Javascript DHTML Drop Down Menu Powered by dhtml-menu-builder.com

ARXİV

07 Mart 2015 - №09

 

Məktəblilər arasında daha bir müsabiqə başa çatıb

 

Böyütmək üçün seçinArtıq üçüncü ildir ki, məktəblilər arasında Google SketchUp qrafik redaktorunda ən yaxşı üçölçülü model hazırlamaq üzrə müsabiqə keçirilir. 2011-ci ildə 7-ci sinif  "İnformatika" dərsliyinə daxil edilən Google SketchUp proqramı şagirdlərin çox böyük həvəslə işlədikləri tətbiqi proqramlardandır. Google SketchUp proqramı obyektlərin üçölçülü modellərini yaratmaq üçün nəzərdə tutulan müasir proqramlardandır. Autodesk Maya, 3D Max, AutoCAD kimi mükəmməl və mürəkkəb proqramlarda işləmək üçün Google SketchUp proqramı çox uğurlu başlanğıcdır. 

Bu  proqramda iş vərdişlərinin formalaşdırılması informatikanın riyaziyyat, təsviri incəsənət, həyat bilgisi və texnologiya fənləri ilə inteqrasiyasını təmin edir. Şagirdlərin analoji tətbiqi proqramlara artan maraqlarını, məktəblilərin və informatika müəllimlərinin çoxsaylı müraciətlərini nəzərə alaraq, dərslik müəllifləri Təhsil Nazirliyinin İnformatika üzrə olimpiadalara hazırlıq mərkəzinin və "Bakı"  nəşriyyatının dəstəyi  ilə 28.02.2015-ci il  tarixində Google SketchUp proqramında  ən  yaxşı  üçölçülü  modellərin yaradılması üzrə növbəti respublika müsabiqəsini keçirdilər. Müsabiqənin keçirilməsi barədə məlumat  və onun şərtləri bir ay əvvəldən informatik.az saytında və Facebook sosial şəbəkəsinin "İnformatika müəllimləri" qrupunda verilmişdi. Böyütmək üçün seçin

Builki müsabiqə əvvəlki illərdən bir neçə mühüm cəhətlərinə görə fərqlənirdi. Əvvəla, müsabiqə ümumrespublika səviyyəsində keçirilirdi. Müsabiqədə respublikamızın müxtəlif bölgələrindən 168 şagird iştirak edirdi. Digər mühüm bir yenilik isə iştirakçıların onlayn qeydiyyatdan keçmələri oldu. Hər bir məktəbdən bir şagird olmaqla məktəb informatika müəllimləri informatik.az saytında və Facebook sosial şəbəkəsinin "İnformatika müəllimləri" qrupunda verilmiş xüsusi formanı doldurmaqla iştirak edəcək şagirdləri qeydiyyata salmışdılar. 7 və 8-ci sinif şagirdləri arasında keçirilməsi nəzərdə tutulan müsabiqədə Lahıc kənd tam orta məktəbinin 4-cü sinif şagirdi Lalə Əliyevanın da iştirakı bütün münsiflər heyəti üçün əsl sürpriz oldu. Müsabiqənin ən gənc iştirakçısının bu cəsarəti onun böyük gələcəyindən xəbər verir.

Müsabiqənin yerlərdə keçirilməsini təmin etmək məqsədilə bölgələrdə müvafiq mərkəzlər yaradılmışdı. Ətraf rayon məktəblərinin şagirdləri bu mərkəzlərə toplaşmışdılar. Mərkəz olaraq Bakı, Gəncə, Göyçay, Qax, Salyan, İsmayıllı, Şamaxı, Göygöl, Mingəçevir, Şirvan, Balakən, Ağcabədi şəhərləri seçilmişdi.Böyütmək üçün seçin

Şərtlərə görə hər bir mərkəz rəhbəri müsabiqədən ən geci yarım saat əvvəl Bakı şəhərindəki mərkəzlə Skype bağlantı yaratmalı, Ramin Mahmudzadənin rəhbərlik etdiyi münsiflər heyətinə iştirakçıların sayı, texniki təchizat və digər məsələlərlə bağlı məlumat verməli idi.

Şagirdlərə veriləcək tapşırıq müsabiqə günü bir neçə variant arasından püşkatma ilə müəyyən olunmalı idi. Münsiflər heyətinin və Təhsil Nazirliyinin məsul şəxslərinin də iştirak etdikləri püşkatma nəticəsində üçölçülü modeli hazırlanacaq obyekt olaraq Azərbaycan Respublikası Ali Məhkəməsinin binası müəyyən olundu. Şagirdlər 1,5 saat ərzində bu obyektin modelini hazırlamalı idilər. Bakı və bölgələrdə müsabiqəyə eyni vaxtda - 10.40-da start verildi.

Müsabiqənin bütün respublikada mütəşəkkil keçirilməsində mərkəz rəhbərlərinin yüksək təşkilatçılıq bacarıqlarını xüsusi qeyd etmək lazımdır. Bölgələr üzrə ən qabaqcıl müəllimlərdən seçilmiş mərkəz rəhbərləri şagirdləri vaxtında qeydiyyatdan keçirmişdilər. Onlar tapşırığın verilməsinə tam hazır vəziyyətdə gözləyirdilər. 10.30-da tapşırıq müəyyən olunan kimi dərhal bu barədə bölgə mərkəzlərinə məlumat və obyektin müxtəlif rakurslardan fotoşəkilləri ötürüldü. Seçilmiş obyektin fotoşəkilləri bütün bölgələrə eyni vaxtda onlayn ötürülmüşdü. Mərkəz rəhbərləri tərəfindən şəkillər qəbul edilib proyektor və elektron lövhələr vasitəsilə şagirdlərə nümayiş etdirildi. Müsabiqə davam etdiyi 1,5 saat ərzində obyektin görüntüləri  şagirdlərin daim gözləri qarşısında idi.

Böyütmək üçün seçinMüsabiqənin ilk dəqiqələrindən şagirdlərin çox hazırlıqlı və həvəsli olduqları görünürdü. Azərbaycan Respublikası Ali Məhkəməsinin binası memarlıq baxımından mürəkkəbliyi ilə seçilsə də, şagirdlər onun üçölçülü modelinin yaradılmasında heç də çətinlik çəkmirdilər. Vaxt keçdikcə şagirdlərin binanın sütunlarını, pəncərə və xırda detallarını necə məharətlə yaratdıqları hamını heyrətə gətirirdi. Klassisizm üslubunda yaradılmış bu memarlıq əsəri son dövrlərdə respublikamızda inşa edilən çox gözəl sənət əsərləri arasında özünün orijinallığı ilə seçilir.

Gəncə, İsmayıllı, Şirvan, Abşeron və Salyan rayon təhsil şöbələrinin yaxından köməkliyi və mərkəz rəhbərlərinin peşəkarlıqları sayəsində uyğun mərkəzlərdə iş yüksək səviyyədə təşkil edilmişdi. İsmayıllı şəhərində şagirdlər İsmayıllı şəhər muzeyinin binasına yığışmışdılar. Bu mərkəzdə İsmayıllı rayonunun şagirdləri ilə yanaşı, Siyəzən və Ağsu rayonlarının şagirdləri də daxil olmaqla 41 nəfər iştirak edirdi.

Göyçay, Qax, Şamaxı, Göygöl, Mingəçevir, Balakən şəhərlərində, eləcə də Ağcabədi rayonu Hindarx qəsəbəsində yerləşən mərkəzlərin işi müsabiqənin təşkilatçıları tərəfindən yüksək qiymətləndirildi, mərkəz rəhbərlərinə əsl müəllim fədakarlığı və peşə sədaqəti nümayiş etdirdiklərinə görə minnətdarlıq bildirildi.

Bakı şəhəri üzrə mərkəz 283 nömrəli tam orta məktəbdə yerləşmişdi. Bura Bakı, Sumqayıt, Xızı şəhərləri, eləcə də Qubadlı, Abşeron rayonlarından 53 şagird iştirak edirdi.

 Münsiflər heyətinin böyük sevincinə səbəb olan faktlardan biri də o oldu ki, müasir tətbiqi proqramlardan hesab edilən Google SketchUp proqramında respublikamızın bölgələrindən olan şagirdlərin iş səviyyələri heç də şəhər məktəblərində təhsil alan şagirdlərin səviyyəsindən geri qalmırdı. Bu isə informatika fənninin bütün respublikada tədrisinin keyfiyyətinin ilbəil artdığını sübut edir.

Böyütmək üçün seçinMüsabiqədə iştirak edən şagird işlərinin obyektiv qiymətləndirilməsi məqsədilə münsiflər heyəti bütün işləri kodlaşdırmaq qərarına gəldilər. 163 iş münsiflər heyətinin hər bir üzvü tərəfindən ayrıca qiymətləndirilir. Sonda reytinq cədvəli qurularaq nəticələr müqayisə və təhlil olunaraq qaliblər müəyyən ediləcəkdir. Hər bir iştirakçının işinə diqqətlə baxılması vaxt tələb etdiyindən qərara alındı ki, müsabiqənin nəticələri 15 gün ərzində elan edilsin.

 

"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov