|
 Bakıdakı
246 nömrəli tam orta məktəbdə "Fövqəladə hallarda özünü
necə aparmalı?" adlı maarifləndirici tədbir keçirilib.
Fövqəladə Hallar Nazirliyinin Bakı Regional Mərkəzinin
təşkilatçılığı ilə keçirilən tədbirdə məktəbin
müəllim-şagird kollektivi ilə yanaşı, valideynlər də
iştirak ediblər.
Məktəbin direktoru Almaz Bayramova çıxış edərək belə
bir tədbirin keçirilməsinə dəstək verdiklərinə görə
Bakı Regional Mərkəzinin bütün əməkdaşlarına
pedaqoji kollektiv adından minnətdarlığını bildirib.
Tədbirdə Bakı Regional Mərkəzinin strukturu və fəaliyyət
istiqamətləri, fövqəladə hallar, onun növləri, fövqəladə
hallar zamanı davranış qaydaları, mülki müdafiə
anlayışları ilə bağlı ətraflı məlumat verilib.
Mərkəzin əməkdaşlarının çıxışları şagirdlər tərəfindən
maraqla qarşılanıb. Fövqəladə Hallar Nazirliyinin
hazırladığı "Təbii fövqəladə hallar zamanı nə etməli?"
adlı videoçarx göstərilib.
Sonra fövqəladə hallarla əlaqədar məktəblilər şeir
söyləyib, ədəbi-bədii kompozisiya nümayiş etdiriblər.
Tədbirin ikinci-praktiki hissəsi isə regional mərkəzin
əməkdaşları tərəfindən açıq havada nümayiş etdirilib.
Şakir CƏFƏROV,
"Azərbaycan müəllimi" |
