Javascript DHTML Drop Down Menu Powered by dhtml-menu-builder.com

ARXİV

28 Fevral 2015 - №08

 

Zamanın unutdura bilməyəcəyi faciə

 

Böyütmək üçün seçinBakı şəhəri 258 nömrəli tam orta məktəbdə Xocalı faciəsinin 23-cü ildönümü ilə bağlı fevralın 24-də tədbir keçirildi. YAP Nərimanov rayon təşkilatı Qadınlar Şurasının təşəbbüsü ilə baş tutan ədəbi-bədii tədbirdə şuranın sədri Məhəbbət İbrahimova, onun müavini, "Tərəqqi" texniki-humanitar liseyinin direktoru, əməkdar müəllim Məhbubə Məmmədova, Nərimanov Rayon İcra Hakimiyyəti başçısının müavini İradə Mahmudova, iş adamları, məktəbəqədər və ümumtəhsil müəssisələrinin rəhbərləri iştirak edirdilər.

Tədbiri 258 nömrəli tam orta  məktəbin direktoru Sədaqət Hüseynova açaraq qonaqları salamladı, tədbiri məhz onların məktəblərində keçirdikləri üçün təşkilatçılara minnətdarlıq etdi. Xocalı faciəsinin qurbanlarının, eləcə də vətənimizin azadlığı, torpaqlarımızın bütövlüyü uğrunda mübarizədə şəhid olmuş oğul və qızlarımızın əziz xatirəsi bir dəqiqəlik sükutla yad olundu.

Tədbirdə YAP Nərimanov rayon təşkilatı Qadınlar Şurasının sədri Məhəbbət İbrahimova çıxış edərək Xocalı  faciəsini törədən erməni-rus hərbi birləşmələrinin vəhşiliklərindən danışdı, hadisənin kədərli statistikasını diqqətə çatdırdı. M.İbrahimova çıxışında Xocalı faciəsinə siyasi və hüquqi qiymət verilməsində ulu öndər Heydər Əliyevin mühüm rolu olduğunu vurğuladı.

Tədbir bədii hissə ilə davam etdirildi. Xocalı faciəsindən bəhs edən slaydlar nümayiş olundu, şagirdlər hazırladıqları təsirli kompozisiyaları təqdim etdilər. Vətən haqqında, Xocalı hadisələrinə həsr olunmuş şeirlər, mahnılar ifa olundu. "Ana harayı", "Xocalım, ay Xocalım" şeirlərinin ifası tədbir iştirakçılarına hüznlü anlar yaşatdı.

Tədbirin sonunda söz alan YAP Nərimanov rayon təşkilatı Qadınlar Şurasının sədr müavini, əməkdar müəllim Məhbubə Məmmədova Xocalı faciəsinin tarixdə misli bərabəri olmayan soyqırım aktı olduğunu, düşmənin qəddarlığı nəticəsində 7 min əhalisi olan şəhərin bir gecədə məhv edildiyini söylədi, Xocalı faciəsinin dünyaya soyqırımı aktı kimi tanıdılmasında ölkə rəhbərliyinin, Heydər Əliyev Fondunun, xüsusən də Fondun vitse-prezidenti Leyla Əliyevanın xidmətlərindən bəhs etdi.

Çıxışının sonunda xalqımızın başına gətirilmiş bu faciənin heç zaman unudulmayacağını vurğulayan M.Məmmədova tədbiri yüksək səviyyədə təşkil etdiklərinə görə 258 nömrəli tam orta məktəbin rəhbərliyinə, onu məharətli çıxışları ilə daha təsirli edən məktəblilərə minnətdarlığını bildirdi. 

Yusif ƏLİYEV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov