"Dünya Müəllimi Mükafatı"nın sahibi
Amerikalı
Nensi Etvell 1 milyon dollar qazandı
Amerikalı müəllim Nensi Etvell "Dünya Müəllimi
Mükafatı"nın (Global Teacher Prize) sahibi oldu.
Dünyanın 50 ən yaxşı müəllimi arasından seçilən
N.Etvell 1 milyon dollar qazanıb. Amerikalı
müəllimin əldə etdiyi uğurdan danışanda ilk
növbədə diqqəti cəlb edən məqam odur ki, o,
şagirdlərinə mütaliəni çox yüksək səviyyədə
sevdirməyi bacarıb. N.Etvell Amerikada
müəllimlər arasında kifayət qədər yaxşı
tanınır. O, məktəbdə ədəbiyyatın vorkşop
formasında oxu və yazı üzrə tədrisini təklif
edib. Onun VIII sinfində oxuyan şagirdləri il
ərzində 40 kitab oxuyur ki, bu da ölkə üzrə orta
göstəricidən xeyli artıqdır. Bundan əlavə,
Nensi özünün pedaqoji metodlarına dair bir neçə
kitab dərc etdirib. Bir sıra nüfuzlu mükafatlar
qazanan müəllim öz məktəbini təsis edib ki,
buradakı hər sinifdə kitabxana yaradılıb. Nensi
Etvell jurnalistlərə ilk açıqlamasında
qazandığı 1 milyon dollar mükafatı rəhbəri
olduğu məktəbin inkişafına xərcləyəcəyini
bildirib.
Qeyd edək ki, ABŞ-ın sabiq prezidenti Bill
Klintonun fəxri rəhbəri olduğu "Varkey GEMS"
Fondu tərəfindən təsis olunmuş "Dünya Müəllimi
Mükafatı" və ya dünya təhsil ictimaiyyətində
"məktəb müəllimləri üçün Nobel mükafatı" kimi
qiymətləndirilən müsabiqənin ilkin mərhələsində
dünyanın 150-dən artıq ölkəsindən 5000 müəllim
iştirak edib. Mükafat müəllim nüfuzunun qlobal
miqyasda yüksəldilməsinə xidmət edir.
|
|
İngiltərəli təqaüdçünün yeni məşğuliyyəti
71
yaşlı qoca onlayn-kurslarda 100 min dollar
qazanıb
Böyük Britaniyalı təqaüdçü Len Smit internet
texnologiyaları sahəsində yaşıdları qarşısında
tam öyünə bilər. 71 yaşlı qoca kompüteri
öyrənməyin artıq gec olduğunu düşünən bir sıra
baba və nənələrdən fərqli olaraq bu sahədə
xüsusi uğurlar əldə edib. Üç il əvvəl evdə boş
oturmağın mənasız olmasına qərar verən L.Smit
onlayn-müəllim kimi pul qazanmağa başlayıb.
Onun işi kompüter şirkətləri üçün reklam
mətnləri yazmaqdır. Bu cür materialların təşkil
olunması prinsiplərinə həsr etdiyi
bukletlərdən biri "Udemy" platforması
əməkdaşlarının diqqətini cəlb edib. Şirkət
qocaya bu sahədə onlayn-kurslar təşkil etməyi
məsləhət görüb. İnternetdə bir aylıq tədris
gedişində L.Smit 863 dollar qazanıb.
Məşğuliyyətindən razı qalan və ilk gəlirlərindən
həvəsə gələn təqaüdçü artıq 10-a yaxın kurs
təşkil edib. Onun illik gəliri isə artıq 100 min
dolları aşıb. L.Smitin onlayn-kurslarına maraq
göstərən tələbələrin sayı 40 mini keçib. Artıq
yaşı 55 -dən artıq olan 2200 müəllim L.Smitin
hazırladığı kurslardan istifadə edir.
|
|
Finlandiya ənənəvi fənlərdən imtina edir
Ölkənin
təhsil sistemində köklü dəyişikliklər
gözlənilir
Dünyanın ən yaxşı təhsil sisteminə malik olan
Finlandiyanın məktəb təhsilində köklü
dəyişikliklər gözlənilir. Bundan sonra fin
məktəblərində ədəbiyyat, fizika, riyaziyyat,
tarix və ya coğrafiya ayrıca fənn kimi
tədris olunmayacaq. Əvəzində müxtəlif fənlərin
elementlərini özündə eyni vaxtda cəmləşdirən
və ətraf mühitin dəyişikliklərini hərtərəfli
qiymətləndirməyə və onlara fenomen kimi baxmağa
imkan verən kompleks fənn tədris olunacaq.
Artıq paytaxt Helsinki şəhərində 16 yaşlı
şagirdlərin dərslik cədvəlindən ənənəvi fənlər
çıxarılıb. 2020-ci ilə kimi ölkənin bütün
məktəblərində bu cür sistemin tətbiqi nəzərdə
tutulub.
Finlandiyanın Təhsil Nazirliyində qeyd edirlər
ki, təhsil sistemində gözlənilən radikal
islahatlar müasir dünyada baş verən qlobal
dəyişikliklərlə bağlıdır. Artıq uşaqları köhnə
metodlarla öyrətmək mümkün deyil. Qeyd olunur
ki, innovativ təhsil sisteminin başlıca məqsədi
"Bunu bilmək mənə niyə lazımdır" və "Nəyə görə
mən bunu öyrənirəm" kimi suallardan xilas
olmaqdır. |
|
Qazaxıstan təhsilində yenilik
Yuxarı siniflərdə bütün fənlər ingilis dilində
tədris oluna bilər
Qazaxıstan prezidenti Nursultan Nazarbayev
ölkənin ümumtəhsil məktəblərinin yuxarı
siniflərində dərslərin ingilis dilində tədris
olunması təşəbbüsü ilə çıxış edib. "Artıq I
sinifdən başlayaraq şagirdlərimizə ingilis
dilini öyrətməliyik. XI-XII siniflərdə isə bütün
fənlər ingilis dilində olmalıdır",-deyə dövlət
başçısı bildirib. Prezident belə bir
təcrübənin Malayziyada mövcud olduğunu deyib.
"Onlar müstəqillik əldə etdikdən sonra mali
dilini inkişaf etdirməyə qərar verdilər, lakin
bu dildə dünyada heç kim bilmir, buna görə də
onlar Sinqapurda olduğu kimi ingilis dilinə
keçdilər". N. Nazarbayev əlavə edib ki,
Qazaxıstanda uşaqları 3 dildə - qazax, rus və
ingilis dillərində öyrətmək lazımdır. |
Oruc
MUSTAFAYEV,
"Azərbaycan müəllimi"
xarici mətbuat materialları əsasında |