|
Ümummilli lider Heydər Əliyevin anadan olmasının 92-ci
ildönümü münasibətilə Nizami Rayon İcra Hakimiyyətinin,
Yeni Azərbaycan Partiyası (YAP) Nizami rayon
təşkilatının, rayon gənclər və idman idarəsinin birgə
təşkilatçılığı ilə rayon məktəbliləri arasında voleybol
yarışı keçirilib.
Yarışın açılış mərasimində çıxış edən YAP Nizami rayon
təşkilatının sədri, Milli Məclisin deputatı Sədaqət
Vəliyeva ümummilli lider Heydər Əliyevin Azərbaycan
tarixində mühüm yer tutduğunu və müasir müstəqil
dövlətimizin hərtərəfli inkişafının əsasını qoyduğunu
vurğulayıb.
Ulu öndər Heydər Əliyevin siyasi kursunun bu gün
Prezident İlham Əliyev tərəfindən uğurla davam
etdirildiyini deyən S.Vəliyeva bildirib ki, ölkə
başçısının idman sahəsində həyata keçirdiyi uğurlu
siyasət öz müsbət nəticələrini verir. Qeyd edilib ki, bu
gün dövlət tərəfindən idmançılara hərtərəfli şərait
yaradılıb və onlar beynəlxalq yarışlarda ardıcıl
qələbələr qazanaraq ölkəmizin nüfuzunu daha da
artırırlar.
Çıxışlardan sonra yarışa start verilib. 21 məktəbin
komandasının iştirak etdiyi yarış olimpiya sistemi üzrə
keçirilib. İki gün davam edən yarışda yüksək əzmkarlıq
və peşəkarlıq nümayiş etdirən 32 nömrəli məktəb birinci,
220 nömrəli məktəb ikinci və 145 nömrəli məktəb isə
üçüncü yerin qalibi olub.
Yarışın qaliblərinin mükafatlandırılması mərasimində
çıxış edən Nizami Rayon İcra Hakimiyyəti başçısının
müavini Gülnaz İsrafilova, YAP Nizami rayon təşkilatının
aparat rəhbəri Ramil Vəlibəyov və başqaları ümummilli
lider Heydər Əliyevin Azərbaycan xalqı və dövləti
qarşısındakı xidmətlərindən danışıblar.
Sonda yarışın qalibləri medal və diplomlarla
mükafatlandırılıb. |
