|
"Mənim universitetim" layihəsinin budəfəki hədəfi
Sumqayıt Dövlət Universitetidir
Rüfanə GÜNƏŞ, "Azərbaycan müəllimi"
[email protected]
 Sumqayıt
Dövlət Universiteti SSRİ Nazirlər Sovetinin qərarına
əsasən 1962-ci ildə Azərbaycan Neft və Kimya
İnstitutunun filialı olaraq yaradılıb. 1975-ci ilə qədər
filial kimi fəaliyyət göstərib. 1975-1992-ci illərdə Ali
Texniki Təhsil Məktəbi adı altında tədrisini davam
etdirib. 1992-ci ildən Azərbaycan Sənaye İnstitutu
adlandırılıb. 2000-ci ildə ümummilli lider Heydər
Əliyevin fərmanı ilə Azərbaycan Sənaye İnstitutunun
bazasında Sumqayıt Dövlət Universiteti yaradılıb.
Hazırda universitetdə magistratura pilləsi də daxil
olmaqla 7 fakültə üzrə 4500 nəfər təhsil alır. Onlardan
844 nəfəri qiyabi oxuyur. 2014-2015-ci tədris ilində
SDU-ya 36 ixtisas üzrə 1146 nəfər qəbul olub ki,
onlardan 113 nəfəri magistrantdır. Magistrantların 237
nəfəri əyani, 102 nəfəri isə qiyabi təhsil alır. 2014-cü
ilin bakalavr məzunlarından 220-dən çoxu ölkənin
müxtəlif ali məktəblərində magistraturaya qəbul olunub.
Universitetdə 56 xarici tələbə təhsil alır. 45 nəfər
doktorant, 38 nəfər dissertant var. SDU-nun 6 tələbəsi
Azərbaycan Dövlət İqtisad Universitetinin və Bakı Dövlət
Universitetinin SABAH qruplarında təhsil alır. Hazırda
SDU-da tələbələrin təhsili ilə 5 nəfər AMEA-nın müxbir
üzvü, 44 elmlər doktoru-professor, 168 fəlsəfə
doktoru-dosent və 178 dissertant və doktorant müəllim
məşğul olur. 2014-cü ildə universitetin 3 əməkdaşı
elmlər doktoru, 14 əməkdaşı fəlsəfə doktoru elmi
dərəcəsi, 3 nəfər professor və 13 nəfər dosent elmi
adı alıb. Ali təhsil ocağına 2014-cü ilin mart ayından
dosent Elxan Hüseynov rəhbərlik edir.
Maddi-texniki baza
 Universitet
iki tədris binası və iki yataqxanadan ibarətdir. Ötən il
SDU-nun maddi-texniki bazasının gücləndirilməsi
istiqamətində ciddi addımlar atılıb. Belə ki,
auditoriyalar yeni kompüterlər, ağıllı lövhələr,
proyektorlar, partalar, şkaflar, stol və stullar, eləcə
də normal tədris üçün digər avadanlıqlarla təmin olunub,
2 yeni linqafon kabineti, 8 kompüter otağı istifadəyə
verilib. Həmçinin tədris laboratoriyaları da müasir
avadanlıqlar və reaktivlərlə təmin olunub. Hər iki
tədris binasında yüksək elektrik xətləri dəyişdirilib,
istilik sistemi və qazanxana tamamilə yenidən qurulub,
köhnə qızdırıcılar yenisi ilə əvəz olunub. Ali təhsil
ocağında 46 kafedra, 6 elmi tədqiqat laboratoriyası,
Əcnəbi Tələbələrlə Hazırlıq Mərkəzi fəaliyyət göstərir.
Tibbi xidmət üçün otaq ayrılıb. 95 proyektor və 35
ağıllı lövhə quraşdırılıb. 2014-cü ildə 4 yeni
laboratoriya, hər bir fakültə üçün kompüter sinifləri
yaradılıb. Bu il yeni kompüterlər alınması və yeni
laboratoriyaların yaradılması planlaşdırılır.
SDU-nun ərazisi geniş olduğu üçün kampus yaratmaq
məqsədilə mini maket yaradılıb və Təhsil Nazirliyinə
təqdim olunub. Ötən il korpuslarda əsaslı struktur
dəyişikliyi aparılıb, fakültələrin yeri dəyişdirilib. 2
fakültə ikinci tədris, 5 fakültə isə əsas tədris
binasında yerləşdirilib. Hər fakültə ayrıca kompüter
otaqları ilə təmin olunub. Universitetin 430 yerlik akt
zalının oturacaqları yenilənib. Sanitar qovşaqlar demək
olar ki, yenidən qurulub.
 Hazırda
universitetin mühəndislik fakültəsində TEMPUS
layihələri üzrə də laboratoriyalar fəaliyyət göstərir.
Tədris laboratoriyalarının modernləşdirilməsi həyata
keçirilir. "LABVieW" proqramı ilə işləyən
laboratoriyalar təşkil olunub.
İnternet server vahid şəbəkəsi formalaşıb.
Tələbə və müəllimlərin öz asudə vaxtlarını səmərəli
keçirməsi üçün "Gənclik kafesi" adlı yeməkxana
istifadəyə verilib. Universitetin ətrafında mövcud olan
yolların asfalt örtüyü yenilənib. Təmir-tikinti işləri
ilə yanaşı həyətyanı sahənin yaşıllaşdırılması və
abadlaşdırılması həyata keçirilib və bu il də həmin
işlər davam etdiriləcək.
Elmi-tədqiqat laboratoriyalarının fəaliyyətinin
təkmilləşdirilməsi, aparılacaq elmi-tədqiqat işlərinin
səmərəliliyini artırmaq məqsədilə universitetin kafesi
rekonstruksiya edilərək orada 12 otaqlı, təmirli, müasir
yeni bir bina yaradılıb və bütün pərakəndə halda
səpələnmiş elmi-tədqiqat laboratoriyaları bir yerə
cəmləşdirilib. Laboratoriyalar su və qaz xətti, bütün
otaqlar mərkəzləşdirilmiş avtonom istilik sistemi və
internetlə təchiz edilib. SDU-nun nəşriyyatı və mətbəəsi
də tam yenidən qurularaq müasir vəziyyətə gətirilib.
Nəşriyyat üçün rezoqraf, epson tipli printer, müasir
optik oxuyucu printer, laminator və digər çap qurğuları
alınıb. Artıq universitetdə keçirilən konfransların
materialları, SDU-nun "Elmi xəbərlər "
jurnalı, dərsliklər və digər metodik vəsaitlər, tələbə
biletləri və qiymət kitabçaları, qrup jurnalları,
əməkdaşların vəsiqələri burada hazırlanır.
Bütün universitet korpuslarının tam internetləşməsi
prosesi baş verib. İnternetin normal paylanması üçün
bahalı server alınıb. SDU-nun internet saytı tamamilə
yenidən işlənib və effektivliyi daha da artırılıb.
Semestr
imtahanları
SDU-da semestr imtahanları yazılı şəkildə və
mərkəzləşdirilmiş qaydada keçirilir. İmtahanlardan və
onun nəticələrindən narazı qalan tələbələr irad və
təkliflərini yazıb dəhlizlərdə yerləşdirilən qutulara
daxil edirlər. İş gününün sonunda imtahan qərargahının
üzvləri qutuları açırlar və yazılanları araşdırırlar.
Qiymətlərinə etirazı olan tələbələr apelyasiya
komissiyasına ərizə ilə müraciət edirlər. 2014-2015-ci
tədris ilinin payız-qış imtahan sessiyasında semestr
imtahanlarında 3616 bakalavr iştirak edib.
Elmi-tədqiqat işləri
 SDU-nun
elmi-tədqiqat laboratoriyalarında 2 nəfər elmlər
doktoru və 7 nəfər fəlsəfə doktoru çalışır. 2014-cü
ildə SDU-da təbiət və texniki elmlər üzrə 7, sosial və
humanitar elmləri üzrə 3 istiqamətdə 56 mövzunu əhatə
edən elmi-tədqiqat işləri yerinə yetirilib.
2014-cü ildə universitetin əməkdaşları tərəfindən 17
monoqrafiya, 3 dərslik, 31 dərs vəsaiti çap edilib.
Ümumilikdə 317 məqalə dərc olunub ki, onun 273-ü
respublika, 51-i xarici jurnalların payına düşür. Bu
məqalələrdən 17-si impakt - faktorlu jurnallarda, eləcə
də 167 tezisdən 144-ü respublikada, 23-ü isə xaricdə
nəşr olunub. Həmçinin 2014-cü ildə universitet üzrə 7
patent alınıb ki, onlardan da 1-i respublika, 6-sı isə
Avroasiya patentidir.
SDU-da Tələbə Elmi Cəmiyyəti (TEC) fəaliyyət göstərir.
Onun nizamnaməsi hazırlanaraq universitet elmi şurasının
iclasında qəbul edilib. Bütün fakültələrdə təsis
konfransları keçirilib, TEC-lərin şura sədrləri seçilib,
hər fakültədə TEC rəhbər təyin olunub. Tələbələr elmi
rəhbərləri ilə birlikdə mövzu seçib işləyirlər. Bu günə
qədər artıq iki fakültədə seminarlar keçirilib. Hər
şənbə günü tələbələr elmi rəhbərləri ilə birlikdə
araşdırmaları barədə məlumat verirlər. Tələbələrə elə
mövzular verilir ki, onlar gələcəkdə TEC-in xətti ilə
konfranslarda iştirak edə bilsinlər. Hazırda TEC-in
500-dən çox üzvü var. Texniki və təbiət elmlərinə aid
olan sahələrdə tələbələrin elmi məqalələri xarici
jurnallarda dərc olunur. Müəllimlərin elmi-tədqiqat
işlərinin daha səmərəli olması üçün 2014-cü ildə elmi
hissə yaradılıb.
 Ötən
il universitetdə 4 respublika və beynəlxalq səviyyəli
konfrans keçirilib. Universitetdə aparılan elmi-tədqiqat
işlərinin nəticələrini ictimaiyyətə çatdırmaq üçün
Azərbaycan, rus və ingilis dillərində rüblük "Elmi
xəbərlər" jurnalı buraxılır.
Respublika magistrantlarının elmi konfransları ənənəvi
olaraq SDU-da keçirilir. Bu il də magistrlərin XIV elmi
konfransı may ayında keçiriləcək. Ötənilki konfransa
magistrantlar 800-ə yaxın məqalə göndərib. Universitet
magistrantlarının elmi jurnallarda iki məqaləsi dərc
olunmasa onlar müdafiəyə buraxılmır.
Kitabxana
SDU-nun elmi kitabxanasında 16 nəfər çalışır. Burada 4
şöbə fəaliyyət göstərir. Elmi kitabxananın 4450 oxucusu
var. 2014-2015-ci tədris ilində kitabxanaya 1036 oxucu
üzv yazılıb. Bu tədris ilində həmçinin kitabxanaya 6337
ədəbiyyat daxil olub. Bunlardan 4794 ədədi Azərbaycan,
1543-ü isə digər xarici dillərdədir. Kitabxananın
fonduna ümumilikdə 128126 kitab daxildir. Onlardan
18398-ni jurnallar təşkil edir. 2014-2015-ci tədris
ilində kitabxanada 4 məlumat günü, 700 adda yeni alınmış
ədəbiyyatın sərgisi, 14 əlamətdar və tarixi günlərə aid
sərgi keçirilib. Kitabxana müasir avadanlıqlarla təchiz
olunub və internetə qoşulub. Universitetdə həmçinin
"Elektron kitabxana" fəaliyyət göstərir. Onun bazasında
3000 adda kitab yerləşdirilib. Həmçinin kitabxanada
İRBİS-64 sistemi quraşdırılıb.
 Kollektivin
yaxından köməyi ilə SDU-nun kitabxanasının kitab fonduna
universitetin ixtisaslarına uyğun xeyli kitab toplanıb,
ayrı-ayrı fənlər üzrə mühazirələrin elektron variantı
təşkil olunub, ümumiyyətlə, kitabxananın elektronlaşması
prosesi tam təşkil edilib. Gələcəkdə elektron
kitabxanaların mərkəzləşdirilməsi də nəzərdə tutulur.
Beynəlxalq əlaqələr
Sumqayıt Dövlət Universitetində beynəlxalq əməkdaşlıq
sahəsində işlərin yerinə yetirilməsi məqsədi ilə 2001-ci
ildə Beynəlxalq əlaqələr şöbəsi yaradılıb. 2014-cü
ilədək fəaliyyət göstərən bu şöbənin yerinə yetirdiyi
işlər əsasən xarici ölkələrin universitetləri ilə
müqavilələr imzalamaqdan ibarət olub. SDU-nun xarici
ölkələrlə elmi əməkdaşlıq əlaqələri əsasən TEMPUS
layihələri çərçivəsində həyata keçirilib.
SDU-nun beynəlxalq əlaqələrini keyfiyyətcə yeni
mərhələyə qaldırmaq və universitetdə yerinə yetirilən
beynəlxalq layihələr çərçivəsində görülən işləri və yeni
layihələrin hazırlanmasını bir mərkəzdən koordinasiya
etmək məqsədi ilə 19 may 2014-cü ildə rektorun əmri ilə
Beynəlxalq əlaqələr şöbəsi ləğv edilərək Beynəlxalq
əməkdaşlıq şöbəsi yaradılıb. Şöbə aşağıda göstərilən
yeni struktur əsasında fəaliyyətə başlayıb:
- beynəlxalq tədris və elmi proqramlar
- tələbə və professor-müəllim heyətinin akademik
mübadiləsi
- diplomatik-protokol
- informasiya-nəşriyyat fəaliyyəti.
Beynəlxalq tədris və elmi proqramlar.
Universitetdə yerinə yetirilən TEMPUS layihələri
(Əlillərin Azərbaycan ali təhsil müəssisələrinə
inteqrasiyasının təməlinin qoyulması, beynəlxalq
əlaqələr sahəsində idarəçiliyin (administrasiyanın)
inkişafı və təkmilləşdirilməsi, İsraildə, Azərbaycanda
və Qazaxıstanda Yerin eko sisteminin kosmik vasitələrlə
monitorinqi sahəsində ali təhsilin təkmilləşdirilməsi,
Azərbaycanda mühəndis hazırlığının Bolonya prosesinə
uyğunlaşdırılması) çərçivəsində görülən işlərin
səmərəliliyini artırmaq məqsədi ilə layihələrin vahid
mərkəzdən, Beynəlxalq əməkdaşlıq şöbəsi tərəfindən idarə
edilməsinə başlanılıb.
Sumqayıt Dövlət Universiteti Erasmus+ proqramının
müsabiqəsində iştirak etmək üçün verilən ərizələrin
11-də tərəfdaş qismində qoşulub. Bu zaman hər bir layihə
üzrə işçi qruplar yaradılıb.
Universitetin gələcəkdə Erasmus+ proqramında koordinator
kimi iştirak etməsi istiqamətində işlərə başlanılıb.
Bu məqsədlə Azərbaycan və Avropa tərəfdaş
universitetləri ilə danışıqlar aparılır.
Gələcəkdə beynəlxalq layihələri kadrlarla təmin etmək
məqsədi ilə universitet əməkdaşları arasında xarici
dilləri bilənlər müəyyən edilib. Seçilən əməkdaşlar üçün
layihələrin hazırlanmasına dair təlimlərin keçirilməsi
nəzərdə tutulur.
Tələbə və professor-müəllim heyətinin akademik
mübadiləsi.
2014-cü ildə Sumqayıt Dövlət Universiteti Xəzəryanı
ölkələrin universitetlərinin assosiasiyasına üzv olmaqla
bu ali məktəblərlə akademik mübadilə aparmaq imkanını
əldə edib.
2015-ci ildə "Mövlana" akademik mübadilə proqramına
qoşulmaq məqsədi ilə Sumqayıt Dövlət Universiteti və
Türkiyənin aparıcı universitetləri arasında ikitərəfli
əməkdaşlıq əlaqələrinin qurulmasına başlanılıb.
2015-ci ildə Sumqayıt Dövlət Universitetinin Avroasiya
Universitetləri Assosiasiyasına üzv olması
planlaşdırılır.
2015-ci ildə Azərbaycanda mühəndis hazırlığının Bolonya
prosesinə uyğunlaşdırılması TEMPUS layihəsi çərçivəsində
iki bakalavr və bir magistr proqramlarının ASİİN
(Almaniya) beynəlxalq akkreditasiya təşkilatı tərəfindən
akkreditasiya olunması gözlənilir. Əldə olunan təcrübə
digər proqramların beynəlxalq akkreditasiya olunmasında
istifadə oluna və bununla da xarici vətəndaşların
Sumqayıt Dövlət Universitetində təhsil almasına stimul
yarada bilər.
Diplomatik protokol.
2014-cü ildə Sumqayıt Dövlət Universitetində ilk dəfə
olaraq xarici ölkələrin nümayəndələri ilə görüşlərin
keçirilməsi və əlaqələrin yaradılması zamanı diplomatik
protokol qaydalarının tətbiq edilməsinə başlanılıb.
Şöbədə xarici ölkələrə ezamiyyə olunan əməkdaşlar bu
ölkələrdə qəbul olunan davranış normaları və ənənələri
barədə məlumatlandırılırlar.
Ümumiyyətlə, diplomatik protokolun tətbiqi nəticəsində
mövcud əlaqələrin genişlənməsi müşahidə olunur və yeni
əlaqələrin qurulmasına imkan yaranır.
İnformasiya-nəşriyyat fəaliyyəti.
Sumqayıt Dövlət Universitetinin əməkdaşlarını mütəmadi
olaraq müxtəlif beynəlxalq layihələr, qrantlar, mübadilə
proqramları ilə tanış etmək məqsədi ilə Beynəlxalq
əməkdaşlıq şöbəsi tərəfindən informasiya vərəqlərinin
buraxılması planlaşdırılır.
Universitetin portalında beynəlxalq əməkdaşlıq sahəsində
görülən işlər haqqında məlumatlar yerləşdirilir və dövri
mətbuatda bu haqda materiallar dərc olunur.
Universitetin, o cümlədən beynəlxalq əməkdaşlıq
sahəsində olan fəaliyyətini əks etdirən yeni
bukletlərin və DVD-lərin hazırlanmasına başlanılıb.
TEMPUS Azərbaycan üçün mühəndis təhsilində tədrisin
Bolonya prosesinə uyğunlaşdırılması layihəsinin müddəti
2015-ci ilin oktyabr ayınadək uzadılıb.
2014-cü ilin sentyabrında Xəzəryanı ölkələrin dövlət
universitetlərinin Assosiasiyasında SDU iştirak edib.
SDU 6 ölkənin 21 universitetini təmsil edən
assosiasiyanın üzvü qəbul edilib. "Əlillərin Azərbaycan
ali təhsil müəssisələrinə inteqrasiyasının təməlinin
qoyulması" layihəsi çərçivəsində 8-12 sentyabr 2014-cü
ildə SDU-nun əməkdaşları Avstriyanın Qrats Texniki
Universitetində və Yunanıstanın Saloniki Texniki
Universitetində ezamiyyətdə olublar.
2014-cü ildə SDU-da həmçinin Magistrantların XIV
Respublika, "Əsrin müqaviləsi Heydər Əliyevin yeni neft
strategiyasıdır" Respublika, "Ekologiya və həyat
fəaliyyətinin mühafizəsi" VIII Beynəlxalq elmi
konfransları keçirilib.
Tələbələrin
iş təcrübəsi və yeni ixtisaslar
SDU-da xarici dil, riyaziyyat və informatika, tarix və
coğrafiya, ibtidai sinif, məktəbəqədər təlim və tərbiyə,
kompüter elmi üzrə ixtisaslara tələbə qəbulu həyata
keçirilib. Bundan əlavə dörd fakültədə rus dili bölməsi
açılıb. Gələn ildən etibarən ixtisasların sayının 41-ə
çatdırılması planlaşdırılır.
Pedaqoji kadr hazırlığı üstünlük təşkil etdiyindən
tədrisin müasir səviyyədə qurulması üçün Təhsil
Nazirliyinin köməkliyi ilə ixtisas müəllimləri üçün
biraylıq kurslar təşkil olunub və onlara sertifikatlar
verilib.
Sumqayıt Dövlət Universitetinin tələbələri nəzəri
biliklərini ayrı-ayrı müəssisələrdə təcrübədən
keçirirlər. Bu baxımdan, Sumqayıt Texnologiyalar
Parkının və "Azərkimya" İB-nin müəssisələri ilə iş
birliyi yaradılır. AMEA-nın Polimer Materialları
İnstitutu (PMİ) ilə SDU arasında təhsil-elm-istehsalat
çərçivəsində elmi-təcrübi əməkdaşlıq üzrə istiqamətlər
müzakirə edilib və hədəflər müəyyənləşdirilib. PMİ-də
universitetin baza kafedrasının yaradılması nəzərdə
tutulub.
Əmək bazarı öyrənilməklə pedaqoji və mühəndis kadrları
hazırlanan yeni ixtisaslar yaradılıb. Azərbaycan Milli
Elmlər Akademiyasının institutları ilə birlikdə həyata
keçirilən elmi əməkdaşlıq, konfranslar, ATGT, Sumqayıt
Şəhər Gənclər və İdman Baş İdarəsi, Heydər Əliyev
Mərkəzi, Sumqayıt Tarix Muzeyi, Sumqayıt Şəhər Mərkəzi
Kitabxanası, Respublika Qızıl Aypara Cəmiyyətinin
Sumqayıt şöbəsi, Ədliyyə Nazirliyinin Sumqayıt Regional
İdarəsi və digər təşkilatlarla birlikdə müxtəlif
mövzularda silsilə tədbirlər keçirilib. Həmçinin Əmək
və Əhalinin Sosial Müdafiəsi Nazirliyinin, BP və digər
şirkətlərin nümayəndələri, Azərbaycan Respublikasının
Prezidenti yanında Dövlət Qulluğu Məsələləri üzrə
Komissiyanın üzvləri ilə "İş və karyera" haqqında
tələbələrin görüşləri baş tutub.
İdman nailiyyətləri
SDU-nun idman bazasına idman zalı, stadion, mini-futbol
meydançası, açıq havada idman qurğuları, trenajor zalı,
tir mövcuddur. Həmin idman bazasında futbol,
mini-futbol, basketbol, voleybol, stolüstü tennis
bölmələri fəaliyyət göstərir.
2014-cü ilin fevral ayında ənənəvi olaraq
fakültələrarası 3 növ üzrə (şahmat, dama, nərd) yarışlar
keçirilib.
Sumqayıt şəhərində Azərbaycan Respublikası Şimal regionu
üzrə voleybol çempionatı baş tutub. Həmin yarışda
Sumqayıt Dövlət Universitetinin komandası iştirak
edərək III yerə layiq görülüb.
Mart ayında Tbilisi şəhərində qaydasız döyüş üzrə Asiya
çempionatı keçirilib. Tarix fakültəsinin IV kurs
tələbəsi dünya və Avropa çempionu Orxan Seyfullayev
həmin yarışda uğurla çıxış edərək qızıl medala layiq
görülüb.
Aprel ayında futbol üzrə respublika ali
məktəblərarası çempionatda Sumqayıt Dövlət
Universitetinin yığma komandası uğurla çıxış edərək
1/4 finala yüksəlib. Nəticədə VII yerə layiq görülüb.
Tələbələr Sumqayıt şəhər çağırışaqədər yaşlı gənclərin
VMH (vətəni müdafiəyə hazıram) çoxnövçülüyü üzrə
yarışda iştirak edərək I yerin sahibi olublar.
SDU-da ümummilli lider Heydər Əliyevin anadan
olmasının 91-ci ildönümünə həsr olunmuş tələbələrarası
3 növ üzrə (şahmat, qol gücü, mini-futbol) yarışlar
keçirilib.
Ötən ilin mayında Bakı şəhərində keçirilən və ümummilli
lider Heydər Əliyevin anadan olmasının 91-ci
ildönümünə həsr olunan ali təhsil müəssisələrinin
işçiləri arasında Respublika Spartakiadasında (nərd,
şahmat, dama, stolüstü tennis, voleybol, futzal)
SDU-nun komandası 18 komanda arasında III yerin sahibi
olub.
İqtisadiyyat və idarəetmə fakültəsinin tələbəsi Röyal
Nəsirli İranda keçirilmiş qaydasız döyüş üzrə Asiya
çempionatında I yerə layiq görülüb.
Oktyabrda Dövlət Bayrağı və Konstitusiya günlərinə həsr
olunan I kurs tələbələrinin fakültələrarası futbol üzrə
yarışları keçirilib.
Noyabrda Sumqayıt şəhərində "Azərkimya" İstehsalat
Birliyinin kuboku üzrə stolüstü tennis yarışlarında
SDU-nun komandası I yeri tutub.
Noyabr, dekabr aylarında SDU-nun yığma komandası Bakı
şəhərində keçirilən mini-futbol üzrə yarışlarda iştirak
edib. Komanda öz qrupunda III yeri tutub.
Dekabr ayında fizika və elektroenergetika fakültəsinin I
kurs tələbəsi Vüsal Həsənov Bakı şəhərində cüdo üzrə
keçirilən respublika çempionatında iştirak edərək II
yerin sahibi olub.
2015-ci ilin fevralında universitetin əməkdaşları
arasında, fakültələrarası üç idman növü üzrə (dama,
şahmat, nərd) yarışlar keçirilib.
SDU ictimai-siyasi həyatda
SDU-da universitetin rəhbər heyətinin, ictimai
təşkilatların və kollektivin birgə təşəbbüsü ilə bütün
dövlət əhəmiyyətli tarixi günlər, dövlət bayramları,
anım günləri mütəşəkkil qaydada qeyd olunub, görkəmli
elm, təhsil və mədəniyyət xadimləri, teatr və musiqi
kollektivləri ilə görüşlər keçirilib, dəfələrlə tarixi
günlərə və bayramlara həsr olunan şənliklər,
ümumuniversitet iməcilikləri, qanvermə aksiyası
keçirilib, müxtəlif məqsədli səfərlər təşkil olunub.
Milli Qəhrəman Mübariz İbrahimovun, şəhid Fərid
Əhmədovun, digər şəhidlərimizin və qəhrəmanlarımızın
Fəxri xiyabandakı və Şəhidlər xiyabanındakı məzarları,
Quba məzarlığı, Sumqayıtda yerləşən Şəhidlər xiyabanı,
şəhid ailələri, uşaq evləri ziyarət olunub. Qurban
bayramında və digər mərasimlərdə aztəminatlı ailələrə və
şəhid ailələrinə, kimsəsiz və əlilliyi olan uşaqlara
maddi yardımlar edilib. Səhiyyə Nazirliyinin, Qızıl
Aypara Cəmiyyətinin Sumqayıt şöbəsinin və SDU-nun birgə
təşkilatçılığı ilə "Respublika Qan Bankı"nın
zənginləşdirilməsi məqsədi ilə kütləvi şəkildə qanvermə
aksiyası keçirilib.
Dəfələrlə respublikanın digər ali məktəblərinin və
görkəmli ziyalılarının yubiley tədbirləri, xaricdən
gələn nobelçi alimlərlə görüşlər keçirilib.
İctimai təşkilatların təşkilatçılığı ilə teatrlara,
muzeylərə, o cümlədən açıq havada Qobustan Daşlar
muzeyinə, Nəbatat bağına və Dendroloji parka və s.
yerlərə müəllim və tələbələrdən ibarət kollektiv üçün
səyahətlər və ekskursiyalar təşkil olunub. Ulu öndərin
anadan olmasının 91-ci ildönümünə həsr olunan futbol və
digər idman növləri üzrə yarışlar, müxtəlif mövzularda
inşa yazı müsabiqələri, tələbələrin əl işlərindən və
rəsm əsərlərindən ibarət sərgilər təşkil olunub, hər
dəfə qaliblər fəxri fərmanlar və pulla
mükafatlandırılıb. Məhz SDU-nun Azad Həmkarlar Təşkilatı
və Tələbə Həmkarlar Təşkilatının məqsədyönlü fəaliyyəti
sayəsində dəfələrlə müxtəlif tədbirlər ərəfəsində çoxlu
əməkdaş və tələbəyə Təhsil İşçiləri Azad Həmkarlar
İttifaqı Respublika Komitəsinin Fəxri fərmanı, pul
mükafatı və bir neçə tələbəyə isə yüksək məbləğdə
birdəfəlik təqaüdlər verilib.
Ölkənin ali məktəb tələbələri arasında keçirilən "Breyn-rinq",
"Azərbaycanı tanıyaq", "Nə? Harada? Nə zaman?" və
"Xəmsə" kimi bilik yarışlarında tələbələr yaxından
iştirak ediblər.
Yeni Azərbaycan Partiyasının (YAP) təşkilatçılığı ilə
respublikanın ali məktəb tələbələri arasında "Xalqa
sədaqətin 22 ili" mövzusunda keçirilən bilik yarışında
SDU-nun komandası I yeri, ümummilli lider Heydər
Əliyevin anadan olmasının 91 illiyi münasibəti ilə ali
məktəb tələbələri arasında bədii özfəaliyyət
kollektivlərinin baxış müsabiqəsində III yeri tutub.
SDU-nun kimya və biologiya fakültəsinin IV kurs tələbəsi
Arzu Nəbizadənin və onun tələbə dostlarının ideyası ilə
"Ritorika klubu" yaradılıb. Həmin klubun nəzdində
cəmiyyətin müxtəlif istiqamətlərdəki inkişaf yolunun
təhlili ilə bərabər, bugünkü tələbələr, ümumiyyətlə,
gənclik üçün çox maraqlı və lazımlı olacaq məsələlər
üzrə "Qladiator debatları" keçirilir, bu debatlara
tanınmış mütəxəssislər cəlb edilir.
Universitet şəhərdə fəaliyyət göstərən məktəblərin
istedadlı şagirdlərinin üzə çıxarılmasında da müəyyən
işlər görür. SDU-nun alimlərinin, xüsusən professor
Cavanşir Məmmədovun rəhbərliyi ilə fəaliyyət göstərən
"Sabahın alimləri" intellektual klubunun gənc məktəbli
üzvləri ilə işlər aparılır. Burada hazırlaşan
şagirdlərdən biri müsabiqədə layiqli yer tutaraq
Amerikaya dəvət alıb ki, onun yol xərcini də universitet
ödəyib.
SDU-da ötən il Heydər Əliyev Mərkəzi yaradılıb. Ulu
öndərin anım günü ərəfəsində mərkəzin açılışı olub.
Universitet Sumqayıt Şəhər İcra Hakimiyyətinin keçirdiyi
bütün ümumşəhər tədbirlərində də iştirak edir.
Azərbaycan Respublikasının Prezidenti yanında Bilik
Fondunun rəhbərliyi və kollektivi, "Bakı-2015" I Avropa
Oyunlarının təşkilatçıları, Dövlət Neft Şirkətinin
"Azərkimya" İstehsalat Birliyinin rəhbərliyi və
nümayəndələri ilə yaradıcı görüşlər keçirilib. |
