|
 Mayın
19-da Təhsil Nazirliyinin təşəbbüsü ilə Azərbaycan
Universitetində "Bakı-2015" birinci Avropa Oyunlarının
təbliğinə həsr olunan "Media və təhsil dialoqu:
peşəkarlığın inkişafı" mövzusunda təlim-konfrans
keçirilib. Təlim-konfransda Təhsil Nazirliyinin
əməkdaşları, media qurumlarının və ali təhsil
müəssisələrinin mətbuat xidmətlərinin rəhbərləri,
təhsillə bağlı QHT nümayəndələri, jurnalistika
fakültəsinin tələbələri iştirak ediblər.
AZƏRTAC Dövlət İnformasiya Agentliyi, "Azad Azərbaycan"
televiziyası və "APA-Holdinq"in informasiya dəstəyi
ilə təşkil olunmuş tədbiri Təhsil Nazirliyinin
İnformasiya şöbəsinin müdir müavini, QHT və KİV-lə iş
sektorunun müdiri Cəsarət Valehov giriş sözü ilə açaraq
ölkəmizdə təhsilin inkişafına xüsusi önəm verildiyini
diqqətə çatdırıb, həmin sahə ilə medianın
əlaqələrindən bəhs edib. Təlim-konfransın Təhsil
Nazirliyinin "Media və təhsil dialoqu" çərçivəsində
keçirdiyi sayca üçüncü olduğunu söyləyən sektor müdiri
belə tədbirlərin media işçiləri ilə təhsil
ictimaiyyətinin bir araya gəlməsində, eyni zamanda
peşəkarlığın artırılmasında əhəmiyyətli rol oynadığını
bildirib. Qeyd olunub ki, jurnalistikada bütün sahələr
üzrə, o cümlədən təhsil üzrə də ixtisaslaşma
olmalıdır. Təhsildən yazan media nümayəndələri bu sahə
ilə yaxından maraqlanmalı, tətbiq olunan yenilikləri
ictimaiyyətə daha dolğun və peşəkarcasına
çatdırmalıdırlar. Bu istiqamətdə Təhsil Nazirliyi
tərəfindən müəyyən işlərin görüldüyünü söyləyən Cəsarət
Valehov növbəti ildən Bakı Dövlət Universitetinin
jurnalistika fakültəsində təhsil alan 10 tələbənin
təhsil sahəsində ixtisaslaşması və peşəkar kadr olaraq
hazırlanmasının nəzərdə tutulduğunu, bu ideyanın
reallaşdırılması üçün çalışdıqlarını bildirib.
 Azərbaycan
Universitetinin rektoru Fərid Əhmədov belə konfransların
keçirilməsinin təhsil-media dialoqunda mühüm əhəmiyyət
kəsb etdiyini deyib və rəhbərlik etdiyi ali təhsil
müəssisəsinin bu cür aktual bir mövzuya həsr olunan
tədbirə ev sahibliyi etməsindən məmnun olduğunu bildirib.
"Azad Azərbaycan" Televiziyasının prezidenti Vüqar
Qaradağlı təhsil-media dialoqu sahəsində mövcud
vəziyyət barədə danışıb. Televiziyada təhsillə bağlı
jurnalistlərin olmasının və bu sahədə peşəkarlığın hər
zaman artırılmasının vacibliyindən söz açıb.
Sonra təhsil eksperti, Bakı Dövlət Universitetinin
professoru Şahlar Əsgərov, Təhsil Şurasının sədri,
professor Əjdər Ağayev çıxış edərək media-təhsil
dialoqu üçün belə konfransların keçirilməsini yüksək
dəyərləndiriblər. Çıxış edənlər medianın
təlim-tərbiyədə mühüm rol oynadığını söyləyib, təhsildən
yazan jurnalistlərin bu sahəni mükəmməl bilməsinin
zəruriliyinə toxunublar. Onlar habelə media və təhsil
əlaqələrinin səmərəliliyindən, həmin iki sahənin bir
araya gəlməsində və peşəkarlığın artırılmasında belə
dialoqların aktuallıq kəsb etməsindən danışıblar.
"APA-Holdinq"in prezidenti Vüsalə Mahirqızı bu cür
tədbirlərin nəzəri bilikləri möhkəmləndirməklə yanaşı,
ortaya çıxan problemlərin müzakirə edilməsi, çıxış
yollarının tapılması baxımından da əhəmiyyətliliyini
konfrans iştirakçılarının diqqətinə çatdırıb. Şirkət
rəhbəri təhsil müəssisələrinin piar mütəxəssislərinin
əsas işinin ölkənin təhsil sisteminə çox ciddi etimad
yaradılması olduğunu qeyd edib. Çıxışının sonunda
Vüsalə Mahirqızı təhsillə medianın dialoqunun
bütövlükdə bu sistemin media ilə işinin
yaxşılaşdırılmasına töhfə verəcəyinə ümidvar olduğunu
bildirib.
Sonra Təhsil Nazirliyinin İnformasiya şöbəsinin
ictimaiyyətlə əlaqələr sahəsində institusional inkişaf
üzrə koordinatoru Elçin Sərdarovun, Bakı Dövlət
Universitetinin kafedra müdiri Aynur Kərimovanın, PR
üzrə ekspert Aynur Rəşidovanın məruzələri dinlənilib.
Konfrans iştirakçıları daha sonra qruplar üzrə təlim
məşğələlərində iştirak ediblər. Təhsil Nazirliyinin
Keyfiyyətin təminatı sektorunun baş məsləhətçisi Vəfa
Yaqublunun "Təhsilin keyfiyyəti mövzusu və KİV.
Cəmiyyətdə hansı təhsil mövzularına daha çox ehtiyac
duyulur", Azərbaycan Universitetinin rektoru Fərid
Əhmədovun "Yerli universitet ənənəsinə yol haradan
başlayır" mövzuları ilə bağlı geniş təqdimatları olub.
Digər mütəxəssislər də media və təhsil əlaqələrindən
danışıblar, ictimaiyyətlə əlaqələr (PR) üzrə peşəkar
vərdişlərin yaradılması ilə bağlı çıxışlar ediblər.
Geniş diskussiya və fikir mübadiləsi şəraitində keçən
təlimlərdə media və təhsil dialoqunun daha da
yaxşılaşdırılması ilə bağlı müzakirələr aparılıb,
müvafiq təklif və tövsiyələr səsləndirilib. İştirakçılar
informasiya kampaniyalarının keçirilməsi, press-
relizlərin yazılması, sosial qruplarla iş və digər
mövzularda bilik və bacarıqlarını artırmaqla bərabər,
ictimaiyyətlə əlaqələrin qurulmasında sosial medianın
effektiv imkanları ilə də tanış olublar.
Sonda təlim-konfransda uğur qazanmış iştirakçılara
sertifikatlar verilib.
Günün ikinci yarısında təlim-konfrans iştirakçıları
Milli Gimnastika Arenasına və "Bakı-2015" I Avropa
Oyunlarının Mətbuat Kəndinə səfər ediblər. Burada
iştirakçılar "Bakı-2015" I Avropa Oyunlarına hazırlıqla
bağlı görülən işlərlə, bu oyunları işıqlandıracaq media
işçiləri, həmçinin ölkəmizə gələcək idmançılar, xarici
qonaqlar üçün yaradılan şəraitlə tanış olublar.
Samirə KƏRİMOVA,
"Azərbaycan müəllimi" |
