|
Festivalda şəxsən iştirak edən ABŞ prezidenti Barak
Obama çıxışında azərbaycanlı şagirdlərin işini xüsusi
vurğulayıb, onlara təşəkkür məktubu göndərib
Samirə KƏRİMOVA,
"Azərbaycan müəllimi"
s.kerimova@ muallim.edu.az
 Son
günlərin ən çox danışılan hadisəsi Avropa Azərbaycan
Məktəbinin şagirdləri Tural Abdullanın və Fidan
Abdullanın Amerikaya göndərdikləri filmin həmin ölkənin
birinci şəxsi tərəfindən maraqla qarşılanması ilə
bağlıdır. Belə ki, martın sonunda ABŞ-da Ağ evdə təşkil
olunan şagirdlərin II film festivalında azərbaycanlı
şagirdlər prezident Barak Obamanın diqqətini özlərinə
çəkməyi, onu öz istedadları ilə heyrətləndirməyi
bacarıblar. Amerikanın müxtəlif ştatları ilə yanaşı
dünyanın bir çox ölkələrinin məktəblilərinin də
qoşulduğu "Cəmiyyətə qulluq və yardım" devizi altında
keçirilən II film festivalında ilk dəfə olaraq
Azərbaycandan bu iki məktəbli qatılıb. Təqdim
etdikləri qısametrajlı filmlə uğur qazanan
məktəblilərimiz festivalın təşkilatçıları tərəfindən
xüsusi fərmanla təltif edilib və prezident Barak Obama
onlara təşəkkür məktubu göndərib.
Festivalda şəxsən iştirak edən ABŞ prezidenti çıxışında
azərbaycanlı məktəblilərin işini xüsusi vurğulayaraq
bunları söyləyib: "Burada Azərbaycandan olan şagirdlər
də var. Onların filmini seyr etdik. Çox maraqlı idi.
Baxmayaraq ki, bu uşaqların yaşı azdır, amma ərsəyə
gətirdikləri iş onların bacarıqlı olduqlarını göstərdi".
Ölkəmizi layiqincə təmsil etmiş balaca qəhrəmanlarımızla
biz də görüşdük və onların bu filmi necə araya-ərsəyə
gətirmələrini öz dillərindən eşitmək istədik.
Avropa Azərbaycan Məktəbinin 3-cü sinfində oxuyan Tural
Abdulla festivala göndərdiyi filmi 2-ci sinifdə təhsil
alan bacısı Fidanla birlikdə hazırlayıb. Tural özü bu
haqda deyir: "Dərs ilinin əvvəlində məktəbin dram
klubunda bizə ingiliscə qısametrajlı film hazırlamaq
tapşırıldı. Hər bir şagird bir mövzu seçdi. Mən belə
qərara gəldim ki, Amerika prezidenti Barak Obamanın
məşhur "Yes we can"("Bəli, biz bunu bacarırıq") çıxışını
səhnələşdirim. Bu çıxışı Barak Obama seçkilərdə qələbə
qazandığı zaman kütlə qarşısında söyləmişdi. Həmin
çıxışın mahiyyəti belədir ki, qarşısına məqsəd qoyan və
israrla çalışan hər bir kəs əvvəl-axır öz istəyinə
çatır. Müəllimlərimin köməyi ilə həmin çıxışı qısaldıb
səhnələşdirdik və məktəbdə keçirilən Yeni il şənliyində
tamaşaya qoyduq. Həmin ərəfədə valideynlərimdən öyrəndim
ki, Amerikada məktəblilərin qısametrajlı film festivalı
keçiriləcək. Bacımla birlikdə həmin səhnəni telefona
çəkərək valideynlərimin köməyi ilə festivala təqdim
etdim. Film vasitəsi ilə ölkəmizi Amerika
məktəblilərinə tanıtmaq və Azərbaycanda yüksək təhsilə
və istedada malik şagirdlərin olduğunu göstərmək
istəyirdim.
Sözün düzü, inanmırdıq ki, bu film ABŞ prezidenti Barak
Obamanın xoşuna gələcək. Amma o, bizə hələ təşəkkür
məktubu da göndərdi. Bu mənə ilk dəfə deyilən zaman
həyəcanlandım. Elə bildim, atam mənimlə zarafat edir.
Amma sonra bildim ki, doğrudan da ABŞ prezidenti
filmimizi bəyənib və xüsusi fərmana layiq görülmüşük,
bizə təşəkkür məktubu yazıb".
Avropa Azərbaycan Məktəbinin 2-ci sinfində təhsil alan
Fidan Abdulla isə bu səhnəcikdə "Firs lady" (ABŞ-ın
birinci ledisinin) obrazını canlandırıb. Fidan: "Bu
tamaşanı hazırlayan zaman qardaşım Turala kömək edirdim.
Sonra həmin çıxışın videosuna bir neçə dəfə baxdıq və
qərara gəldik ki, Turalla onu telefona çəkək. Düzü, mən
də qardaşım kimi inanmırdım ki, filmimiz Barak Obamanın
xoşuna gələr".
Foto Rəşad RAMAZANOĞLU |
