|
 Bakı
Dövlət Universitetinin "Gənc istedadlar" liseyinin
şagirdləri "Sabahın alimləri" IV Respublika
müsabiqəsinin qalibləri olublar.
Müsabiqədə "Gənc istedadlar" liseyinin 10-cu sinif
şagirdləri Rəna Həsənzadə və Ləman Əliyeva BDU-nun
professoru Ülviyyə Həsənovanın rəhbərliyi ilə kimya
kateqoriyası üzrə 1-ci yerə layiq görülüb və bu ilin may
ayında ABŞ-da keçiriləcək beynəlxalq müsabiqədə ölkəmizi
təmsil etmək hüququ qazanıblar. 9-cu sinif şagirdləri
Raul İsgəndərov, Almaz Ömərov və 10-cu sinif şagirdi
Aysel Süleymanlı isə BDU-nun professoru Rafiq Həsənovun
rəhbərliyi ilə biologiya kateqoriyası üzrə birinci yerə
çıxıblar. Liseyin 10-cu sinif şagirdi Ləman Qurbanova
isə BDU-nun professoru Yaqub Qəribovun rəhbərliyi ilə
ekologiya və ətraf mühitin idarə olunması kateqoriyası
üzrə ikinci yeri tutub. Bundan əlavə, 11-ci sinif
şagirdi Nurdil Nuru BDU-nun dosenti Qəzənfər Bayramovun
rəhbərliyi ilə fizika, astronomiya kateqoriyası üzrə,
9-cu sinif şagirdləri Sonya Fərəcova, Xalidə Quliyeva,
Banu Abdullazadə, Hüseyn Hüseynov isə BDU-nun professoru
Famil Çıraqovun rəhbərliyi ilə kimya kateqoriyası üzrə
üçüncü yerə layiq görülüblər.
Qaliblərə diplom, medal və pul mükafatı təqdim olunub.
Ümumilikdə lisey üzrə 11 şagird ilk üçlükdə yer alıb.
Rektor, akademik Abel Məhərrəmov şagirdləri qəbul edərək
təbrik edib. Universitet professorları ilə lisey
şagirdləri arasında sıx əlaqədən danışan rektor,
şagirdlərin davamlı olaraq universitet
laboratoriyalarında təcrübə keçdiklərini diqqətə
çatdırıb və ABŞ-da keçiriləcək beynəlxalq müsabiqədə
iştirak hüququ qazanan şagirdlərə vətənimizi layiqincə
təmsil etməyi arzulayıb. |
