|
Şamaxıda fəaliyyət göstərən məktəblər arasında öz dəst -
xətti ilə seçilən təhsil müəssisələrindən biri də
E.Rzayev adına Mədrəsə qəsəbə tam orta məktəbidir.
Fəaliyyətə başladığı vaxtdan (1989) məktəb rayonun
nümunəvi təlim-tərbiyə ocağı kimi daim fərqlənmiş, öz
ənənələri, göstəriciləri ilə şöhrət tapmışdır. Məktəbi
digər məktəblərdən fərqləndirən amillərdən biri də
burada öz işinin öhdəsindən bacarıqla gələn, işini günün
tələbləri səviyyəsində qurmağı bacaran, özünü
şagirdlərinə sevdirən, yüksək intellektə malik
müəllimlərin olmasıdır. Məhz bu müəllimlərin səmərəli
fəaliyyətinin nəticəsidir ki, məktəbin şagirdləri
ümumməktəb, ümumrayon, zona və respublika səviyyəli
tədbirlərdə - fənn olimpiadalarında, idman və
hərbi-vətənpərvərlik yarışlarında rayonun adını şərəflə
doğrultmağa çalışırlar.
Məktəbdə öz işini günün tələbləri səviyyəsində quran
müəllimlərdən biri də dil-ədəbiyyat müəllimi Rahib
Qasımovdur. Qabaqcıl iş təcrübəsi ilə tanınan Rahib
Qasımov ana dilimizin incəliklərini şagirdlərinə
sevə-sevə öyrədir. Müəllim həm də Azərbaycan
Universitetinin dissertantıdır və AMİ-nin Şamaxı
filialının metodisti, rayon fənn olimpiada
komissiyasının üzvüdür.
Rahib müəllimin şagirdləri həm ali və orta ixtisas
məktəblərinə qəbul zamanı, həm də müxtəlif intellekt
yarışlarında fəallıqları ilə seçilir. Müəllimin
peşəkarlığının nəticəsində məktəbimizin XI sinif şagirdi
Rüstəm Mustafayev 2013-cü ilin mayında "Ana dilimizi
sevək, sevdirək" şeir müsabiqəsinin Sumqayıtda keçirilən
Zona yarışlarında II yerə layiq görülmüş, diplom və pul
mükafatı ilə təltif olunmuşdur.
2011-2012-ci tədris ilində Azərbaycan dili və ədəbiyyat
fənnindən Bakıda keçirilən respublika fənn
olimpiadasında Rahib müəllimin başqa bir şagirdi - Səid
Xamdiyev qaliblərdən biri olmuşdur.
Bu ilin mayında R.Qasımovun daha bir uğuru həm Şamaxı
təhsilinə, həm də məktəbimizin pedaqoji kollektivinə
sevinc bəxş etdi. Belə ki, ümummilli lider Heydər
Əliyevin anadan olmasının 92-ci ildönümü münasibətilə
Təhsil Nazirliyi, Yeni Azərbaycan Partiyası, Heydər
Əliyev Fondu, Azərbaycan Təhsil İşçiləri Azad Həmkarlar
İttifaqı Respublika Komitəsi, Rabitə və Yüksək
Texnologiyalar Nazirliyinin birgə təşkilatçılığı ilə
keçirilən inşa müsabiqəsində məktəbimizin X sinif
şagirdi Lalə Quliyevanın inşası münsiflər tərəfindən
yüksək qiymətləndirilmiş və o, qaliblərdən biri
olmuşdur.
Rahib müəllimin uğurları təkcə orta məktəblə
məhdudlaşmır. O, təlimçi kimi AMİ-nin Şamaxı filialında
fənn kurikulumlarının sirlərini ixtisasartırma
kurslarına dəvət olunmuş müəllimlərə həvəslə açıqlayır.
Ağamustafa TEYMUROV,
Şamaxı rayonu E.Rzayev adına Mədrəsə qəsəbə
tam orta məktəbinin direktoru |
