|
 Lənkəran
Dövlət Universitetində LDU-nun valideynlər şurasının
sədri Sərhad Məmmədovun 80 illik yubileyi qeyd olunub.
Universitetin mətbuat xidmətindən bildirilib ki,
mərasimdə çıxış edən rektor, professor Asəf İsgəndərov
Sərhad Məmmədovun respublikanın tanınmış
ağsaqqallarından olduğunu söyləyib. Sonra
yazıçı-jurnalist Etibar Əhədov Sərhad Məmmədovun həyat
və fəaliyyəti barədə məruzə edib.
Qeyd olunub ki, S.Məmmədov Lənkəran Rayon Xalq
Deputatları Soveti İcraiyyə Komitəsinin sədri, Yardımlı
Rayon Partiya Komitəsinin birinci katibi, Lənkəran Şəhər
İcra Hakimiyyəti başçısının sosial-iqtisadi məsələlər
üzrə müavini və Gərmətük qəsəbəsi üzrə nümayəndəsi kimi
məsul vəzifələrdə işləyib. O, iki çağırış Azərbaycan SSR
Ali Sovetinin deputatı olub, "Qırmızı Əmək Bayrağı"
ordeni, "Şərəf" nişanı, Azərbaycan SSR Ali Sovetinin
fəxri fərmanları ilə təltif edilib.
Çıxış edən Lənkəran Ağsaqqallar Şurasının sədri Kamal
Kələntərli, Milli Qəhrəman Əsgər Əliyevin atası Ələkbər
Əliyev və başqaları Sərhad Məmmədovun Vətən və xalq
qarşısında xidmətlərini yüksək qiymətləndiriblər.
S.Məmmədov əməyinə verilən qiymətə görə minnətdarlığını
ifadə edərək, bundan sonra da rayonun və universitetin
ictimai həyatında fəal iştirak edəcəyini bildirib.
Mərasimdə yubilyara fəxri fərman və qiymətli hədiyyə
verilib. |
