|
Akademik Həsən Əliyev adına Coğrafiya
İnstitutunun 70 illiyi qeyd edilib
 Şamaxı
şəhərindəki İncəsənət Təhsili Mərkəzində Azərbaycan
Milli Elmlər Akademiyasının (AMEA) akademik Həsən Əliyev
adına Coğrafiya İnstitutunun 70 illiyinə həsr olunan
konfrans keçirilib. Rayon təhsil şöbəsindən daxil olan
məlumatda qeyd olunub ki, tədbirdə institutun 30
əməkdaşı, rayon ziyalıları, ümumtəhsil məktəblərində
çalışan coğrafiya müəllimləri, Azərbaycan Müəllimlər
İnstitutu Şamaxı filialının əməkdaşları iştirak ediblər.
Coğrafiya İnstitutunun direktoru Ramiz Məmmədov
rəhbərlik etdiyi elm ocağının yaranma tarixi, 70 illik
fəaliyyəti dövründə qazanılan nailiyyətlər, coğrafiyanın
əhatə etdiyi tədqiqat sahələri barədə geniş məlumat
verib. Qeyd edilib ki, 1937-ci ildə SSRİ Elmlər
Akademiyası Azərbaycan filialının tərkibində yaradılan
coğrafiya sektorunun bazasında 1945-ci il mayın 1-də
Azərbaycan Elmlər Akademiyası Coğrafiya İnstitutu təşkil
olunub. Uzun tarixi yol keçən institut ölkəmizdə dövlət
müstəqilliyinin bərpasından sonra elmi fəaliyyətini iki
mühüm elmi problem üzərində qurub. Bunlardan birincisi
Azərbaycan təbiətinin inkişaf qanunauyğunluqları, təbii
ehtiyatların və onların ekocoğrafi xüsusiyyətlərinin
tədqiqi, istehsalın, sosial infrastrukturun və əhalinin
ərazi təşkilinin iqtisadi-coğrafi problemləri,
respublikanın konstruktiv və regional problemləri,
səhralaşma prosesləri, ikincisi isə Xəzər dənizinin
səviyyə dəyişkənliyini törədən amillər və ekoloji
şəraitin tədqiqidir.
R.Məmmədov daha sonra institutun ayrı-ayrı şöbələri və
bu şöbələrin elmi istiqamətləri, kadr hazırlığı,
beynəlxalq əlaqələri barədə geniş məlumat verib.
Konfransda müxtəlif mövzularda məruzələr dinlənilib.
Sonda dinləyiciləri maraqlandıran qlobal istiləşmə,
təbii su ehtiyatlarının azalması təhlükəsi barədə
suallar cavablandırılıb.
Bilik Fondu Xaçmazda "Ev kitabxanası"
layihəsinin qaliblərini mükafatlandırıb
 Azərbaycan
Respublikasının Prezidenti yanında Bilik Fondu
məktəblilər arasında keçirdiyi müxtəlif məzmunlu
müsabiqələri davam etdirir. Belə tədbirlərdən biri də
Xaçmaz rayonunda keçirilən "Kitabi-Dədə Qorqud" dastanı
haqqında inşa müsabiqəsi olub.
Xaçmaz Rayon Təhsil Şöbəsindən redaksiyamıza daxil olan
məlumatda bildirilir ki, müsabiqədə müxtəlif
məktəblərin şagirdləri iştirak ediblər. Məktəblilərin
"Kitabi-Dədə Qorqud" dastanı haqqında yazdıqları inşalar
münsiflər heyəti tərəfindən yoxlanılaraq qaliblər
seçilib. Mükafatlandırma mərasimi M.Məhəmmədov adına 4
nömrəli tam orta məktəbdə keçirilib. Qaliblərə
təşəkkürnamə və qiymətli hədiyyələr, fərqlənən bütün
iştirakçılara isə kitablar hədiyyə olunub. Tədbirdə
Bilik Fondunun mətbuat katibi Ceyhun Musaoğlu təmsil
etdiyi qurumun yaranması, fəaliyyəti, gördüyü işlər
barədə geniş məlumat verib. "Kitabi-Dədə Qorqud"
dastanının əxlaq və mənəviyyat göstəricisi olduğunu
xatırladan C.Musaoğlu dastandakı qəhrəmanlar,
toponimlər, işlənən ifadələrin bu günlə səsləşdiyini
qeyd edib. Məktəbin direktoru, fondun yerli nümayəndəsi
Akif İsmayılov bildirib ki, Bilik Fondu yaranandan
cəmiyyətin maariflənməsi istiqamətində çox işlər görüb
və bu fəaliyyətə Xaçmaz ictimaiyyəti böyük həvəslə
dəstək verməyə hazırdır.
Rayon təhsil şöbəsinin metodisti İmran Müseyibli belə
müsabiqələrin şagirdlərin təfəkkürünün formalaşmasında
böyük rol oynadığını, təmsil etdiyi qurumun Bilik Fondu
ilə birlikdə daha çox layihələrə imza atacağını
vurğulayıb.
Azərbaycan Respublikasının millətlərarası,
multikulturalizm və dini məsələlər üzrə Dövlət müşaviri
Kamal Abdullayevin ideyası əsasında Bilik Fondunun, Bakı
Beynəlxalq Multikulturalizm Mərkəzinin, Yaradıcılıq
Fondunun birgə layihəsi olan "Ev kitabxanası" ilk dəfə
Xaçmaz məktəblərində həyata keçirilib. Müsabiqənin
qalibləri "Ev kitabxanası"na daxil olan üç yazarın
kitablarına da sahib olublar. Onlar növbəti mərhələdə bu
kitablardan aldıqları təəssüratları yazacaqlar. Ən yaxşı
yazı KİV-lərdə dərc olunacaq.
Qaxın İlisu kəndində "Ceyranları
qoruyaq!" adlı ekoloji yay düşərgəsi təşkil olunub
 IDEA
(Ətraf Mühitin Mühafizəsi Naminə Beynəlxalq Dialoq)
İctimai Birliyi, Ümumdünya Təbiəti Mühafizə Fondunun
(WWF) Azərbaycan nümayəndəliyi və Təhsil Nazirliyi
Respublika Ekoloji Tərbiyə və Təcrübəçilik Mərkəzi
"Ceyranların Qafqazda tarixən məskunlaşdıqları ərazilərə
qaytarılması" proqramı çərçivəsində "Ceyranları
qoruyaq!" adlı ekoloji yay düşərgəsi keçirib. Qax və
Şəki rayonlarından 30-dan çox məktəblinin iştirak etdiyi
düşərgə Qax rayonunun İlisu kəndində təşkil edilib.
Yay düşərgəsinin əsas məqsədi ceyranların reintroduksiya
edildiyi ərazilərdə yaşayan gənc nəsli bu növ barədə
maarifləndirməkdir. Düşərgə iştirakçıları ceyranların
həyat tərzi, yayıldığı ərazilər və təbiətdəki rolu
haqqında geniş məlumatlandırılıblar. Uşaqlar, həmçinin
müxtəlif kiçik ekoloji tədqiqatların aparılmasında,
viktorina və müsabiqələrdə iştirak ediblər.
"Ceyranların Qafqazda tarixən məskunlaşdıqları ərazilərə
qaytarılması" proqramı 2010-cu ildən etibarən Ekologiya
və Təbii Sərvətlər Nazirliyi, Heydər Əliyev Fondu, IDEA
və Ümumdünya Təbiəti Mühafizə Fondunun (WWF) Azərbaycan
nümayəndəliyinin birgə əməkdaşlığı çərçivəsində uğurla
icra olunur. Bu illərdə 150 başdan artıq ceyran Şirvan
Milli Parkından tarixən məskunlaşdıqları ərazilərə
reintroduksiya edilib. Bu ərazilərdə ceyranların daimi
monitorinqi və mühafizə işləri həyata keçirilir.
Xəzər Universitetinin tələbələri Ağsu
arxeoloji ekspedisiyasına qoşulublar
 Ağsu
rayonunun Bəyimli kəndi ərazisindəki Torpaqqala
abidəsində arxeoloji qazıntılar davam edir. "Miras"
Mədəni İrsin Öyrənilməsinə Kömək İctimai Birliyindən
bildiriblər ki, Xəzər Universitetinin tarix və coğrafiya
fakültəsinin üç tələbəsi iyunun əvvəllərindən təcrübə
keçmək məqsədilə ekspedisiyaya qoşulub.
Ağsu arxeoloji ekspedisiyasının rəisi, professor Qafar
Cəbiyev tələbələrə arxeologiya elminin ümumi inkişaf
tarixi, Azərbaycan arxeologiyası, ərazidə son illər
aparılan arxeoloji tədqiqatlar, Bəyimli kəndində
Mehranilər sülaləsinin ilk qalası hesab olunan Mehrəvan
qalasının bu ərazidə lokalizə olunması haqqında geniş
məlumat verib. "Miras" İctimai Birliyinin sədri, tarix
üzrə fəlsəfə doktoru Fariz Xəlilli III-VIII əsrləri
əhatə edən Mehrəvan qala-şəhərində aparılan arxeoloji
tədqiqatların özünəməxsusluğu, mədəni təbəqə və
kvadratlar barəsində danışıb. Qazıntı sahəsinin müəyyən
kvadratlarında iri binanın divarlarını, təsərrüfat
küplərini təmizləyən tələbələr sənədləşdirmə və
materialların sahədən götürülməsi yollarını da
öyrənirlər.
Universitetdə öyrəndikləri nəzəri bilikləri qazıntı
sahəsində təcrübi fəaliyyətlə möhkəmləndirən tələbələr
iyunun sonunadək Mehrəvan qala-şəhərində ekspedisiyanın
işində iştirak edəcəklər.
ADAU-nun əməkdaşları Çində təşkil
olunan seminarlarda iştirak edirlər
Azərbaycan Dövlət Aqrar Universitetinin prorektoru Anar
Hətəmovdan aldığımız məlumatda bildirilir ki, Çin Xalq
Respublikasının Bakıdakı səfirliyi nəzdindəki İqtisadi
Ticarət Müşavirliyi ilə əməkdaşlıq çərçivəsində ADAU-nun
əməkdaşları bu ölkədə təşkil edilmiş kənd
təsərrüfatının müxtəlif problemlərinə həsr olunan
silsilə seminarlarda iştirak edirlər. Hər biri 20 günü
əhatə edən və cari ilin noyabr ayına kimi davam edəcək
seminarların bütün xərcləri Çin hökuməti tərəfindən
ödənilir. Hər bir seminarda 5 nəfər əməkdaşın iştirakına
icazə verilməklə xarici dil bilikləri olan gənc müəllim
və doktorantların iştirakının təmin olunmasına üstünlük
verilir. "İnkişaf etmiş ölkələrdə ixrac olunan kənd
təsərrüfatı məhsullarının keyfiyyətinin və
təhlükəsizliyinin idarə edilməsi", "Asiya və Avropa
ölkələrində kənd təsərrüfatının bazis texnologiyaları və
qənaətcil irriqasiya", "2015-ci ildə inkişaf etməkdə
olan ölkələrdə bitki toxumlarının istehsalı və idarə
edilməsi", "2015-ci il üçün rusdilli ölkələrdə böyük
miqyasda müasir kənd təsərrüfatının idarə edilməsi"
mövzularında keçiriləcək seminarlarda universitet
əməkdaşlarının iştirakı nəzərdə tutulur.
"Təbiət anadır- qoruyaq onu"
mövzusunda "dəyirmi masa"
İsmayıllı Rayon Təhsil Şöbəsindən aldığımız məlumatda
bildirilir ki, RTŞ-ın metodisti Sevda İsmayılovanın və
şəhər 1 nömrəli tam orta məktəbin biologiya müəllimi
Leyla Babayevanın rəhbərliyi ilə məktəbdə "Təbiət
anadır - qoruyaq onu" mövzusunda "dəyirmi masa"
keçirilib.
Ekoloji Tərbiyə və Təcrübəçilik Mərkəzinin direktoru
Y.Nuriyev, RTS-ın baş metodisti H.Əsədov, metodist S.
İsmayılova, coğrafiya müəllimləri N.Baxşıyev,
G.Asvarova, A.Qasımova, D.Yəhyayeva və şagirdlər
diskussiyanı davam etdirərək, mövzu ətrafında öz
mülahizələrini söyləyiblər.
Çıxış edənlər bildiriblər ki, biomüxtəliflik bütün
bəşəriyyətin sərvətidir və qlobal iqlim dəyişikliklərinə
qarşı mübarizədə bizim ən yaxşı müttəfiqimizdir. Bu
ehtiyatların tükənməsi harada olmasından asılı
olmayaraq, yolverilməzdir. Təbiətin mühafizəsi,
ehtiyatların səmərəli istifadəsi, xüsusilə də unikal
növlərin qorunması - milli və bəşəri məsələlərdir. İqlim
dəyişikliklərinin təsirinin yumşaldılmasi,
biomüxtəlifliyin, bioloji müxtəlifliyin genetik
ehtiyatlarının mühafizəsi, öyrənilməsi və davamlı
istifadəsi istiqamətində fəaliyyətləri və tədbirləri
gücləndirməklə yer kürəsində həyatın qorunmasına və
davamlı inkişafa xidmət göstərmiş oluruq.
Sonda bir daha vurğulanıb ki, gəlin, bizim tərkib
hissəsi olduğumuz mühiti və bu mühitin ən vacib elementi
olan bioloji müxtəlifliyi qoruyaq!
Ağstafada son 10 ildə 15 məktəb binası
tikilib
Ağstafa Rayon Təhsil Şöbəsindən aldığımız məlumatda
bildirilir ki, rayonda məktəblərin maddi-texniki
bazasının gücləndirilməsi məqsədi ilə 2003-cü ildən bəri
15 yeni məktəb binası tikilib istifadəyə verilib. Ötən
dərs ilində təlim-tərbiyə prosesində keyfiyyət amili ön
plana çəkilib, şagirdlərin daha keyfiyyətli bilik əldə
etmələri üçün müvafiq tədbirlərin ardıcıl olaraq həyata
keçirilməsi təmin olunub. Bunun nəticəsidir ki, şagird
Qismət Cəfərov qızıl medala, tələbə Zaur Ayralov
Prezident təqaüdünə layiq görülüb. "Ən yaxşı ümumtəhsil
məktəbi" və "Ən yaxşı müəllim" müsabiqələrində iki
məktəb və iki müəllim qalib olub. Cari tədris ilində
1180 nəfər 1-ci sinfə qəbul ediləcək.
Ağcabədidə şahmat turnirinin qalibləri
mükafatlandırılıblar
Ağcabədidə 15 iyun - Milli Qurtuluş Günü münasibətilə
gənclər və böyüklər arasında şahmat turniri keçirilib.
Təhsil şöbəsindən məlumat verilib ki, gənclər və idman
idarəsinin, təhsil şöbəsinin, Yeni Azərbaycan Partiyası
rayon təşkilatı və Heydər Əliyev Mərkəzinin birgə
təşkilatçılığı ilə keçirilən yarışda 50-dən çox idmançı
iştirak edib.
İsveçrə sistemi üzrə keçirilən turnirin yekununda
qaliblərə fəxri fərman, diplom və mükafatlar təqdim
olunub.
Şakir CƏFƏROV,
"Azərbaycan müəllimi"
[email protected] |
