Javascript DHTML Drop Down Menu Powered by dhtml-menu-builder.com

ARXİV

07 Mart 2015 - №09

 

700 bal toplayan tələbələr imtahan sessiyasını hansı nəticələrlə başa vurublar?

 

Niyazi RƏHİMOV, "Azərbaycan müəllimi"
[email protected]

Böyütmək üçün seçinTələbə Qəbulu üzrə Dövlət Komissiyası tərəfindən ali təhsil müəssisələrinə keçirilən qəbul imtahanlarında ən yüksək nəticə göstərərək 700 bal toplayanlar daim qəzetimizin diqqət mərkəzindədir. İlk dəfə 2007-ci ildən başlayaraq bu uğuru əldə edən abituriyentlərin tələbəlik həyatı, ali məktəbi başa vurduqdan sonra cəmiyyətdə tutduqları mövqe və sair məsələlərlə bağlı yazılar qəzetimizdə tez-tez dərc olunur. Nəzərə çatdıraq ki,  artıq ali və orta ixtisas təhsili müəssisələrində tədris ilinin ən məsul dövrü - qış imtahan sessiyası başa çatıb. Qış imtahan sessiyasının həyəcan dolu anlarını yaşayan tələbələr bilik və bacarıqlarını nümayiş etdiriblər. Bəs, görəsən 700 bal toplayan tələbələr ilk imtahan sessiyasını necə başa vurublar? Bu suala aydınlıq gətirmək məqsədilə onlarla əlaqə saxladıq.

 Qoşqar Qədimbəyli,

"ADA" Universitetinin dövlət və beynəlxalq münasibətlər fakültəsinin I kurs  tələbəsi

Qış imtahan sessiyasını yüksək nəticələrlə başa vurdum. İngilis dilindən üç istiqamət üzrə imtahanlar verdim. Qrammatika, şifahi və yazılı şəkildə olan imtahanlarda 85-90 faizlik nəticə göstərdim. İstəyirəm ki, qəbul imtahanlarında topladığım yüksək bala görə layiq görüldüyüm Prezident təqaüdçüsü adını doğruldum. Bunun üçün universitetimizdə hər cür şərait var. Burada yüksək bilikli müəllimlər dərs deyir. Yaradılan imkanlardan maksimum istifadə etməyi düşünürəm.

 Samir Rzayev,

"ADA" Universitetinin biznes fakültəsinin I kurs tələbəsi

Universitetimizdə ali təhsilin ilk pilləsi demək olar ki, ingilis dilinə həsr olunur. Bu baxımdan imtahanlarımız da ingilis dilindən oldu. Üç istiqamət üzrə- ingilis dilinin qrammatikası, danışıq dili və yazı üzrə  imtahanlar verdim. Ümumi nəticədə maksimum 4 baldan  3.44 balla  imtahanları başa vurdum. Növbəti imtahanlarda daha  yüksək  nəticələr əldə etməyi qarşıma məqsəd qoymuşam.

 İlkin Məmmədzadə,

Azərbaycan Tibb Universitetinin müalicə-profilaktika fakültəsinin I kurs  tələbəsi

Qış semestri müddətində 6 imtahan verdim. Hər bir imtahanda qiymətləndirmədə ən yüksək nəticə olan "a" qiyməti aldım. Bu nəticəni əldə etdiyim üçün çox sevinirəm.  İnanıram ki, orta məktəbdə aldığım yüksək qiymətləri ali məktəbdə də doğruldacağam. Prezident təqaüdçüsü adımı sonuncu kursa kimi özümün yüksək biliyim və bacarığımla qorumağı qarşıma məqsəd qoymuşam.

 Nurlan Quluzadə,

"ADA" Universitetinin informasiya texnologiyaları və mühəndislik fakültəsinin I kurs tələbəsi

İmtahanlarda uğurlu nəticələr əldə etdim. Mümkün 4 baldan 3.78 nəticə göstərdim. Çalışıram ki, bizə yaradılan imkanlardan maksimum istifadə edim. Yüksək bilikli mütəxəssis olum. İmtahanlarımız elə də çətin deyil. Çünki dərslərimiz çox səmərəli keçir. Demək olar ki, mövzuları dərs müddətində öyrənə bilirik.

 Nicat Qasımov,

Azərbaycan Tibb Universitetinin müalicə-profilaktika fakültəsinin I kurs tələbəsi

Qış imtahan sessiyasını uğurla başa vurdum. 7 imtahan verdim. Hər birindən "A" qiyməti aldım. Anatomiyadan verdiyim imtahan çox çətin keçdi. Lakin çətin olmasına baxmayaraq yüksək nəticə əldə etdim. Buna görə çox sevinirəm. Universiteti ən yüksək qiymətlərlə bitirməyi planlaşdırıram. Prezident təqaüdçüsü adını layiqincə qorumağı qarşıma məqsəd qoymuşam. Bunun üçün var gücümlə çalışıram.

 Könül Qurbanlı,

"ADA" Universitetinin informasiya texnologiyaları və mühəndislik fakültəsinin I kurs tələbəsi

İngilis dilindən 3 istiqamət üzrə imtahan verdim. Ümumi 87-88 faizlik nəticə göstərdim. Universitetimizdə çox yüksək ixtisaslı müəllimlər dərs deyir. Dərslərimizi demək olar ki, elə sinifdəcə öyrənirik. İmtahanlara çox ciddi şəkildə hazırlaşdım Prezident təqaüdçüsü olmağım mənə ikiqat məsuliyyət verir. Bu baxımdan mənə göstərilən etimadı daim doğrultmağa çalışacağam.

 Fatimeyizəhra Nəbizadə,

Qafqaz Universitetinin mühəndislik fakültəsinin I kurs tələbəsi

İngilis dili üzrə 4 istiqamətdə imtahanlar verdim. Hər bir imtahanda yüksək nəticələr əldə etdim. Qış imtahan sessiyasında elə çətinlik çəkmədim. Müəllimlərimiz mövzuları bizə dərindən mənimsədir və biz demək olar ki, imtahan müddətinə qədər artıq proqramı öyrənirik. Ona görə də imtahanlarda bir o qədər də çətinliklərlə üzləşmirik. Düzdür, ilk imtahanda bir az həyəcan var idi. Lakin bunu da normal hesab edirəm.

 Eltun İbrahimov,

Bakı Ali Neft Məktəbinin proseslərin avtomatlaşdırılması mühəndisliyi fakültəsinin I kurs tələbəsi

Semestr müddətində 2 imtahan verdim. İngilis dilindən "A",   İKT ilə bağlı keçirilən imtahandan isə "b" qiyməti aldım.  İmtahanlarda bir az həyəcanlı idim. Növbəti imtahanlarda bütün qiymətlərimin "A" olması üçün var gücümlə çalışacağam. Universitetimizdə yüksək səviyyədə təhsil almaq üçün hər cür şərait mövcuddur. Bundan yararlanmağı düşünürəm.

 Məmməd Hacılı,

Qafqaz Universitetinin mühəndislik fakültəsinin I kurs tələbəsi

İmtahanları yüksək səviyyədə başa vurdum. 6 imtahan verdim və hər birindən "A" qiyməti aldım. Etimadı doğrultduğum üçün çox sevinirəm. İmtahanlara çox yüksək əhvali-ruhiyyə ilə hazırlaşırdım. Yüksək nəticələr əldə edəcəyimə inanırdım. Bu inamla imtahanlara qatıldım və şükürlər olsun ki, imtahanlardan üzüağ çıxdım.

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov