|
 Bakı
şəhəri 189-190 nömrəli tam orta məktəbdə mütaliə
vərdişlərinin təkmilləşdirilməsi və şagirdlərdə mütaliə
mədəniyyətinin formalaşdırılmasına dair tədbir keçirilib.
Tədbirdə Bakı Şəhəri üzrə Təhsil İdarəsinin
nümayəndəsi, məktəb direktorları, yazıçılar və digər
qonaqlar iştirak ediblər.
Tədbir iştirakçıları öncə məktəbin foyesində təşkil
olunmuş şagirdlərin əl işlərindən ibarət sərgiyə
baxıb, müəllimlərin dərs keçdiyi sinif otaqlarında
olublar.
Sonra yuxarı sinif şagirdlərinin iştirakı ilə İsmayıl
Şıxlının "Dəli Kür", Anarın "Beşmərtəbəli evin altıncı
mərtəbəsi" əsərlərinin müzakirəsinə həsr olunan
"dəyirmi masa" keçirilib. Şagirdlərdən Firəngiz
Məmmədova, Lalə Sadıqova, Firdus Kərimzadə, Azər
Məmmədov, Fazil Babayev "dəyirmi masa"da fəal iştirak
ediblər.
Bakıdakı akademik Zərifə Əliyeva adına liseyin direktoru
Mehriban Vəliyeva, Azərbaycan Dövlət Mədəniyyət və
İncəsənət Universitetinin prorektoru Validə
Məmmədova, İsmayıl Şıxlının "Dəli Kür" tamaşasının
iştirakçısı, aktrisa Zenfira Sadıqova və başqaları
əsərlərin müzakirəsində öz fikir və tövsiyələrini
bildiriblər.
Sonra ibtidai sinif şagirdlərinin iştirakı ilə Oskar
Uayldın "Zvyozdnıy malçik", Qenrix Malonun "Bez semyi",
Aleksandr Belyayevin "Amfibiya adam" əsərlərinə aid
hazırlanmış ədəbi-bədii kompozisiya nümayiş etdirilib.
Tədbirdə iştirak edən Bakı Şəhəri üzrə Təhsil
İdarəsinin müdir müavini Məhəbbət Vəliyeva keçirilən
müzakirə və nümayiş olunan kompozisiyanın tərbiyəvi
əhəmiyyətindən ətraflı danışıb və bu cür tədbirlərin
başqa məktəblərdə keçirilməsinin vacibliyini
vurğulayıb.
Sonda məktəbin direktoru Ceyran Kuliyeva tədbirdə
iştirak edən bütün iştirakçılara pedaqoji kollektiv
adından minnətdarlıq edib.
Şakir CƏFƏROV,
"Azərbaycan müəllimi" |
