|
Aprelin 6-da Qafqaz Universitetində Heydər Əliyev Fondu,
Təhsil, Rabitə və Yüksək Texnologiyalar nazirlikləri və
Azərbaycan Milli Elmlər Akademiyası İnformasiya
Texnologiyaları İnstitutunun birgə təşkilatçılığı ilə
ali məktəb tələbələri arasında informatika üzrə X
Ümumrespublika Olimpiadasının birinci mərhələsi
keçirilib.
17 may - Dünya Telekommunikasiya və İnformasiya
Cəmiyyəti Gününə həsr olunan olimpiadanın açılış
mərasimində rabitə və yüksək texnologiyalar nazirinin
müavini Elmir Vəlizadə ölkə rəhbərliyi tərəfindən
prioritet sahələrdən olan informasiya-kommunikasiya
texnologiyalarının inkişafına daim diqqət
göstərildiyini və bu istiqamətdə tədbirlərin
reallaşdırıldığını bildirib. Qeyd edib ki, gənc nəsil bu
işlərin həyata keçirilməsində mühüm rol oynayır. Bu
baxımdan, tələbələrin biliklərinin tətbiqi üçün böyük
imkanlar yaradan və ölkəmizdə gələcək kadr potensialının
yetişməsinə xidmət edən bilik yarışmalarının təşkili
təqdirəlayiqdir.
Qafqaz Universitetinin rektoru, professor Ahmet Saniç
çıxışında universitetlərinin 2007-ci ildən keçirilən
informatika olimpiadalarına ev sahibliyi etməsindən
məmnun olduqlarını bildirib.
Münsiflər heyətinin sədri, Bakı Dövlət Universitetinin
dosenti Ramin Mahmudzadə olimpiadanın şərtləri barədə
məlumat verib. Bildirilib ki, bilik yarışında iştirak
etmək üçün ali təhsil müəssisələrindən 63 komanda
qeydiyyatdan keçib. Onlardan 56-nın qeydiyyatı
təsdiqlənib. O, yarışma zamanı komandalara kompüterdə 5
saat ərzində 10 alqoritmik məsələnin proqramlaşdırılması
tapşırığının verildiyini, məsələlərin həllinin onlayn
avtomatik qiymətləndirmə sistemi vasitəsilə
yoxlanılacağını diqqətə çatdırıb.
Rabitə və Yüksək Texnologiyalar Nazirliyi informasiya
cəmiyyətinin inkişafı şöbəsinin müdiri İsfəndiyar
Əliyev, AMEA İnformasiya Texnologiyaları İnstitutunun
Tədris-İnnovasiya Mərkəzinin rəhbəri Rəsmiyyə Mahmudova
və başqaları bilik yarışmalarının İKT üzrə innovativ
təfəkkürə malik istedadlı gənclərin müəyyənləşdirilməsi,
onların ölkəmizdə bu sahə ilə bağlı həyata keçirilən
layihələrə cəlb olunmasına və ölkəmizi beynəlxalq
yarışlarda layiqincə təmsil etmələrinə imkan yaratdığını
vurğulayıblar.
Sonra olimpiadanın birinci mərhələsi keçirilib. İlk
mərhələdə 14 ali təhsil müəssisəsindən hər birində 3
tələbə olmaqla 50 komanda iştirak edib. Müsabiqədə Bakı
ilə yanaşı, Gəncə, Naxçıvan və Sumqayıtdakı ali təhsil
müəssisələri də öz komandaları ilə təmsil olunublar.
Olimpiadanın final mərhələsi aprelin 26-da AMEA-nın
İnformasiya Texnologiyaları İnstitutunda keçiriləcək.
Qaliblər "HP" şirkətinin qiymətli hədiyyələri ilə
mükafatlandırılacaqlar.
Yusif ƏLİYEV,
"Azərbaycan müəllimi" |
