|
Martın 12-də Azərbaycan Dövlət Pedaqoji Universitetinin
(ADPU) tarix fakültəsinin və Bakı şəhəri Məmməd Rahim
adına 7 nömrəli tam orta məktəbin birgə təşkilatçılığı
ilə universitetdə "Ulu öndər Heydər Əliyev və
milli-mənəvi dəyərlərimiz" mövzusunda tədbir
keçirilib. Tədbir iştirakçıları əvvəlcə ulu öndər
Heydər Əliyevin ADPU-dakı abidəsi önünə gül dəstələri
qoyublar. Sonra tədbir universitetin böyük zalında davam
etdirilib.
ADPU-nun tərbiyə işləri üzrə prorektoru, professor Rafiq
Baxşəliyev tədbiri giriş sözü ilə açaraq bildirib ki,
ümummilli lider Heydər Əliyev həmişə xalqımızın
ictimai-siyasi və mədəni-mənəvi həyatının yüksəlişinə
xüsusi diqqət yetirirdi. Milli düşüncənin inkişafında
dilin əvəzolunmaz vasitə olduğunu yaxşı bilən Heydər
Əliyev Azərbaycan dilinin dövlət dili statusu almasına
daim səy göstərmişdir. 1978-ci ildə məhz ulu öndərin
qətiyyət və fədakarlığı sayəsində Azərbaycan dili dövlət
dili kimi Konstitusiyaya salınmışdı. Eyni zamanda ulu
öndər Heydər Əliyev Azərbaycanda yenidən hakimiyyətə
qayıtdıqdan sonra xalqımızın bir çox adət-ənənələri,
bayramları bərpa edildi. Xalqımızın əziz milli bayramı
olan Novruz ulu öndər Heydər Əliyevin təşəbbüsü ilə
1997-ci ildən ölkəmizdə rəsmi qaydada qeyd edilməyə
başladı. Qeyd edilib ki, ulu öndər Heydər Əliyev
paytaxtda Novruz bayramı münasibətilə keçirilən xalq
şənliklərində iştirak edir, sadə vətəndaşların bayram
əhvali-ruhiyyəsini, sevincini bölüşürdü.
Ulu öndər Heydər Əliyevin müdrik dövlətçilik kursunun
layiqli davamçısı, Azərbaycan Respublikasının Prezidenti
İlham Əliyevin milli-mənəvi dəyərlərimizə, o cümlədən
Novruz bayramına olan qayğıkeş münasibəti bu gün eyni
ənənəni yaşadır.
Tədbirdə Məmməd Rahim adına 7 nömrəli tam orta məktəbin
direktoru Könül Həsənova çıxış edib.
Sonra ulu öndər Heydər Əliyev haqqında slayd nümayiş
etdirilib. Məktəblilər onun haqqında şeirlər söyləyib,
"Yallı" rəqsini ifa ediblər. Novruz bayramının
personajları olan Kosa, Keçəl və Bahar qızının ifa
etdikləri səhnəcik, ADPU-nun tələbə-gənclərinin
oxuduqları mahnılar, "Cahan" qrupu və muğam ustalarının
çıxışları tədbir iştirakçıları tərəfindən maraqla
qarşılanıb.
Mətbuat və informasiya şöbəsi |
