|
 Azərbaycan
alimləri və xalq musiqiçiləri Ənənəvi Musiqi üzrə
Beynəlxalq şuranın 43-cü Ümumdünya konfransında uğurla
çıxış ediblər. Qeyd edək ki, Ənənəvi Musiqi üzrə
Beynəlxalq Şura (İCTM) YUNESKO ilə rəsmi konsultativ
əlaqədədir. Bu şura müxtəlif mədəniyyətlərə malik
xalqları birləşdirir, onlar arasında əlaqələr yaradır.
Beynəlxalq Şuranın ümumdünya konfransı 1948-ci ildən
etibarən iki ildən bir keçirilir. Şura hər il ənənəvi
musiqi ilə bağlı jurnal nəşr edir, müxtəlif konkret
mövzulara həsr olunan kollokviumlar, seminarlar,
"dəyirmi masa"lar təşkil edir.
Bu il ilk dəfə olaraq ümumdünya konfransı MDB
ölkələrindən birində - Qazaxıstanın paytaxtı Astanada
keçirilib. Astanada yerləşən Qazaxıstan Milli İncəsənət
Universiteti qapılarını yüzlərlə qonağa açıb. İyulun
16-22-si arası keçirilən möhtəşəm konfransa dünyanın 70
ölkəsindən 800-dən artıq ekspert, alim, tədqiqatçı,
musiqiçi qatılıb.
Gün ərzində paralel olaraq müxtəlif seksiyalarda 30-dan
artıq sessiya keçirilib. Hər sessiyada 3-4 tədqiqatçının
təqdimatı, filmlər nümayiş olunub, seminar, ustad
dərsləri, "dəyirmi masa"lar təşkil edilib. Konfrans
çərçivəsində TÜRKSOY tərəfindən təşkil olunan Türk
Xalqlarının Musiqi Festivalında Azərbaycan Dövlət
Mədəniyyət və İncəsənət Universitetinin magistr
tələbələri Ədalət Behbudov (tar), Pərviz Fərhadov (kamança)
və gənc, çox istedadlı xanəndə Aytən Məhərrəmovadan
ibarət "Aypara" qrupunun ifası marağa səbəb olub,
tamaşaçılar tərəfindən böyük coşqu ilə qarşılanıb.
Musiqiçilərimiz bütün iştirakçıların istəyi ilə
konfransın bağlanışına həsr olunan Qala konsertdə də
çıxış edib. Onların ifasında səslənən muğam parçaları,
təsniflər ümumdünya konfransına xüsusi rəng qataraq,
dinləyicilərə xoş anlar və xoş təəssürat bağışlayıb.
Tanınmış musiqişünaslar Sənubər Bağırova, Sürəyya
Ağayeva ilə yanaşı, ADMİU-nun əməkdaşı, Bakı Musiqi
Akademiyasının dosenti, sənətşünaslıq üzrə fəlsəfə
doktoru Nərmin Qaralova da ümumdünya konfransında
Azərbaycandan yeganə gənc alim olaraq çıxış edib. Onun
Azərbaycan və İran muğam dəstgahlarının müqayisəli
təhlili mövzusunda çıxışı tədqiqatçılar tərəfindən
böyük marağa səbəb olub. Konfransda çıxışlarına görə
musiqiçilərimiz diplomla təltif ediliblər. |
