|
 Aprelın
3-də Bakı şəhəri 138 nömrəli tam orta məktəbdə
"Fövqəladə hallarda özünü necə aparmalı?" mövzusunda
maarifləndirmə tədbiri keçirilib. Məktəbin direktoru
Mirfaiq Mirheydərli qonaqları salamlayaraq tədbirin
tərbiyəvi əhəmiyyətindən danışıb. Belə bir tədbirin
təşkilində zəhməti olan FHN Bakı Regional Mərkəzinin
bütün əməkdaşlarına öz təşəkkürünü bildirib.
Tədbirdə FHN Bakı Regional Mərkəzinin, Dövlət Yanğın
Nəzarəti, Dövlət Sularda Xilasetmə, Xüsusi Riskli
Xilasetmə və Tibb Xidmətlərinin, Mülki Müdafiə
Qoşunlarının, eləcə də Bakı şəhər Təcili Təxirəsalınmaz
Tibbi Yardım Stansiyasının əməkdaşları iştirak edib,
xüsusi xilasetmə alət və avadanlıqlar nümayiş etdirilib.
Tədbir nəzəri və praktik olmaqla iki hissədən ibarət
olub.
Müxtəlif təbii və texnogen fövqəladə hallar, eləcə də
həmin hallar zamanı hərəkət qaydalarına həsr olunmuş
məruzələrdən ibarət olan nəzəri hissə çərçivəsində Bakı
Regional Mərkəzinin əməkdaşları məktəbin şagirdləri ilə
birgə "Fövqəladə halların təsnifatı", "Kollektiv
mühafizə qurğuları", "Təbii fövqəladə hallar zamanı nə
etməli?" və başqa mövzularda çıxışlar ediblər.
Fövqəladə Hallar Nazirliyinin fəaliyyət istiqamətləri və
struktur qurumları, eləcə də dəm qazı barədə
videoçarxlar nümayiş etdirilib.
Tədbir zəlzələ mövzusunda şagirdlərin hazırladıqları
səhnəciklə davam etdirilib. Bu zaman şərti xəbərdarlıq
siqnalı ilə məktəbdə "Zəlzələ həyəcanı" elan edilib.
Səhnəcikdə düzgün mövqe tutma, şagirdlərin təxliyəsi və
yaralıya ilkin tibbi yardımın göstərilməsi öz əksini
tapıb. Həm də məktəb şagirdlərinin fövqəladə hallarla
bağlı hazırladıqları şeirlər maraqla qarşılanıb.
Məktəbdə şərti yanğın hadisəsi ilə bağlı verilən
xəbərdarlıq siqnalından sonra başlayan təxliyə üzrə məşq
zamanı şagirdlər öz müəllimlərinin rəhbərliyi altında
mütəşəkkil şəkildə məktəb binasını tərk edərək
təhlükəsiz ərazidə toplaşıblar.
Təxliyə başa çatdıqdan sonra məktəbdə qalanların
axtarışı və xilas edilməsi üzrə əməliyyat həyata
keçirilib. Bakı Regional Mərkəzin və Xüsusi Riskli
Xilasetmə Xidmətinin xilasediciləri tərəfindən 2 şagird
məktəbdən çıxarılaraq FHN Tibb Xidmətinin və Bakı şəhər
Təcili Təxirəsalınmaz Tibbi Yardım Stansiyasının həkim
briqadalarına təhvil verilib.
Təxliyə üzrə məşqdən sonra Fövqəladə Hallar Nazirliyinin
qurumlarının xilasetmə texnika və avadanlıqları nümayiş
olunub, bu zaman "Sprinter" (Mercedes BENZ) markalı
xüsusi təyinatlı avtomobil və onun təchiz olunduğu
spesifik alət və avadanlıqlar, akvalanq, xilasetmə və
üzmə vasitələri, xüsusi riskli axtarış və qəza-xilasetmə
əməliyyatlarında istifadə olunan texnika və
avadanlıqlar, fərdi mühafizə vasitələri, radiasiya,
kimyəvi kəşfiyyat və dozimetrik nəzarət cihazları,
yanğınsöndürmə texnika və vasitələrinin təyinatı və
ondan istifadə qaydaları, eləcə də maneken-mulyaj
üzərində yaralılara ilkin tibbi yardımın həyata
keçirilmə yolları, sınıqlar və qanaxmalar zamanı iş
üsulları barədə tədbir iştirakçılarına ətraflı
məlumatlar verilib.
Şakir CƏFƏROV,
"Azərbaycan müəllimi" |
