Javascript DHTML Drop Down Menu Powered by dhtml-menu-builder.com

ARXİV

07 Mart 2015 - №09

 

mtahanların bu qədər şəffaf keçəcəyini gözləmirdim"

 

Əlaçı tələbə Təhsil Nazirliyinə və universitet rəhbərliyinə minnətdarlıq edir 

Rüfanə GÜNƏŞ, "Azərbaycan müəllimi"
r
.qurbanova@muallim.edu.az
 

Ötən ilin sonlarında təhsil naziri Mikayıl Cabbarov ali təhsil müəssisələrində 2014-2015-ci tədris ilinin payız semestrinin imtahan sessiyasının təşkili və keçirilməsi barədə əmr imzaladı. Əmrdə ali məktəb rektorlarına sessiyanı mövcud qaydalara uyğun təşkil etmək tapşırıldı. 

2015-ci ildə ölkəmizdə I Avropa Oyunlarının keçirilməsi ilə əlaqədar Bakı şəhərində yerləşən ali təhsil müəssisələrində payız semestrinin imtahan sessiyası dekabrın 25-də başlayıb və yanvarın 18-də sona çatdı.

İmtahan sessiyasının necə keçirilməsi, şəffaflığın təmin olunub-olunmaması ilə bağlı məsələlərə aydınlıq gətirmək üçün ötən il Azərbaycan Dövlət İqtisad Universitetinə (ADİU) qəbul olan yeganə Prezident təqaüdçüsü Emil Alıyevlə söhbətləşdik.

Dərsdən sonra universitetin əsas korpusuna yollanırıq və oxu zalında Emillə görüşürük.

Emil Bakı şəhərində anadan olub. Ailənin kiçik övladıdır. 74 nömrəli tam orta məktəbin rus bölməsinin məzunudur. Qəbul imtahanlarında 680 bal toplayaraq ADİU-nun maliyyə fakültəsinə, yəni arzuladığı ixtisasa qəbul olub. Müsahibədən keçən Emil II semestrdən universitetdəki xüsusi istedadlar fakültəsində təhsilini davam etdirir. Qrup nümayəndəsidir. Dərsdən əlavə məşğuliyyəti idmanla məşğul olmaq, iqtisadiyyatla bağlı  kitablar oxumaq, riyazi məsələlər həll etməkdir. Hətta məktəbdə təhsil alanda magistratura səviyyəsinin məsələlərini həll edirmiş. Amma indi dərslərinin çoxluğundan əlavə məşğuliyyətlərə vaxt ayıra bilmir. Bakıda keçiriləcək I Avropa Oyunlarında könüllü kimi fəaliyyət göstərəcək. Ona ilk sualımı hazırkı durumu ilə bağlı verirəm:

- Emil, necəsən, dərslərin necə gedir, tələbə həyatına öyrəşə bilmisənmi?

- İlk vaxtlar universitet həyatına öyrəşmək çətin gəlirdi. Məktəbdə tamam fərqli ab-havadır, universitetdə tamam başqa. Prezident təqaüdçüsü, eyni zamanda qrup nümayəndəsi olmaq əlavə məsuliyyətdir Lakin universitet həyatına çox tez uyğunlaşdım. Çünki müəllimlər hər biri tələbəyə qayğıyla yanaşır.

- Semestr imtahanlarını necə verdin?

- Birinci semestrdə verdiyim 6 imtahanın hər birindən nəticəm Ala) oldu. Bir imtahandan 93, ikisindən  94, üçündən isə 97 bal topladım. Semestr imtahanlarından əvvəl kollokvium imtahanları verdik. Kollokvium imtahanları da mərkəzləşmiş qaydada, yazılı keçirilir. O imtahanlarda da heç bir problem yaşamadıq.

- İmtahan sessiyasından əvvəl tələbələr arasında hansısa formada məlumatlandırma prosesi aparıldı?

- Nəinki imtahan sessiyasından, elə oktyabr ayınının əvvəlindən, yəni kollokviumlardan qabaq birinci kursları yığıb mərkəzləşdirilmiş qayda, balların hesablanması barədə tyutorlar bizi məlumatlandırdı. Hər sualımızı cavablandırdılar, hesablanmanı lövhədə də göstərdilər ki, özümüz də balları hesablaya bilək. İmtahan sessiyasından əvvəl isə universitetdə imtahan qərargahının yaradılması, qaynar xətt xidmətinin fəaliyyət göstərməsi barədə bizə məlumat verildi. Dedilər ki, valideynlərinizin, ya da özümüzün hər hansı şikayətiniz olsa bura zəng vura bilərsiniz. İmtahan sessiyasının kameralardan izləniləcəyi də deyilmişdi.

- İqtisad Universitetinin imtahan sessiyasında yeniliklərdən biri, imtahanların canlı yayımlanması idi. Sənin valideynlərin necə, imtahanları izlədilərmi?

- Valideynlərimə bu barədə demişdim, amma izləmədilər. Çünki həmişə mənə güvəniblər. Heç məktəb vaxtı da gəlib soruşmurdular ki, dərslərim necə gedir. Yalnız valideyn iclaslarına çağırılanda məktəbə gedərdilər (gülür).

- Rektorla sessiyaqabağı görüşləriniz oldu?

- Əlbəttə oldu. Rektor Ədalət Muradov tələbələrlə tez-tez görüşür. Ümumi I kurslarla da görüş keçirdi, mənimlə də şəxsən görüşdü. Kollokvium prosesi ilə bağlı iki-üç dəfə də mənimlə görüşüb, fikirlərimi qeydə alıb. Elmi şura keçiriləcək, imtahanlar müzakirə olunacaq. Mən də iştirak edəcəyəm.

- İmtahanların sualları sizə paylanılmışdımı, suallarda çətinliyiniz olanda müəllimlər hansı köməkliyi edirdilər?

- Hər kollokvium üçün 25 sual seçilirdi, həmin suallar cavabları ilə birlikdə  universitetin rəsmi saytına yerləşdirilirdi. İmtahan suallarına gəldikdə isə kollokviumların sualları toplanılaraq  ümumilikdə 75 sualın hər biri cavabları ilə birlikdə sayta yerləşdirilirdi. Müəllimlər də suallara daha geniş cavablar tapmaq üçün tələbələrə kömək edirdilər. İmtahan suallarında nəsə anlaşılmazlıq olanda müəllimlərə yaxınlaşırdıq. Əlavə məlumat əldə etmək üçün mənbələr deyirdilər, kitablar verirdilər. Saytda cavablar var idi, amma daha yaxşı qiymət almaq üçün əlavə materiallara ehtiyac olurdu. İmtahanda qarşımıza 5 sual qoyurdular, biz onların ikisini seçib yazılı cavablandırmalıydıq. Hər imtahana bir saat vaxt verdilər, yetərli idi. İqtisad Universitetində imtahan sessiyası çox şəffaf keçdi. İmtahanların bu qədər şəffaf keçəcəyini gözləmirdim.

- Universitetə gələndən hər hansı mənfi nüanslarla qarşılaşmısanmı?

- Orta məktəbdə oxuyanda mənfi şeylər qulağıma çatırdı. Qorxurdum ki, gəlib  belə hallarla qarşılaşaram. Heç bir mənfi nüansla qarşılaşmadım. Bizim qrupdan oxuyanların hamısı imtahanlardan uğurla keçdi. Yalnız bir nəfərin imtahandan keçməyə bir balı çatmırdı. Rektor onu da tələbənin xeyrinə həll etdi və tələbənin balı artırıldı.  Mən özüm rektorla görüşdə ona təşəkkür etmişəm ki, bizə belə şərait yaradıb. Rektor həmişə bizimlə görüşəndə də təhsil sistemində olan bu yeniliklərdə təhsil naziri Mikayıl Cabbarovun böyük rolu olduğunu qeyd edir. Mən cənab nazirimizə də təşəkkür edirəm.

Emilə vaxt ayırdığı üçün təşəkkür, təhsil həyatında uğur arzu edirəm. Elmi şuranın iclası yaxınlaşdığı üçün son sualımı da ünvanlayıb, müsahibimlə sağollaşıram.

- Gələcək planların nədir?

Əvvəllər bakalavr təhsilimi də xaricdə davam etdirmək istəyirdim, amma buradakı tədris prosesini gördükdən sonra fikrimi dəyişdim. Çünki buradakı təhsil xaricdəki təhsillə eynidir. Çox savadlı müəllimlərimiz var. Təkcə nəzəri yox, təcrübi tədris də çox güclüdür. Yəqin ki, magistr təhsilimi xaricdə alacağam.  

Foto Rəşad RAMAZANOĞLU

 
 
 
Səhifənin başına qalx "Müsahibələr" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov