışır. Mən buna görə cənab nazirə  də öz dərin minnətdarlığımı bildirirəm. Biz müəllimlər təhsil sahəsində irəliyə doğru atılan bütün addımlarda dövlət başçımıza öz əməli fəaliyyətimizlə dəstək verməliyik və veririk.

Dövlətimizin müəllimlərə qayğısının daha bir nümunəsi 

Xatirə Əsədova,
Bakı şəhəri 271 nömrəli tam orta məktəbin tarix müəllimi

1979-cu ildə Bakı şəhərində anadan olmuşam. 1997-ci ildə Azərbaycan Dövlət Pedaqoji Universitetinin tarix fakültəsinə daxil olub, 2001-ci ildə həmin universiteti fərqlənmə diplomu ilə bitirmişəm. Həmin ildən bu günə kimi Bakı şəhəri 271 nömrəli  tam orta məktəbdə tarix fənnini tədris edirəm.

Pedaqoji fəaliyyətim dövründə təhsildə aparılan islahatlara biganə qalmayaraq, daim öz üzərimdə çalışmış, "Yeni fənn kurikulumlarının tətbiqi və fəal təlim" mövzusunda UNİCEF-in təşkil etdiyi təlimçilərin təlimi, "Öyrədənlərin öyrədəni", "Prometan" interaktiv lövhələrdən istifadə, "Dymo", "Mimio İnteraktiv Texnologiyaları ilə tədris", "Sosial servislərin, informasiya-kommunikasiya və yeni təlim texnologiyalarının köməyi ilə tədris prosesinin təşkili", "İnsan alveri: təhlükələr və qabaqlayıcı təşəbbüslər" üzrə təlim kurslarında iştirak etmişəm və örəndiyim bütün yenilikləri  işlədiyim məktəbdə yüksək səviyyədə tətbiq etməyə çalışıram.

2014-cü il iyun ayının 12-də Bakı Şəhəri üzrəTəhsil İdarəsi tərəfindən keçirilən müəllimlərin bilik və səriştəsinin sınaq qiymətləndirilməsində 100 faizlik nəticə göstərmişəm. 

2015-ci il  yanvarın 16-da ölkə başçısı cənab İlham Əliyev həmin sınaq qiymətləndirilməsində iştirak edən müəllimlərin əməkhaqqlarının iki dəfə artırılması haqqında sərəncam imzaladı. Bu addım dövlətin Azərbaycan təhsilinə və onun müəlliminə verdiyi ən yüksək qiymətdir. Mənim fikrimcə, bu addım müəllimin pedaqoji sahədə fəaliyyətini daha da artıracaq. Bütün bu diqqət və qayğıya görə ölkə başçısı cənab İlham Əliyevə öz dərin minnətdarlığımı bildirirəm.

Liseyimizin bütün müəllimləri əməkhaqqı artımını alqışlayır 

Ramiz Kazımov,
"Zəngi" liseyinin riyaziyyat müəllimi

Mən, eləcə də işlədiyim "Zəngi" liseyinin bütün müəllim kollektivi möhtərəm Prezidentimiz İlham Əliyevin apardığı daxili və xarici siyasəti bəyənir və daim dəstəkləyirik. Ümummilli lider Heydər Əliyevin qurduğu müstəqil Azərbaycanın qüdrətli bir dövlət olmasında, şübhəsiz, ölkə başçısının böyük əməyi var. Dövlətimiz müharibə şəraitində olsa da, Prezident İlham Əliyev heç bir iqtisadi çətinlik çəkməyən  ölkəmizdə maaş və təqaüdləri dəfələrlə artırıb.

Azərbaycan xalqı tanınmış alim və ziyalılarla dünyada məşhurdur. Gələcək nəsildə belə ziyalıların yetişməsində müəllimlərin müstəsna rolu var. Məhz buna görə də dövlətimiz  müəllimlərə xüsusi diqqət yetirir.

Bunun bariz nümunəsi bütün dünyada baş verən iqtisadi böhranlara baxmayaraq,  müəllimlərin əməkhaqqının artırılması haqqında Prezidentin bu günlərdə imzaladığı sərəncamdır. Mən həm öz adımdan, həm də  "Zəngi" liseyinin kollektivi adından möhtərəm Prezidentimizə təşəkkür edir və bu diqqəti özümüzə məsuliyyət bilirik.  Ölkə başçısının bu sərəncamı biz müəllimlərə böyük sevinc və fərəh hissi yaşatdı.