ARXİV

21 Fevral 2015 - №07

Xarici xəbərlər

Şagirdlər 12 il oxuyacaqlar 

Ukraynada yeni təhsil qanunu hazırlanır 

Ukraynanın Təhsil Nazirliyi, ölkə parlamenti (Ali Rada)   və  Pedaqoji Akademiyanın, ictimai təşkilatların  nümayəndələrindən ibarət  işçi qrup tərəfindən təhsil  haqqında qanunun yeni redaksiyası  hazırlanır. Yeni qanunda 12 illik təhsilə keçid  nəzərdə tutulur.  Orta məktəblərdə  12 illik tədris Avropa təcrübəsinə uyğundur.  Əgər Ukrayna 12 illik təhsil sisteminə keçsə, onda bu ölkənin verdiyi orta təhsil attestatları Avropa Birliyində də tanınmağa başlanacaq. Adətən  AB ölkələrində ibtidai təhsilə 4-7, baza təhsilinə 3-6,  yuxarı məktəblərə isə 2-5 il vaxt ayrılır.  Yeni qanunun müəllifləri  Ukraynada 2 variant  -  6+3+3 (müvafiq olaraq, ibtidai, orta və yuxarı məktəb)  və  5+4+3 üzərində seçim ediblər və nəticədə ikinci varianta üstünlük veriblər. Məhz sonuncu variant Ukraynanın indiki təhsil strukturuna uyğundur və şagirdlər üçün daha yüngüldür.  Ehtimal olunur ki, şagirdlər  IX  sinfi bitirdikdən sonra peşəyönümü testləri verəcək və bundan sonra harada oxuyacaqlarına dair qərar qəbul edəcəklər. Yuxarı məktəb akademik liseylər və kollec, peşə təhsili liseyləri ilə təmsil olunacaq.

Dünyanın ən yaxşı tibb universitetləri 

Yeni reytinq cədvəli açıqlanıb 

Böyük Britaniyanın təhsil xidmətləri sahəsində aparıcı  konsaltinq şirkəti olan  "QS World University Rankings"  dünyanın ən yaxşı tibb universitetlərinin  reytinq cədvəlini  açıqlayıb.  Reytinq cədvəlində bütün dünyadan 200 ali məktəb yer alıb.  Tərtibçilər ali məktəbin və  işəgötürənlərin nüfuzu, elmi jurnallarda məqalələrdən sitatgətirilmə və bir sıra mühüm faktorları təhlil ediblər. 2014-cü ilin ən yaxşı 200 tibb universiteti sırasında yer almış ali məktəblərdən 48-i ABŞ-ın, 25-i Böyük Britaniyanın, 19-u Almaniyanın, 11-i  Kanadanın, 10-u Yaponiyanın, 9-u Avstraliyanın payına düşür.  Reytinqdə bütövlükdə 32 ölkə təmsil olunub, lakin cəmi 13 ölkənin  ali məktəbi  ilk 50-likdə yer ala bilib. İlk 10-luqda  ABŞ-ın Harvard,  Cons Hopkins,  Stanford ,  Yale, Kaliforniya kimi universitetləri,  Böyük Britaniyanın  Oksford, London İmperial Kolleci, Kembric və London Universitet Kolleci kimi ali məktəbləri yer alıb.   Bütün dünyada təhsil sahəsində lider olan ABŞ-ın  ən yaxşı tibb universitetləri ən reytinqli ali məktəblərin  bazasında yerləşir.

Kanadanın tibb sahəsində fəaliyyət göstərən ən yaxşı ali məktəbləri ölkənin nüfuzlu universitetlərindən olan Toronto, Makginli, Britaniya Kolumbiyası kimi ali məktəblərin bazasında təmsil olunur.  Avropanın ən yaxşı tibb universitetlərindən Heydelberq, Münhen, Lüdviq-Maksimilian (Almaniya),  Karolin (İsveç),  Kopenhagen (Danimarka), Sürix (İsveçrə), Rotterdam, Leyden, Amsterdam (Niderland) kimi universitetlərin adlarını çəkmək olar.  Asiyanın ən yaxşı tibb universitetləri kimi reytinqdə  Melburn, Sidney, Monako (Avstraliya), Tokio (Yaponiya) , Honqonk (Honqonk) kimi ali məktəbləri  yer alıb. 

Effektiv peşə təhsili sistemi yaradılır 

Rusiyanın Baş naziri bu barədə açıqlama verib

 Rusiya hökuməti  effektiv fəaliyyət göstərən peşə təhsili sistemi yaratmaq niyyətindədir.  "Uçitelskaya qazeta"nın məlumatına əsasən, bu barədə Nazirlər Kabinetinin  iclasında çıxış edən baş nazir Dmitri Medvedev bildirib. Onun sözlərinə görə, səmərəli peşə təhsili sisteminin  yaradılmasında əsas məqsəd kolleclərin məzunlarının  hazırlıq səviyyəsinin müasir iqtisadiyyatın tələblərinə tam uyğun olmasıdır. Bu məqsədə çatmaq üçün Rusiya iqtisadiyyatına  50 ən prioritet sahə  üzrə tələb  olunan yüksək ixtisaslı mütəxəssislərin siyahısı hazırlanacaq. Siyahıya müvafiq olaraq peşə  və təhsil standartları işlənib hazırlanacaq.  Biznes və dövlət resurslarının ölkədə peşə təhsili sisteminin inkişaf etdirilməsi üçün səfərbər olunması nəzərdə tutulub. "Tələbələr  tədris vaxtının ən azı  50 faizini  istehsalat və ya tədris-sınaq mərkəzlərində keçirməlidir",-deyən baş nazir əlavə edib ki, işəgötürənlər hakimiyyət orqanları  və sahə qurumlarının nəzdində fəaliyyət göstərən şuralar vasitəsi ilə tədris proqramlarının planlaşdırılması və reallaşdırılmasında fəal iştirak edə bilərlər. Bundan başqa, kadr hazırlığının keyfiyyətinin monitorinqi  səviyyəsinin artırılması da nəzərdə tutulub.  Hökumət başçısı qeyd edib ki, dövlət tərəfindən peşə təhsilinin  inkişafına qoyulan vəsaitlərin həcmi artırılacaq. Bu məqsədlə ölkənin 45 regionunda iqtisadiyyatın 15 prioritet istiqaməti üzrə layihələrin maliyyələşdirilməsi həyata keçiriləcək.  Ötən il kolleclərdə 2,3 milyon tələbə təhsil alıb, daha 500 min isə universitetlərdə peşə təhsili üzrə hazırlıq keçib. Yaxın 4 il ərzində peşə təhsilinin inkişafına 8,5 milyard rubl xərclənəcək.

Məktəblərdə şahmat tədris olunacaq 

İspaniya Parlamenti bununla bağlı qərar qəbul edib

 İspaniya parlamentinin təhsil komitəsi Avropa parlamentinin  tövsiyəsinə uyğun olaraq ölkənin ümumtəhsil məktəblərinin  proqramlarına şahmat kursunun daxil edilməsi barədə qərar qəbul edib.  Parlamentin təhsil komitəsi şahmatın dərsliyə salınması ilə bağlı artıq hökumətə müraciət edib. Müzakirələrdə bütün siyasi partiyaların nümayəndələri iştirak ediblər. Çıxışlar zamanı İspaniyanın dünyada  şahmatın inkişafındakı rolu qeyd olunub. Bildirilib ki, bugünkü şahmat öz oyun qaydaları ilə birlikdə 500 il əvvəl ilk dəfə məhz İspaniyada yaranıb.  Yaxın vaxtlarda İspaniyanın Təhsil Nazirliyi məsələ ilə bağlı yekun qərar verəcək.