|
Bakının Binəqədi rayonunda 2 fevral - Gənclər Günü
münasibətilə "Təmiz Binəqədi" Gənclər Forumu keçirilib.
Əvvəlcə forum iştirakçıları ulu öndər Heydər Əliyevin
YAP Binəqədi rayon təşkilatının inzibati binası önündə
ucaldılmış abidəsi önünə gül dəstələri qoyub və dahi
şəxsiyyətin ruhuna ehtiramlarını bildiriblər. Forum öz
işinə Azərbaycan Respublikasının Dövlət himninin
səsləndirilməsi ilə başlayıb. Binəqədi rayonunda
gənclərlə iş sahəsindən bəhs edən hesabat videoçarxı
nümayiş olunub.
Azərbaycan Respublikası Prezidenti Administrasiyasının
ictimai-siyasi məsələlər şöbəsinin gənclər təşkilatları
ilə iş sektorunun müdiri Vüsal Quliyev ölkəmizdə həyata
keçirilən dövlət gənclər siyasətindən, əldə edilən
uğurlardan danışıb.
Sonra forumda Bakı şəhər Gənclər və İdman Baş İdarəsinin
rəisi Raqif Abbasov, YAP Gənclər Birliyinin sədri Seymur
Orucov, "ASAN xidmət" mərkəzinin insan resursları və
təlim şöbəsi müdirinin müavini Cahangir Hacıyev, "ASAN
Könüllüləri" Gənclər Təşkilatının sədri Fərid Sadıxlı,
"İrəli" İctimai Birliyinin sədri Mirhəsən Seyidov, ali
məktəblərə qəbul zamanı ən yüksək nəticə göstərərək 700
bal toplamış Zəhra Nəbizadə çıxış ediblər.
Binəqədi Rayon İcra Hakimiyyətinin başçısı Xaləddin
İsgəndərov əsasını ulu öndər Heydər Əliyevin qoyduğu
gənclər siyasətinin hazırda Prezident İlham Əliyev
tərəfindən uğurla davam etdirilməsindən danışıb.
Sonra rayonun ictimai-mədəni həyatında fəallığı ilə
seçilən bir qrup gənc Binəqədi RİH-in fəxri fərmanları
ilə təltif edilib. Ötənilki ənənənin davamı olaraq
xüsusi fəallığı ilə seçilən bir nəfər gənc isə London
Meridian Kollecində iki həftəlik xarici dil kursunda
iştirak edəcək.
Forum öz işini "Təmiz Binəqədi" Gənclər Forumunun
iştirakçılarının Azərbaycan Prezidenti İlham Əliyevə
müraciətinin oxunması ilə yekunlaşdırıb.
Sonda forum iştirakçıları tərəfindən "Gənclərin Təmiz
Binəqədi" təşəbbüs qrupu yaradılıb.
Rəşad RAMAZANOĞLU,
"Azərbaycan müəllimi" |
