|
İsmayıllı Rayon Təhsil Şöbəsinin metodisti Güllübəyim
Lətifovanın redaksiyamıza göndərdiyi məktubda qeyd
edilir ki, gənc nəslin vətənpərvərlik ruhunda
yetişdirilməsi vacib məsələdir.
"Vətənpərvərlik" məfhumu öz məzmununa görə çoxşaxəlidir
və onu heç bir sözlə əvəz etmək mümkün deyil. Bu hiss
uşaqlarda tədricən formalaşır. İnsan dünyanı dərk
etdikcə vətəninə, torpağına məhəbbəti, sevgisi artır,
vətənpərvərlik hissləri güclənir. Torpaqlarımızın işğal
altında olduğu bir şəraitdə biz uşaqlarda vətənə,
torpağa, elə-obaya sevgi, məhəbbət hissini
formalaşdırmaq məqsədilə müxtəlif tədbirlər həyata
keçiririk. İşğal günləri ərəfəsində uşaqlarla xüsusi
diskussiyalar aparılır. Bundan əlavə, divar qəzetləri,
şeir və ya inşa yazı müsabiqələri, rəsm sərgiləri
təşkil olunur. Düşünürəm ki, fənnindən asılı olmayaraq
hər bir müəllim şagirdlərə vətənpərvərlik duyğusunu
öyrətməyi bacarmalıdır. Çünki müəllim məktəbdə, ilk
növbədə, şəxsiyyət yetişdirir və çalışmalıdır ki, həmin
şəxsiyyət də vətəninə, millətinə layiq bir tərzdə
yetişsin. Dərslərdə işğal olunmuş torpaqlarımız uğrunda
fədakarlıqla döyüşən Milli Qəhrəmanlarımızı tanıtmaq,
xalqımızın başına gətirilən faciələri uşaqlara çatdırmaq
lazımdır. |
