|
 Bakı
Olimpiya Stadionunda möhtəşəm açılış mərasimi keçirildi
İyunun 12-də Bakı Olimpiya Stadionunda I Avropa
Oyunlarının möhtəşəm açılış mərasimi olub. Mərasimi
stadionda əyləşmiş 68 min yerli və xarici vətəndaş
izləyib.
Açılış mərasimini izləyənlər arasında Azərbaycan
Prezidenti İlham Əliyev, birinci xanım, "Bakı-2015" ilk
Avropa Oyunları Təşkilat Komitəsinin sədri Mehriban
Əliyeva, Avropa Olimpiya Komitəsinin prezidenti Patrik
Hikki, Türkiyə Prezidenti Rəcəb Tayyib Ərdoğan, Rusiya
Prezidenti Vladimir Putin, Belarus Prezidenti Aleksandr
Lukaşenko, Serbiya Prezidenti Tomislav Nikoliç,
Türkmənistan Prezidenti Qurbanqulu Berdiməhəmmədov,
Tacikistan Prezidenti Emoməli Rəhmon, Monteneqro
Prezidenti Filip Vuyanoviç, Bosniya və Herseqovinanın
Rəyasət Heyətinin Sədri Mladen İvaniç, Monako Şahzadəsi
II Albert, Lüksemburqun Böyük Hersoqu Anri, Gürcüstanın
Baş naziri İrakli Qaribaşvili, Qazaxıstanın Baş naziri
Kərim Məsimov, Rumıniyanın Baş naziri Viktor Ponta,
Bolqarıstanın Baş naziri Boyko Borisov, Səudiyyə
Ərəbistanı Krallığının şahzadəsi Abdullah Bin Musaad Bin
Əbdüləziz, Beynəlxalq Olimpiya Komitəsinin prezidenti
Tomas Bax, Milli Olimpiya Komitələri Assosiasiyasının
prezidenti şeyx Əhməd əl-Fahad Əl-Sabah, İSESCO-nun baş
direktoru Əbdüləziz bin Osman əl-Tuveycri, eləcə də
San-Marino, İsveçrə, Böyük Britaniya, Slovakiya, Çexiya,
İran, Ukrayna, Oman, Küveyt, Qətər və digər ölkələrin
yüksək səviyyəli rəsmi şəxsləri, tanınmış ictimai-siyasi
xadimlər, dünya idman ictimaiyyətinin görkəmli
nümayəndələri də olub. Mərasimdə Azərbaycan Dövlət
Simfonik Orkestri Dövlət himnini səsləndirib, Azərbaycan
Respublikasının Dövlət bayrağı gətirilib.
Avropa Oyunlarının məşəlini stadiona iki dəfə
paralimpiya oyunları çempionu, iki dəfə dünya çempionu,
beş dəfə Avropa çempionu İlham Zəkiyev Jan Sibeliusun
"5-ci Simfoniya"sının sədaları altında gətirib.
Daha sonra idmançıların paradı olub. Bu mərasim
gurultulu təbil sədaları ilə müşayiət olunub. İlk olaraq
Olimpiya Oyunlarını dünyaya bəxş etmiş ölkənin -
Yunanıstanın idmançıları səhnəyə daxil olublar. Digər
ölkələrin komandaları onun arxasınca əlifba sırası ilə
gəliblər. Sonda ev sahibi Azərbaycan idmançıları meydana
daxil olublar.
Ölkəmiz Oyunlarda 291 idmançı ilə təmsil olunur. Onların
keçidi Mənsum İbrahimovun ifasında "Qarabağ şikəstəsi"
muğamı ilə müşayiət olunub. Azərbaycan Prezidenti İlham
Əliyev və birinci xanım Mehriban Əliyeva idmançılarımızı
hərarətlə salamlayıblar.
Daha sonra stadiona Avropa Olimpiya Komitəsinin (AOK)
bayrağı gətirilib. Onu səhnəyə Avropanın müxtəlif
ölkələrindən olan səkkiz Olimpiya çempionu - Namiq
Abdullayev (Azərbaycan), Lüsi Dekosse (Fransa), Servet
Tazegül (Türkiyə), Nikkolo Kampriani (İtaliya), Keti
Teylor (İrlandiya), Tomas Bimis (Yunanıstan), Kriztina
Fazekas Zur (Macarıstan), Yelena Zamolodçikova (Rusiya)
gətiriblər.
Söz Azərbaycanın birinci xanımı, "Bakı-2015" ilk Avropa
Oyunları Təşkilat Komitəsinin sədri Mehriban Əliyevaya
verilib. Birinci xanım xalqımızı bu mühüm hadisə
münasibətilə təbrik edib, ölkəmizin həyatında mühüm rol
oynayacaq bu möhtəşəm tədbirin təşkilində əməyi olan
bütün insanlara təşəkkürlərini bildirib.
Avropa Olimpiya Komitəsinin prezidenti Patrik Hikki də
çıxış edərək, bu günün tarixi hadisə olduğunu söyləyib.
Azərbaycan Respublikasının Prezidenti İlham Əliyev I
Avropa Oyunlarını açıq elan edib.
Mərasim atəşfəşanlıqla başa çatıb.
"Azərbaycan müəllimi" |
