|
 Bakının "Central" Park hotelində
şahmat üzrə qadınlar arasında keçirilən Azərbaycan
çempionatı beynəlxalq dərəsəli qrossmeyster Zeynəb
Məmmədyarovanın inamlı qələbəsi ilə başa çatıb.
Azərbaycan Şahmat
Federasiyasının məlumatına görə, respublikamızın ən
güclü 20 qadın şahmatçısının qələbə uğrunda mübarizə
apardığı yarışda Z.Məmmədyarova 9 oyundan 7 xal
toplayaraq növbəti dəfə Azərbaycan çempionu adına layiq
görülüb. Zeynəb Məmmədyarova bu titulu ilk dəfə 2001-ci
ildə qazana bilmiş, 2007-ci ildə isə bir daha
Azərbaycanın ən güclü qadın şahmatçısı olduğunu sübut
etmişdir.
Rauf Hacılının baş hakim olduğu,
İsveçrə sistemi üzrə keçirilən respublika çempionatında
hər biri 6 xal toplamış gənc şahmatçılar Nərmin Kazımova
2-ci, Nərmin Məmmədova isə 3-cü yeri tutublar.
Azərbaycan Şahmat
Federasiyasının vitse-prezidenti Faiq Həsənov respublika
çempionatının qaliblərini federasiya adından medallarla
təltif edib, onlara turnirin mükafatlarını verib.
Yarışı uğurla başa vuraraq,
2015-ci ildə keçiriləcək Avropa çempionatına vəsiqə
qazanmış qalib üçlük həm də Azərbaycanın Gənclər və
İdman Nazirliyinin xüsusi diplomları ilə təltif
olunublar.
Azərbaycan şahmat məktəbinin
tanınmış qadın nümayəndəsi, Avropa və dünya çempionu
Zeynəb Məmmədyarova Sumqayıtın məşhur şahmatçılar
ailəsinin - Məmmədyarovlar ailəsinin üzvüdür. O,
şahmatla hələ 10 yaşında ikən atası Həbib müəllimin
rəhbərliyi ilə məşğul olmağa başlamış, ilk dəfə 2000-ci
ildə 18 yaşlı qızlar arasında İspaniyada keçirilən dünya
çempionatında bütün rəqiblərinə qalib gələrək yaşıdları
arasında dünyanın ən güclü şahmatçısı olduğunu sübut
edib. Həmin il eyni zamanda Beynəlxalq Şahmat
Olimpiadasının gümüş medalına layiq görülüb. 2002-ci
ildə 20 yaşadək şahmatçı qızlar arasında keçirilən
Avropa çempionatının qızıl medalını qazanmağa nail olub.
Z.Məmmədyarova daha sonra
Beynəlxalq Şahmat Olimpiadasının qalibi kimi də diqqəti
cəlb etmişdir.
Məlum olduğu kimi, Zeynəbin
qardaşı Şəhriyar və kiçik bacısı Türkan da beynəlxalq
şahmat aləmində güclü şahmatçılar kimi tanınırlar və bir
çox beynəlxalq yarışların, turnirlərin qalibləridirlər.
Zeynəb Məmmədyarova hazırda
Azərbaycanın şahmat üzrə qadınlardan ibarət milli yığma
komandasının kapitanıdır. |
