|
 Mayın
5-də Bakı Slavyan Universiteti, Azərbaycan
Respublikasının Prezidenti yanında Bilik Fondu, Bakı
Beynəlxalq Multikulturalizm Mərkəzinin təşkilatçılığı
ilə ümummilli lider Heydər Əliyevin anadan olmasının
92-ci ildönümünə həsr olunmuş "Azərbaycanşünaslığın
aktual problemləri" mövzusunda ənənəvi VI Beynəlxalq
elmi konfrans keçirilib.
Konfransın iştirakçıları Fəxri xiyabanda ümummilli lider
Heydər Əliyevin məzarını ziyarət ediblər.
Açılış mərasimində BSU-nun rektoru, professor Asif
Hacıyev qonaqları salamlayaraq, konfransın ulu öndər
Heydər Əliyev irsinin öyrənilməsinə, həmçinin Azərbaycan
gerçəkliklərinin dünyaya yayılmasına təkan verəcəyini
söyləyib.
Tədbirdə çıxış edən Azərbaycan Respublikasının
millətlərarası, multikulturalizm və dini məsələlər üzrə
Dövlət müşaviri, akademik Kamal Abdullayev bildirib ki,
müasir Azərbaycanın banisi ümummilli lider Heydər
Əliyevin anadan olmasının 92-ci ildönümü münasibəti ilə
keçirilən bu konfransda müxtəlif ölkələrdən olan
iştirakçıların birgə işləməsi təkcə Azərbaycanla
münasibətlərin inkişafına deyil, qonaqlar arasında da
əməkdaşlığın qurulmasına səbəb olacaq. Vurğulanıb ki,
ulu öndər Heydər Əliyev işığı hər zaman bizim
ürəyimizdədir və bu ənənəvi beynəlxalq konfrans bunun
göstəricisidir.
Təhsil nazirinin müavini Firudin Qurbanov konfrans
iştirakçılarını təbrik edərək qeyd edib ki, ümummilli
lider Heydər Əliyevin ən böyük xidməti azərbaycançılıq
məfkurəsinin yayılmasında, milli özünüdərkin inkişafında
gördüyü işlərlə bağlıdır. Əsası ulu öndər Heydər Əliyev
tərəfindən qoyulmuş siyasi kursu Prezident İlham Əliyev
uğurla davam etdirərək ölkəmizin dünya birliyində
layiqli yerini tutmasında mühüm addımlar atır. Nazir
müavini bildirib ki, BSU-nun təşəbbüsü ilə bir çox
xarici universitetlərdə Azərbaycan Dili və Mədəniyəti
Mərkəzləri fəaliyyət göstərir. Bakı Slavyan Universiteti
Azərbaycanın dünyada tanıdılması, azərbaycançılığın
təbliği istiqamətində mühüm addımlar atır və bu
beynəlxalq konfrans bunun sübutudur.
Azərbaycan Respublikasının İnsan Hüquqları üzrə
Müvəkkili Elmira Süleymanova çıxış edərək deyib ki,
ölkəmiz təcavüzə məruz qalsa da, yüksək inkişaf
yolundadır: "Azərbaycanın bütün sahələrdə olduğu kimi,
iqtisadi sahədə inkişafı da insan hüquqlarının yüksək
səviyyədə qorunmasına böyük dəstəkdir. Ölkəmiz tolerant
dəyərlərə sadiqliyi ilə seçilir, çünki azərbaycançılıq
məfkurəsi millətçiliyə yox, beynəlmiləllik, sülh və
tərəfdaşlığa yönəlmiş məfkurədir".
383 yerli və xarici alimin tezislərinin qəbul olunduğu
konfransda 20 ölkədən (Rusiya, Belarus, Bolqarıstan,
Polşa, Almaniya, Türkiyə, Gürcüstan, Böyük Britaniya,
Litva, İtaliya, Qırğızıstan, Çexiya, ABŞ, İsrail, İsveç,
Misir, İran, Qazaxıstan, Niderland) 60 qonaq iştirak
edib. Eləcə də konfransa Azərbaycan Respublikasının
Prezidenti yanında Bilik Fondundan, AMEA-nın
elmi-tədqiqat institutlarından, Bakı Dövlət Universiteti,
M.V.Lomonosov adına Moskva Dövlət Universitetinin Bakı
filialından və başqa ali məktəblərdən olan nümayəndələr
qatılıb.
Azərbaycan alimləri ilə bərabər xarici alimlərin də
çıxışları dinlənilib. Sonra konfransın işi 7 bölmədə
davam etdirilib.
Şakir CƏFƏROV,
"Azərbaycan müəllimi" |
