|
 Bakı
şəhərindəki Heydər Əliyev Mərkəzində Azərbaycan xalqının
ümummilli lideri Heydər Əliyev irsinin, dövlətçilik
fəlsəfəsinin tədqiqi və geniş təbliği məqsədilə
elmi-praktik seminar keçirilib. Seminarda "Heydər Əliyev
və Azərbaycan elmi" mövzusu müzakirə olunub. Onlayn
bağlantı vasitəsilə Naxçıvan Dövlət Universitetinin
qatıldığı seminarda rektor, AMEA-nın müxbir üzvü Saleh
Məhərrəmov, universitetin professor-müəllim heyəti və
tələbələri, Azərbaycan Milli Elmlər Akademiyası Naxçıvan
bölməsinin sədri, akademik İsmayıl Hacıyev və bölmənin
əməkdaşları müzakirələrdə iştirak ediblər. Qeyd edək
ki, üçtərəfli videobağlantıya Azərbaycan Milli Elmlər
Akademiyasının Gəncə bölməsi də qoşulub.
İlk öncə Heydər Əliyev Mərkəzinin Heydər Əliyev İrsinin
Tədqiqi və Elmi Araşdırmalar Departamentinin direktoru
Məhəbbət Mehdiyeva çıxış edərək bildirib ki, "Heydər
Əliyev irsi" mövzusunda elmi-praktik seminarlar adlı
layihə Mərkəz tərəfindən həyata keçirilən maraqlı
layihələrdəndir və bu cür seminarlar mütəmadi olaraq
keçirilir. Heydər Əliyevin elmə, savada, biliyə böyük
həssaslıqla yanaşdığını xüsusi vurğulayan M.Mehdiyeva bu
baxımdan seminarın "Heydər Əliyev və Azərbaycan elmi"
mövzusunda keçirilməsini də əhəmiyyətli sayıb.
Seminarda məruzəsi dinlənilən Azərbaycan Milli Elmlər
Akademiyasının prezidenti, akademik Akif Əlizadə deyib
ki, bütün ömrü boyu Azərbaycan xalqının inkişafı,
xoşbəxtliyi üçün çalışan Heydər Əliyev Azərbaycanın bu
gününü - müasir Azərbaycanı yaradıb.
AMEA-nın prezidenti bildirib ki, Azərbaycan tarixində
tarix yaradan şəxsiyyətlər az olmayıb. XX əsrin belə
görkəmli tarixi şəxsiyyətlərindən biri də ümummilli
lider Heydər Əliyevdir. Qeyd olunub ki, istər sovet
hakimiyyəti illərində, istərsə də müstəqillik dövründə
dahi rəhbərin elm siyasəti milli quruculuq siyasətinin
əsas istiqamətlərindən birini təşkil edib. Bütün
fəaliyyəti xalqa xidmət nümunəsi olan ulu öndər Heydər
Əliyev Azərbaycan elminin inkişafında böyük xidmətlər
göstərib.
Ulu öndər Heydər Əliyevin milli kadr potensialının, o
cümlədən nadir ixtisaslar üzrə mütəxəssis kontingentinin
yaradılmasındakı rolu barədə də danışan akademik Akif
Əlizadə Heydər Əliyevin hər il azərbaycanlı gənclərin
təhsil almaq üçün böyük qruplarla keçmiş SSRİ-nin
nüfuzlu ali məktəblərinə göndərilməsi ənənəsinin əsasını
qoyduğunu seminar iştirakçılarının nəzərinə çatdırıb.
Videobağlantı zamanı Naxçıvan MR-in elm adamları Heydər
Əliyev Mərkəzində təşkil olunan mövzunun müzakirəsində
iştirak ediblər və onları maraqlandıran suallar
cavablandırılıb.
Mina QASIMOVA |
