Javascript DHTML Drop Down Menu Powered by dhtml-menu-builder.com

ARXİV

23 May 2015 - №18

 

Bakı Modern Məktəbində yeni mərkəz açılıb

 

Böyütmək üçün seçin Mayın 21-də Bakı Modern Məktəbində Robototexnika və Mühəndislik Əlavə Təhsil  Mərkəzinin açılışı olub. Açıq mərasimdə qeyd olunub ki, son illərdə müasir texnologiyaların sürətlə inkişafı onların təhsil prosesinə tətbiqini  də sürətləndirib. Bunun nəticəsi olaraq ölkəmizin təhsil müəssisələri müasir kompüterlərlə, multimedia vasitələri ilə təchiz edilib. İnternet şəbəkəsinə qoşulan məktəblərin sayı da durmadan artır.

Son illər sürətlə inkişaf edən robototexnika da məktəb mühitinə ayaq açmaqda və həm bilik, həm də fəaliyyət aspektlərindən ibarət təhsil hədəflərinin reallaşmasına kömək göstərməkdədir. Məktəbdə robototexnika 21-ci əsrin texnologiyalarını şagirdlərə təqdim edir. Onların ünsiyyət qabiliyyətini və qarşılıqlı əlaqə bacarıqlarını inkişaf etdirir. Müstəqil şəkildə qərar qəbul etməyə və onların yaradıcılıq potensialını aşkar etməyə imkan yaradır.

Qeyd olunub ki, yüksək informasiya-kommunikasiya texnologiyaları infrastrukturuna malik  Bakı Modern Məktəbində  sözügedən mərkəzin yaradılması sahəsində işlərə məktəb açılandan başlanılıb. Məktəb "Microsoft" İT Akademiyasının rəsmi üzvü kimi fəaliyyət göstərdiyi üçün 2013-cü ildə dünyanın 50 nüfuzlu məktəbi sırasında London şəhərində keçirilmiş "BETT - 2013 Təhsil Texnologiyaları" sərgisində iştirak etmək üçün dəvət alıb. BETT-də İKT-nin təhsildə istifadəsinə həsr olunmuş aparıcı təhsil forumunda ən qabaqcıl ideyalar, ən yeni texnologiyalar və bu texnologiyaların təhsil prosesində tətbiqi üçün ən maraqlı üsullar,  əlavə təhsil imkanları yaradan yeni təhsil yanaşmaları, səmərəli metod və texnologiyalar üzərində qurulan metodiki vəsaitlər nümayiş olunub. Bu sərgidən BMM-in nümayəndə heyəti  gələcəkdə yaxşı mütəxəssis olması üçün şagirdlərin erkən yaşlarından müasir peşə bacarıqları ilə yaxından tanış etdirilməsinə imkan verən  robototexnika və mühəndislik istiqamətini hədəf olaraq qəbul edib. Robototexnika və mühəndisliyin tədrisə yönəlməsi, bu sahədə məktəbdə yeni tədris bazasının yaradılması ideyası həmin sərgidən sonra məktəbin inkişaf istiqamətlərindən biri kimi araşdırılmağa başlanıb.

Araşdırmaların davamı olaraq robototexnika və mühəndisliyin təlim prosesinə peşəkar inteqrasiyasını, onun tədrisi metodikasının öyrənilməsini və texniki fənlərin tədrisində proqramlaşdırmanın səmərəli tətbiqini, şagirdlərdə bu sahəyə marağını artırılmasını təmin etmək üçün 2014-cü ildə məktəbin rəsmi nümayəndələri Sankt-Peterburq şəhərinə səfər edib. Burada nümayəndələr prezident yanında fizika-riyaziyyat təmayüllü liseyi, uşaq bağçasını və uşaq yaradıcılıq mərkəzlərini ziyarət ediblər.

Səfərin nəticəsi olaraq Bakı Modern Məktəbi Sankt-Peterburq şəhərində bu sahədə çalışan şirkətlərlə əməkdaşlıq edərək Robototexnika və Mühəndislik Əlavə Təhsil Mərkəzi üçün zəngin maddi-texniki baza əldə edib. Bundan əlavə, informatika fənninin proqramına yenidən baxılıb, müəllimlərin peşəkarlığını artırmaq üçün tanınmış ekspert Ramin Mahmudzadə mütəxəssis kimi məktəbə dəvət olunub

Valideyn və şagirdlərin maarifləndirilməsi prosesini daha da sürətləndirmək məqsədilə məktəb Soçi şəhərində keçirilən "WRO 2014" olimpiadasında qonaq qismində iştirak edib.

Rusiyanın Təhsilin İnkişafı üzrə Federal İnstitutunun və Rusiya Robototexnika Assosiasıyasının dəvəti ilə məktəbin rəsmi nümayəndələri  "Robototexnika Əsaslarının Məktəbdə Əsas və Əlavə Tədrisə Tətbiqi" III Ümumrusiya elmi-praktik konfransında iştirak edib və sertifikat alıb.

Robototexnika və mühəndisliyin tədrisə tətbiqi sahəsində sürətlə irəliləməsini müşahidə edərək Beynəlxalq Uşaq Robototexnikası Olimpiadasının Təşkilat Komitəsi məktəbin şagird komandasını 2015-ci ildə Cənubi Koreyada keçiriləcək olimpiadaya dəvət edib. 6-8 avqust 2015-ci il tarixlərində Bakı Modern Məktəbinin 25 nəfərdən ibarət komandası Cənubi Koreyada  Beynəlxalq Robot Olimpiadasında Azərbaycan Respublikasını təmsil edəcək. Hazırda məktəb bu sınağa ciddi hazırlaşır.  

Yusif ƏLİYEV,
"
Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov