Xalq
şairi Zəlimxan Yaqubun oxucularla çox görüşlərinin
şahidi olmuşam. Həqiqətən də sadiq oxucuları ilə sevimli
şairimizin hər görüşü çox mənalı və məzmunlu olur,
yaddaqalan tarixə dönür. Şairin özünün də yazdığı kimi:
Görüş var bir ömrü versən də azdır,
Görüş var getməyə adam can çəkir.
Görüş var şadlığı sığmır illərə,
Görüş var fərəhi bircə an çəkir.
Bakının Qaradağ rayonunun Buta qəsəbəsində yerləşən
Kamran Yaqubov adına 184 nömrəli orta məktəbdə də
Zəlimxan Yaqubun oxucularla görüşü yaddaqalan oldu.
Görüşü məktəbin direktoru Mehriban Ələkbərova açdı. O,
Zəlimxan Yaqubun yaradıcılığı haqqında fikirlərini görüş
iştirakçıları ilə bölüşərək dedi: - Zəlimxan Yaqub
müasir Azərbaycan poeziyasının ən çox tanınan və ən çox
sevilən nümayəndələrindəndir. O, bizim də sevimli
şairimizdir. Bu, həqiqətən də fərəh doğuran, qürur hissi
oyadan bir görüşdür. Onun hər şeiri, hər sözü-kəlməsi
ruh oxşayır. Elə bu görüş də şairə olan ümumxalq
sevgisinin bir nümunəsidir.
Zəlimxan Yaqub yaradıcılığının yorulmaz tədqiqatçısı,
Aşıqlar Birliyinin katibi Musa Nəbioğlu şairin
Azərbaycan ədəbiyyatındakı yeri, rolu, mövqeyi və ona
ümumxalq məhəbbəti qazandıran möhtəşəm yaradıcılığı ilə
yanaşı, fenomenal yaddaşı, ədəbiyyatımızın inkişafındakı
xidmətləri haqqında danışdı.
Tədbirdə məktəblilər Zəlimxan Yaqubun müxtəlif illərdə
qələmə aldığı şeirlərindən nümunələr, "Peyğəmbər" və
eləcə də ulu öndər Heydər Əliyevə həsr olunmuş "Böyük
ömrün dastanı" poemalarından parçaları əzbərdən
səsləndirdilər.
Şair və yazıçılardan Həzi Həsənli, Akif Əhmədgil,
Müzahim İsmayılzadə, Kərim Kərimli xalq şairinin
yaradıcılığı haqqında səmimi fikirlər söylədilər və ona
həsr etdikləri şeirlərini oxudular. Məktəbin təsviri
incəsənət müəllimi Rəxşəndə Məmmədova da şairin yağlı
boya ilə çəkdiyi portretini təqdim etməklə görüşə bir
rəngarənglik qatdı.
Yaz nəfəsli, saz nəfəsli şair ömrü yaşayan, Azərbaycan
poeziyasında ölməzlik qazanan Zəlimxan Yaqubun
şeirlərinin ən yaxın həmdəmi olan saza meydan verildi.
Əməkdar mədəniyyət işçisi, aşıq Gülarə Azaflı və aşıq
Rəfiqə Göyçəli şairin şeirlərinə köklənən, ruh oxşayan
havacatlar üstündə mahnılar ifa etdilər.
Tədbirin sonunda çıxış edən Zəlimxan Yaqubun arzular
nidası, duyğular ətri ulduz gözlü şagirdlərin münbit
qəlbini isindirdi. Bu istilik, hərarət ürəkdən-ürəyə
axdı, bütün görüş iştirakçılarına sirayət etdi.
Zəlimxan Yaqub məktəbdə təşkil etdikləri görüşə görə
Qaradağ rayonunun və 184 nömrəli məktəbin rəhbərliyinə
dərin təşəkkürünü bildirdi. Şair şeirlərindən nümunələri
əzbər söyləyən şagirdlərə fəxri fərmanlar təqdim etdi,
bir neçə kitabını və əsərlərinin on üç cildliyini
məktəbin kitabxanasına bağışladı.
Həzi HƏSƏNLİ,
Azərbaycan Yazıçılar Birliyinin üzvü, şair-publisist |