|
 Bakıdakı
229 nömrəli tam orta məktəbdə 28 May - Respublika Gününə
həsr olunmuş tədbir keçirilib. Bayram tədbiri ulu öndər
Heydər Əliyevin təhsillə, vətənimizin müstəqilliyi,
gənclərə vətənpərvərlik hissinin aşılanması ilə bağlı
söylədiyi müdrik kəlamların səsləndirilməsi ilə
başlayıb. Dövlət himni ifa olunub. "Koroğlu"
uvertürasının sədaları altında səhnəyə Dövlət bayrağı
gətirilib. Tədbirin aparıcıları olan şagirdlər
Azərbaycan Xalq Cümhuriyyətinin yaranması,
müstəqilliyimizin əldə olunduğu tarixi şərait, ADR-in
fəaliyyəti, onun qəbul etdiyi Dövlət bayrağı, himni
haqqında iştirakçılara geniş məlumat veriblər.
Məktəbin direktoru Fəridə Bağırova çıxış edərək mərasim
iştirakçılarını salamlayıb və Respublika Günü münasibəti
ilə təbrik edib. Bildirib ki, bu tarixi gün Azərbaycan
xalqının həyatına böyük və əlamətdar hadisə kimi daxil
olmuşdur. Şərqdə ilk demokratik dövlət quruluşunu
yaratmış Azərbaycan Xalq Cümhuriyyəti istiqlaliyyətimizi
elan edərək xalqımızın müstəqillik əzmini nümayiş
etdirmişdir.
İstedadlı şagirdlər Vətənə, məktəbə, müstəqilliyimizə
həsr olunmuş şeirlər söyləyib, mahnılar, rəqslər ifa
edib, səhnəciklər göstəriblər. Milli Qəhrəman Mübariz
İbrahimovun şücaətindən bəhs edən səhnəcik tədbir
iştirakçıları tərəfindən alqışlarla qarşılanıb.
Çıxış edənlər tədbiri yüksək qiymətləndirərək Şərqdə
ilk demokratik respublika olmuş Azərbaycan Xalq
Cümhuriyyətinin fəaliyyətindən, məktəbin uğurlarından
söz açıblar.
Rəşad RAMAZANOĞLU,
"Azərbaycan müəllimi" |
