"Açıq dərs"də şagirdlərə ulu öndərin neft strategiyası
barədə məlumat verilib
Bərdə Şəhər Təhsil Şöbəsindən bildirilir ki, Heydər
Əliyev Mərkəzində rayonun ümumtəhsil məktəblərinin XI
sinif şagirdləri üçün ümummilli liderin zəngin irsinin
öyrənilməsi məqsədilə keçirilən növbəti "açıq dərs"
"Heydər Əliyev və neft strategiyası" mövzusuna həsr
olunub.
Soğanverdilər, Xəsili və Nazırlı kənd tam orta
məktəblərinin şagirdləri Mərkəzdə ulu öndər Heydər
Əliyevin şərəfli həyat yolunu və fəaliyyətini əks
etdirən eksponatlarla, foto və kitablarla və iş
otağının maketi ilə tanış olublar.
Soğanverdilər kənd tam orta məktəbinin tarix müəllimi
Ceyhunə Baxışova şagirdlərə ulu öndər Heydər Əliyevin
xalqımız qarşısındakı misilsiz xidmətlərindən və
Azərbaycanda həyata keçirilən neft strategiyası barədə
geniş məlumat verib.
Soyqırımı gününə həsr olunmuş xüsusi dərslər
Şuşa Rayon Təhsil Şöbəsinin metodkabinet müdiri
Rəsmiyyə Məmmədova tərəfindən redaksiyamıza daxil
olan məktubda bildirilir ki, rayonunun bütün
ümumtəhsil məktəblərində 31mart - Azərbaycanlıların
Soyqırımı Gününə həsr olunmuş silsilə tədbirlər
keçirilib. Tədbirlərdə erməni qaniçənlərinin tarixən
xalqımızın başına gətirdiyi dəhşətli faciələr və
həyata keçirdikləri soyqırım barədə şagirdlərə geniş
məlumat verilib. Məktəblərdə "31 mart -
Azərbaycanlıların Soyqırımı Günü"nə həsr olunmuş
xüsusi dərslər keçirilib, şagirdlərin əl işlərindən
ibarət sərgilər təşkil olunub. 3 nömrəli tam orta
məktəbdə keçirilən tədbirdə pedaqoji kollektivlə
yanaşı, Şuşa Rayon İcra Hakimiyyəti başçısının
müavini Vüsalə Fətəliyeva, təhsil şöbəsinin müdiri
Təvəkkül Əliyev və valideynlər də iştirak ediblər.
Əvvəlcə soyqırımı qurbanlarının xatirəsi 1 dəqiqəlik
sükutla yad edilib. Sonra çıxış edənlər bildiriblər
ki, ermənilər tərəfindən həyata keçirilən 31 mart
soyqırımı bəşər tarixində baş verən ən qanlı
faciələrdən biri kimi tarixə düşüb. Bu gün onların
törətdikləri vəhşiliyin dünya ictimaiyyətinə
çatdırılması üçün bütün vasitələrdən istifadə
olunduğu və bu işdə gənclərin üzərinə böyük iş
düşdüyü diqqətə çatdırılıb.
Tədbirdə soyqırımına aid videoçarx nümayiş etdirilib
və şagirdlərin hazırladıqları ədəbi-bədii kompozisiya
nümayiş etdirilib.
Tərtərdə "7 sual - 7 cavab" intellektual yarışı
keçirilib
Tərtər Rayon Təhsil Şöbəsindən verilən məlumatda
bildirilir ki, şəhərdəki Gənclər Mərkəzində "İdeal"
gənclər təşkilatının dəstəyi ilə ümumtəhsil
məktəblərinin yuxarı sinif şagirdləri arasında "7 sual -
7 cavab" intellektual yarışı keçirilib.
Üç mərhələdə keçirilən viktorinada komandaların
ardıcıllığı püşkatma yolu ilə müəyyənləşdirilib. Gərgin
və maraqlı mübarizə şəraitində davam edən yarışmada
şəhər 6 nömrəli tam orta məktəbin komandası qalib gəlib.
Qalib komandaya diplom və qiymətli hədiyyələr verilib.
Ağdamın Quzanlı qəsəbəsində məktəb-liseyin yeni binası
inşa olunur
Rayon təhsil şöbəsindən verilən məlumatda qeyd olunur
ki, ötən il rayonun Birinci Baharlı kəndində 160 şagird
yerlik, Əfətli kəndində 360 şagird yerlik, Hacıməmmədli
və Həsənxanlı kəndlərinin hər birində 120 şagird yerlik
məktəb binaları istifadəyə verilib, 480 şagird yerlik
Əhmədağalı kənd tam orta məktəbi isə əsaslı təmir
olunub.
Hazırda "Azərbaycan Respublikası regionlarının
2014-2018-ci illərdə sosial-iqtisadi inkişafı Dövlət
Proqramı" çərçivəsində Ağdam rayonunun Quzanlı
qəsəbəsində tikilən 360 şagird yerlik məktəb-liseyin
binasının inşası bu il başa çatdırılacaq.
Təhsil Nazirliyinin sifarişi ilə tikilən ikimərtəbəli
binada sinif otaqları, kimya, biologiya və fizika
laboratoriyaları, hərbi hazırlıq və informatika
kabinetləri, kitabxana, akt və idman zalları, tibb
otağı, 100 yerlik yeməkxana, eləcə də həyətdə futbol,
voleybol və basketbol meydançaları, yüngül atletika və
gimnastika üçün sahələr, qaçış zolaqları yaradılacaq.
Hazırda binanın 1-ci mərtəbəsinin inşası başa çatıb,
2-ci mərtəbədə isə hörgü işləri aparılır.
Samuxda "Vətənpərvərlik - şərəfli yola doğru" adlı görüş
keçirilib
Rayon təhsil şöbəsindən redaksiyamıza daxil olan
məlumatda bildirilir ki, Qarabağlar kənd orta
məktəbində məktəbin məzunu, hərbi xidmətdə fərqlənməyə
görə 3-cü dərəcəli medalla təltif olunmuş İsfəndiyar
Quliyevlə "Vətənpərvərlik - şərəfli yola doğru" adlı
görüş keçirilib. Görüşdə Qarabağlar kənd orta
məktəbinin direktoru Elmira Aslanova və gənclərin
çağırışaqədərki hazırlığı rəhbəri Müqabil Məmmədov və
başqaları çıxış edərək Vətənin belə igid gənclərlə fəxr
etdiyini söyləyib, işğal altındakı torpaqlarımızın
qəhrəman oğullarımızın səyi ilə tezliklə düşməndən azad
olunacağına əminliklərini bildiriblər. Məktəblilərin
görüşünə gələn İsfəndiyar Quliyev ilk növbədə qazandığı
nailiyyətlərə görə orta məktəb müəllimlərinə
minnətdarlığını bildirib və harada olmasından asılı
olmayaraq onları heç vaxt unutmayacağını bildirib.
Görüşdən sonra məktəbin nümunəvi hərbi hazırlıq otağında
şagirdlər üçün "açıq dərs" keçirilib.
Məktəbdə "Riyaziyyat gecəsi"
Kürdəmir Rayon Təhsil Şöbəsindən aldığımız məlumatda
bildirilir ki, şəhərdəki Tofiq İsmayılov adına 1
nömrəli tam orta məktəbdə "Riyaziyyat gecəsi"
keçirilb. Tədbirdə məktəbin müəllim və şagird
kollektivi ilə yanaşı rayonun digər ümumtəhsil
məktəblərinin şagirdləri və valideynlər də iştirak
ediblər.
Tədbir Azərbaycanın Dövlət himninin səslənməsi ilə
başlayıb.
Şagirdlər riyaziyyata aid səhnəcik və ədəbi kompozisiya
göstəriblər. Sonra videoçarx nümayiş etdirilib və
şagirdlər arasında intellektual oyun
keçirilib.Valideynlər təşkil olunan "Riyaziyyat
gecəsi"ndən razı qaldıqlarını bildiriblər.
Sonda intellektual oyunda qalib gələn şagirdlərə
hədiyyələr verilib.
Yevlax və Balakən məktəbləri arasında "Qardaşlaşma
haqqında" saziş imzalanıb
Azərbaycan
Respublikasının Prezidenti yanında Bilik Fondunun həyata
keçirdiyi "İlboyu bilik" proqramının "Qardaşlaşmış
məktəblər" layihəsi çərçivəsində Balakən şəhər
humanitar və texniki təmayüllü liseyin şagirdləri Yevlax
şəhərində olublar.
Rayon təhsil şöbəsindən xəbər verilir ki, balakənli
məktəblilər şəhərin mərkəzi meydanında Yevlax şəhər 5
nömrəli tam orta məktəbin şagirdləri və rayon ziyalıları
tərəfindən mehribanlıqla qarşılanıblar.
Məktəblilər ümummilli lider Heydər Əliyevin abidəsi
önünə gül-çiçək dəstələri düzərək, xatirəsini ehtiramla
yad ediblər.
Sonra B.Səfəroğlu adına Xalq Teatrına gələn məktəblilər
"Tariximiz - qan yaddaşımız" mövzusunda əl işlərindən
ibarət sərgiyə, Yevlax şəhər 10 nömrəli və Əkşəm kənd
orta məktəblərinin şagirdlərinin hazırladıqları
kompozisiyaya baxıblar.
Bilik Fondunun icraçı direktoru Oktay Səmədov çıxış
edərək qurumun fəaliyyəti və həyata keçirdiyi layihələr
barədə məlumat verib. Bildirilib ki, "Qardaşlaşmış
məktəblər" layihəsi gənclərdə vətənpərvərlik ruhunun
yüksəldilməsində, onların dünyagörüşünün inkişafında və
intellektual səviyyələrinin formalaşmasında, müxtəlif
bölgələrdən olan məktəblilər arasında "bilik körpüsü"nün
yaradılmasında mühüm rol oynayır. Qeyd olunub ki, aprel
ayında Yevlax məktəblilərinin Balakənə səfəri təşkil
ediləcək.
Daha sonra Yeni Azərbaycan Partiyası Yevlax rayon
təşkilatının binasında "Qardaşlaşma haqqında" sazişin
müddəaları müzakirə olunub, əlavə və dəyişikliklərdən
sonra sənəd imzalanıb.
Məktəblilər Yevlaxdakı Heydər Əliyev Mərkəzini ziyarət
edib, tarix-diyarşünaslıq muzeyində, rayonun görməli
yerlərində olublar.
Məktəblilər "Ölkəmizi tanıyaq" layihəsi çərçivəsində
Gəncədə olublar
"Ölkəmizi
tanıyaq" layihəsi çərçivəsində təşkil olunmuş
maarifləndirici tur-aksiyasında iştirak edən Naxçıvan
şəhəri, Ordubad, Culfa, Babək, Şahbuz, Kəngərli, Şərur
və Sədərək rayonlarının 30 nəfər şagirdi Gəncədə olub.
Gəncə-Göygöl-Şəmkir marşrutu üzrə 3 gün davam edən
səfərdə məktəblilər Gəncənin qədim tarixi, mədəniyyət
abidələri ilə yaxından tanış olub, muzeyləri gəziblər.
Məktəblilər Gəncə şəhəri ilə tanışlığa Qala
Qapıları-Arxeologiya və Etnoqrafiya Muzeyi-Abidə
Kompleksindən, dahi Azərbaycan şairi və mütəfəkkiri
Nizami Gəncəvinin məqbərəsindən başlayıblar. Şagirdlər
Nizami Gəncəvi Muzeyində görkəmli şairin həyat və
yaradıcılığını əks etdirən eksponatlarla, qədim
əlyazmaları, nəfis tərtibatla yenidən nəşr olunmuş
əsərləri ilə tanış olub, "Xəmsə"ni əks etdirən daş
kitabələri maraqla seyr ediblər.
Sonra məktəblilər Heydər Əliyev parkına gələrək
buradakı Heydər Əliyev Mərkəzində olub, ulu öndərin
mənalı həyatını, titanik fəaliyyətini, misilsiz
xidmətlərini əks etdirən eksponatlara baxıblar.
Yaponiyalı qonaqlar İsmayıllı məktəblilərinin
təqdimatlarından razı qalıblar
İsmayıllı
Rayon Təhsil Şöbəsinin metodisti S.Mikayılovadan
aldığımız məlumata görə, Azərbaycanın İsmayıllı və
Yaponiyanın İto şəhərləri arasında qarşılıqlı dostluq
əlaqələri haqqında saziş imzalandıqdan sonra tərəflər
arasında qarşılıqlı səfərlər daha da artıb. Bu il İto
şəhər meri Hiromi Tsukudanın tövsiyəsi ilə Azərbaycana
səfər edən İto Beynəlxalq Qonaqlama Klubunun 3 üzvü
İşida Kazuko, Şuzuki Mitsue və Mori Ryako İsmayıllıda
olub.
Qonaqlar İsmayıllı şəhər 1 nömrəli tam orta məktəbin
şagirdlərinin Heydər Əliyev Mərkəzində açılan İto Minami
JHS məktəbi ilə əlaqələrindən bəhs edən sərgisinə baxış
keçirib, şagirdlərin yapon dilinə, mədəniyyətinə,
incəsənətinə olan marağın və sərginin rəngarəngliyinə
heyranlığını bildiriblər. Nümayəndə heyəti Mədəniyyət
Evində, yapon bağında, Heydər Əliyev Mərkəzində, Lahıc
və Basqal qəsəbələrində olublar. Sonra vətəninə qayıdan
xanım Mori Ryako dostlarına İsmayıllı şagirdlərinin
Yaponiyaya olan sevgisindən, yapon və ingilis dillərində
etdikləri təqdimatlardan danışıb.
Sumqayıtda rəsm müsabiqəsinin qalibləri
mükafatlandırılıb
Sumqayıt
Şəhər Təhsil Şöbəsindən redaksiyamıza daxil olan
məlumatda bildirilir ki, şəhər Uşaq və Yeniyetmələrin
Yaradıcılıq Mərkəzində Azərbaycan Qızıl Aypara
Cəmiyyətinin (QAC) 95 illik yubileyinə həsr olunmuş
"Humanizm naminə" rəsm müsabiqəsi keçirilib. Sərgi QAC
Sumqayıt şəhər bölməsi və ŞTŞ-in təşkilatçılığı ilə
reallaşıb.
Müsabiqədə şagirdlər, Uşaq və Yeniyetmələrin
Yaradıcılıq Mərkəzinin, həmçinin Ekoloji Tərbiyə və
Təcrübəçilik Mərkəzinin rəsm dərnəklərinin üzvləri
iştirak ediblər. Ümumilikdə müsabiqəyə 87 rəsm işi
təqdim olunub. Tədbirdə Heydər Əliyev Fondunun
prezidenti Mehriban xanım Əliyevanın uşaqlara diqqət və
qayğısından söhbət açılıb, Fond tərəfindən Sumqayıt
şəhərində gənclərlə bağlı çoxsaylı işlər görüldüyü
bildirilib. Həmçinin Azərbaycan Qızıl Aypara
Cəmiyyətinin 95 illik yubileyi münasibətilə keçirilən
rəsm müsabiqəsinin uşaqlara humanizm, Vətənə sevgi
duyğuları aşıladığı vurğulanıb.
Sonda qaliblərə diplom və hədiyyələr təqdim olunub.
Şakir CƏFƏROV,
"Azərbaycan müəllimi" |