|
Niderland Krallığının Eyndhoven Texnologiyalar
Universitetinin tələbəsi Emin Ələsgərov ilə söhbət
Oruc MUSTAFAYEV,
"Azərbaycan müəllimi"
[email protected]
 Emin
Elmar oğlu Ələsgərov 1991-ci il fevralın 12-də Bakı
şəhərində anadan olub. "Dədə Qorqud" Özəl Türk
Liseyini bitirib. Ali məktəblərə qəbul imtahanlarında I
qrup üzrə 591 bal toplayaraq Bakı Dövlət
Universitetinin informatika ixtisasına qəbul olunub.
Bir il bu universitetdə təhsil aldıqdan sonra
"2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı" çərçivəsində
Cənubi Koreyanın Yüksək Elm və Texnologiyalar
Universiteti (KAİST) üçün keçirilən müsabiqəyə qatılıb
və seçilmiş 9 namizəd arasında yer alıb. 2009-2014-cü
illər ərzində həmin universitetdə kompüter elmləri üzrə
bakalavr təhsilini müvəffəqiyyətlə başa vurub. Hazırda
Dövlət Proqramı çərçivəsində Niderland Krallığının
Eyndhoven Texnologiyalar Universitetində kompüter
elmləri ixtisası üzrə magistr təhsili alır.
E.Ələsgərovla söhbətimizə orta məktəb illərindən
başladıq.
"Gələcəyimi
bu sahədə görürdüm"
Orta təhsilimi əla qiymətlərlə bitirmişəm. Mənim üçün
bu prinsipial əhəmiyyət daşıyırdı. Bir sıra fənlər üzrə
tərifnamələrlə təltif edilmişəm. Riyaziyyat, fizika və
tarix fənlərini digər fənlərə nisbətən daha çox
oxuyardım. İxtisas seçimi mənim üçün çətin deyildi,
çünki gələcəyimi informasiya texnologiyaları sahəsində
görürdüm və mənə bu seçimdə valideynlərim çox böyük bir
dəstək olub.
İxtisas seçimi zamanı Cənubi Koreyanın İKT sahəsində
son illər ərzində əldə etdikləri nailiyyətlər və bu
ölkədə həmin sahəyə olan maraq mənim üçün həlledici amil
oldu. Dövlət Proqramı çərçivəsində bu ölkənin İT
sahəsində bir nömrəli sayılan KAİST Universitetinə
müsabiqə elan olunanda bunu gözəl bir şans olaraq qəbul
etdim və fürsəti qaçırmadım. Ailəm elmə olan sevgimi
daima dəstəkləyib və mənim xaricdə təhsilimi davam
etməyimi çox gözəl qarşılamışdı.
 Niderland
Krallığının Eyndhoven Texnologiyalar Universitetində
magistr təhsilimi davam etdirməyi, kompüter elmləri
sahəsinin müəyyən aspektləri üzərində tamamilə
profilləşmək imkanı kimi görürəm və bir daha mənə
yaradılmış bu fürsətə görə dövlətimə böyük təşəkkürümü
bildirirəm.
Dövlət
Proqramına müraciətim çox operativ və rahat keçdi
Magistr pilləsi üçün Dövlət Proqramına müraciətim
2014-cü ilin iyun ayında baş tutdu. Əvvəlki illərə
nisbətən sənəd qəbulu artıq internet üzrə aparılırdı,
biz namizədlər, sadəcə tələb olunan sənədləri düzgün
şəkildə tərtib edib vaxtında Proqram üçün yaradılmış
internet səhifəsinə göndərməliydik. Göndərdiyim sənədlər
qısa müddət ərzində Təhsil Nazirliyinin müvafiq şöbəsi
tərəfindən nəzərdən keçirildi və növbəti, müsahibə
mərhələsinə dəvət aldım. Müsahibə zamanı bir sıra
psixoloji və texniki suallar aldım. Hər birinə dəqiq və
hərtərəfli cavab verməyə müvəffəq oldum. Müsahibədən
sonra 3 saat ərzində Dövlət Proqramına qəbul
olunduğumu internet səhifəsindən öyrəndim.
Seçim prosesi şəffafdır və mən əminliklə söyləyə bilərəm
ki, layiq olan namizəd mütləq öz şansını əldə edəcək.
Dövlət Proqramına müraciətim şəxsən mənim üçün çox
operativ və rahat keçdi.
Cənubu Koreyadan Niderland Krallığına
Özümü çox şanslı tələbələrdən hesab edirəm. Çünki
bakalavr təhsilimi Cənubi Koreyanın İKT sahəsində ən
güclü universitetində almışdım və hazırda Niderland
Krallığının həmin sahə üzrə iki ən güclü
universitetindən biri sayılan Eyndhoven Texnologiyalar
Universitetində təhsilimi davam etdirirəm.
Eyndhoven Texnologiyalar Universitetini seçəndə bir sıra
amillərə fikir vermişdim. İlk növbədə, kompüter elmləri
ixtisasında tədris olunan dərslər, universitetin İKT
sahəsi üzrə dünyada reytinqi və professor heyəti, tələbə
şəhərciyi və mövcud olan elmi-tədqiqat bazası. Eyni
zamanda qeyd etmək istərdim ki, bu universitet dünyanın
7 ən innovasiyalı regionlarından biri sayılan "Brainport"
ərazisində yerləşir və təhsil alan tələbələr üçün həmin
regionda fəaliyyət göstərən bir sıra dünya səviyyəli
şirkətlərdə geniş imkanlar yaradır.
Xaricdə təhsil alırsansa, aktiv tələbə həyatına hazır
olmalısan. Ölkədəki həyat tərzi səni bir çox məsələləri
paralel görməyə məcbur edir, ona görə gündəlik, həftəlik
qurduğum cədvəllər mənim işimi daha rahat edir. Semestr
boyunca, vaxtımın əsas hissəsini ev tapşırıqlarına,
proyektlərə sərf edirəm. Həftənin müəyyən günlərində
idmanla məşğul oluram, xarici tələbələrlə müxtəlif
mövzularda fəal tədbirlər keçiririk. Tətil zamanı
Avropanın görmək istədiyim tanınmış şəhərlərini gəzirəm.
Eyndhoven əsl tələbə şəhəridir. Elmi-tədqiqat və sənaye
müəssisələrinin sayı kifayət qədər çoxdur. Türkdilli
icma burada böyük bir sayda təmsil olunur, ona görə bizə
doğma sayılan bir çox ərzaq, sursat asanlıqla tapıla
bilər.
"Bolonya prosesi Avropada özünü doğruldub"
Bolonya prosesi Avropada özünü kifayət qədər doğruldub.
Tələbənin obyektiv qiymətləndirilməsi burada prioritet
məsələ hesab olunur və Bolonya sistemi buna tam şərait
yaradır. Digər tərəfdən, Avropa təhsil mərkəzləri bu
sistemə intellektual, mədəni, sosial və elmi-texniki
potensialın formalaşması və möhkəmlənməsi kimi baxırlar.
Məzunların işlə təmin olunması bu sistemin əsas
məqsədlərindən biridir və ali təhsili başa vurduqdan
sonra bir çox proqramlar qısa müddət ərzində iş tapmağa
imkan verir.
Xaricdə təhsilin əsas üstünlüyü bir insanın bir
şəxsiyyət olaraq hərtərəfli özünü inkişaf etdirə
bilmək imkanıdır. Xarici tələbələrlə daima münasibətdə
olmaq, ünsiyyət qurmaq bizə bir çox məsələlərə fərqli
bucaq altında baxmağı öyrədir. Onlar ilə apardığın
diskussiyalar, debatlar səndə müəyyən fikirlər və
özünəməxsus prinsiplər formalaşdırır.
Mühazirələrə
qatılmaq məcburi deyil
Tədris mühiti kifayət qədər sərbəstdir. Burada heç kəs
sənin arxanca qaçmayacaq və oxumağa məcbur etməyəcək.
Əgər burdasansa, demək bu təhsil müəssisəsindən nə
istədiyini dəqiq bilməlisən. Mühazirələrə qatılmaq
məcburi deyil, amma qaçırdığın hər bir mühazirə tədris
olunan mövzunu anlamağı daha da çətinləşdirir. Bu,
magistr pilləsində özünü daha qabarıq şəkildə büruzə
verir. Mühazirə materialları, hər bir fənn üçün ayrıca
açılmış və universitetin ümumi portal sisteminin bir
parçası olan internet səhifələrdə yerləşdirilir və
asanlıqla əldə oluna bilər. Eyndhoven Texnologiyalar
Universitetində tədris ili 4 rübə bölünüb və hər bir rüb
2 aydan ibarətdir. Hər rübün sonunda imtahan sessiyası
təşkil olunur və rüb boyunca tədris olunan fənlərə
beləcə yekun vurulur. Elə fənlər də var ki, onlardan
aldığın qiymət yalnız rüb boyunca yerinə yetirdiyin ev
tapşırıqlarının, qrup proyektlərinin ortaq qiymətinə
əsaslanır.
Prosesə nəzarət üçün fənni tədris edən bir nəfər
müəllim və 2-3 digər ixtisaslı professor heyəti dəvət
olunur. İmtahan keçirilən otaqlar adətən kamera və
mikrafon ilə təchiz olunur və kimdənsə yardım almaq,
köçürtmək kimi məsələlər ciddi nəzarətdə saxlanılır və
araşdırılır. Plagiatizm Avropada heç bir şəkildə qəbul
olunmur. Universitetimizdə tələbələrin tədqiqatçılıq
fəaliyyətinə cəlb olunması yüksək səviyyədədir. Qeyd
edim ki, tələbələrin elmi tədqiqat işlərinə cəlb
olunmasına görə Eyndhoven Texnologiyalar Universiteti
ölkənin tədris mərkəzlərinin reytinqində top mövqedə
qərarlaşıb. Bir çox halda tələbələr tərəfindən yazılan
tezis və dissertasiyalar müəyyən tədqiqat mərkəzlərinin
birində apardıqları elmi işlərə söykənir. Universitetin
kampus ərazisində bir sıra laboratoriyalar tələbələrin
ixtiyarına verilib. Eyni zamanda, "Philis Research", "Philips
Healthcare", "ASML Research" və s. kimi tədqiqat
mərkəzləri bizim universitet ilə çox gözəl
münasibətdədir və tələbələr üçün bir sıra imkanlar
yaradır.
"Ölkəmizi hərtərəfli təmsil etməyə çalışıram"
Azərbaycan gənci dünyanın hansı ölkəsində olur-olsun,
diasporamızın fəaliyyətində, ölkəmizlə bağlı
həqiqətlərin beynəlxalq birliyə çatdırılmasında,
təbliğində fəal olmalıdır. Müsahibimiz istər Koreyada,
istərsə də Niderland Krallığında bu sahədə aktiv
fəaliyyət göstərən tələbələrimizdəndir.
Azərbaycan diasporası ilə əlaqələrim hər zaman gözəl
olub. Cənubi Koreyada oxuduğum müddət ərzində, "BUTA"
tələbə təşkilatında iki il ərzində idarə heyətinin
üzvü, daha sonra bir il sədr müavini vəzifəsində
çalışdım və bu müddət ərzində Cənubi Koreyadakı
Azərbaycan səfirliyinin dəstəyi ilə keçirilmiş
tədbirlərdə, ölkəmizin zəngin tarixi və mədəniyyəti
haqqında yerli ictimaiyyətə hərtərəfli məlumat
çatdırmışdıq. Bundan əlavə, oxuduğum hər iki
universitetdə keçirilən bütün mədəniyyət, elmi festival
və sərgilərə qatılıb ölkəmizi hərtərəfli təmsil etməyə
çalışmışam. Mənimlə bərabər bu işlərdə çalışan və
əlindən gələni əsirgəməyən sadə və gözəl azərbaycanlı
tələbə yoldaşlarıma öz dərin təşəkkürümü bildirirəm.
Təhsildə uğur və gələcək planlar barədə
İlk növbədə qarşıya dəqiq və real məqsəd qoymaq
vacibdir. Bu məqsədə çatmaq üçün bütün resursları
araşdırmaq və məqsədə doğru aparan yolda qarşına
çıxacaq əngəllərdən qorxmamaq, eyni zamanda çoxlu sual
vermək və aldığın cavabları analiz edib alternativ
variantlar ilə müqayisə etmək gərəkdir. Amma hər şeydən
öncə, tələbə oxuduğu sahədən və fənlərdən zövq
almalıdır, əks halda, heç bir motivasiyadan söhbət gedə
bilməz.
Magistr pilləsini əla qiymətlər ilə bitirmək üçün
çalışıram. Məzun olduqdan sonra Azərbaycana qayıdıb,
əldə etdiyim nəzəri bilikləri real sənaye mühitində
praktiki nəticələrə çevirmək istərdim. Hər iki xarici
ölkədə əldə etdiyim bilikləri və təcrübəni Azərbaycanda
təhsil alan tələbələr ilə bölüşməyi özümə bir növ borc
bilirəm, bunun üçün tədris müəssisələrində dərs deməyi
də planlaşdırıram. İxtisasım üzrə maraqlı və
innovasiyalı mövzu üzrə müdafiə işi yazıb PhD dərəcəsini
qazanmaq gələcəkdə qarşıma qoyduğum əsas məqsədlərdən
biridir. |
