|
"Mənim universitetim" layihəsinin budəfəki hədəfi
Azərbaycan Dövlət Aqrar Universitetidir
Rüfanə GÜNƏŞ
[email protected]
 Maddi-texniki
baza
Aqrar Universitet 6 tədris korpusundan ibarətdir.
Hazırda universitetdə struktur bölmə kimi tədris-təcrübə
təsərrüfatı, tədris, elm, kadrlar, tələbə, ümumi,
redaksiya-nəşriyyat, informasiya texnologiyaları və
innovasiya, beynəlxalq əlaqələr, qiyabi təhsil, təcrübə
və işədüzəltmə şöbələri, arxiv, elm, təhsil və
cümhuriyyət muzeyi, 2 sahə elmi-tədqiqat laboratoriyası,
magistr hazırlığı, distant və əlavə təhsil mərkəzləri,
əsaslı kitabxana, elektron kitabxana, mətbəə və "Aqrar
mütəxəssis" qəzetinin redaksiyası, 7 fakültə, 30 kafedra
fəaliyyət göstərir.
Kənd Təsərrüfatı Nazirliyinin nəzdində baytarlıq
nəzarəti xidməti tərəfindən universitetə bütün
avadanlıqları ilə birlikdə baytarlıq-sanitariya
ekspertizası laboratoriyası, "Aqrolizinq" ASC tərəfindən
16 adda yeni xarici kənd təsərrüfatı texnikası, o
cümlədən NEW HOLLAND markalı taxılyığan kombayn, Belarus
MTZ-892 traktoru, kotan, toxumsəpən, çiləyici, kartof
basdıran, bağlıq və üzümlükdə cərgə arasını becərən frez,
mineral gübrəsəpən, rotorlu və bıçaqlı otbiçən,
pnevmatik toxumsəpən, kartofqazan və s. verilib.
Mühəndislik fakültəsinin kafedralarında uzun müddət
istifadə edilməyən, nasaz halda olan 3 ədəd traktor, 2
ədəd yük avtomobili, 1 ədəd KAMAZ və 1 ədəd yükünü
özüboşaldan avtomobil əsaslı təmir edilərək işlək
vəziyyətə gətirilib, 1 ekskovator alınıb. Azərbaycan
Respublikası Nazirlər Kabinetinin qərarı ilə
universitetə 3 ədəd "Hyundai" markalı avtobus, 1 ədəd "Peugeot",
1 ədəd "Vito" markalı mikroavtobus verilib.
 Universitetin
ərazisində maşın-traktor parkı yaradılıb ki, bu parkda
avtobuslar, yük avtomobilləri, traktor və müxtəlif
markalı müasir kənd təsərrüfatı maşınlarının olması
təcrübə məşğələlərinin, sürüş təlimlərinin təşkilinə,
tələbələrin müasir texnikanın quruluşuna, nizamlanmasına
və istismar qaydalarına dərindən yiyələnməsinə imkan və
şərait yaratmaqla yanaşı, elmi-tədqiqat işlərinin
səviyyəsinin yüksəldilməsinə də xidmət edəcək.
İdman salonu əsaslı təmir, lazımi trenajorlarla təchiz
edilib və 30 ədəd idman geyim forması, 24 ədəd qədim
milli geyim forması alınıb.
1 nömrəli yataqxanada tələbələrin asudə vaxtının
səmərəli təşkili məqsədilə istirahət otağı yaradılmış,
müasir mebel, internetə qoşulmuş kompüter dəsti,
mini-kitabxana, böyük ekranlı televizor quraşdırılıb.
Dövlət proqramının tələblərinə uyğun olaraq tələbə
şəhərciyi ərazisində 7 mərtəbəli 514 yerlik mehmanxana
tipli müasir tələbə yataqxanasının tikintisi başa çatmaq
üzrədir. Digər yataqxananın tikintisi davam etdirilir.
 Təkcə
2014-cü ildə 22 smart (interaktiv) lövhə, 102 noutbuk,
16 printer, 27 proyektor, proyektor üçün 4 pərdə, 11
elektron tərəzi, 96 mikroskop, 65 kompüter dəsti, 9
konfrans masası, 35 kompüter masası, 250 tələbə masası,
15 qulaqcıq, 2 qoruyucu kamera, 500 stul İSO, 1 kabinet
dəsti, 2 tennis stolu, 20 kürsü, 20 plastik lövhə
alınıb.
Mühəndislik fakültəsinin tədris korpusu şəhərin ən böyük
binalarındandır ki, burada 2 fakültə, böyük idman salonu,
bir neçə struktur bölmə fəaliyyət göstərir. Korpusda
əsaslı təmir və abadlıq işləri başa çatdırılmışdır.
Binanın foye, dəhliz və pilləkənlərinə mərmər döşənmiş,
fasad hissəsi müasir səviyyədə gözəlləşdirilmiş, yeni
tədris avadanlıqları alınmış, tədris binası cari tədris
ilinin başlanğıcında müəllim və tələbələrin istifadəsinə
verilib. Tədris korpusu üçün 828 masa, 1778 stul və
digər tədris avadanlıqları alınıb.
Bütün tədris korpuslarına universitetin daxili imkanları
hesabına videokameralar quraşdırılıb.
İmtahan
sessiyası
Payız və yaz semestrlərinin imtahan sessiyalarının
Təhsil Nazirliyinin normativ-hüquqi sənədlərinin
tələbləri əsasında tam aşkarlıq şəraitində keçirilməsi
məqsədi ilə lazımi sayda müasir kompüter dəsti alınıb.
Bu da sessiyalarda imtahanların kompüterlər vasitəsilə
qəbul edilməsinə imkan yaradır.
 "Elektron
universitet" layihəsi çərçivəsində mühəndislik
korpusunda 150 kompüter dəstindən ibarət 2 auditoriya
ayrılıb, imtahan fənləri üzrə mütəxəssis olmayan
şəxslərdən ibarət nəzarət qrupu təşkil olunub,
valideynlərə, kütləvi informasiya vasitələrinin
nümayəndələrinə imtahanlarda iştirak etmək üçün şərait
yaradılıb. Bütün kurslarda imtahanlar test üsulu ilə
aparılır.
Kitabxana
Əsası 1929-cu ildə qoyulan ADAU-nun əsaslı kitabxanası
ümumiyyətlə, elmin və xüsusən kənd təsərrüfatı elminin
çoxşaxəli sahələrinə aid nadir inciləri qoruyub
saxlayır. Əsaslı kitabxana ADAU-nın professor-müəllim
heyətinə, tələbələrə, habelə gənc tədqiqatçılara xidmət
göstərir. Kitabxananın fondunda 700 min nüsxəyə yaxın
müxtəlif adlı dərslik, elmi və bədii ədəbiyyat
oxucuların istifadəsindədir. Respublikanın müxtəlif
bölgələrində aqrar sahə üzrə çalışan mütəxəssislər və
elmi - tədqiqat işçiləri də vaxtaşırı bu kitabxana
fondundan bəhrələnirlər.
Kitabxanada bir oxu zalı fəaliyyət göstərir. ADAU-da
həmçinin Elektron kitabxana yaradılıb ki, burada Asiya,
Avropa, Afrika və Yaxın Şərq ölkələrinin, Türkiyə,
Avstraliya, Yeni Zelandiya və Sakit okean hövzəsi
ölkələri, FAO Catalogue, Kanada və Meksika və Latın
Amerikası ölkələrinin kitabxanalarından faydalanmaq
mümkündür. Həmçinin rus və Azərbaycan dillərində
müxtəlif qəzetlərdən və elmi jurnallardan da istifadə
etmək olar.
 Elmi-tədqiqat
işləri və əldə edilən uğurlar
ADAU-nun professor-müəllim kollektivi 2015-2017-ci
illərdə "Torpaqların münbitliyinin yaxşılaşdırılması,
qorunması, meliorasiyası və suvarma texnologiyalarının
öyrənilməsi, kənd təsərrüfatı bitkilərinin genefondunun
toplanması, toxum və ting istehsalı, əkinçilikdə müasir
becərmə texnologiyalarının işlənməsi, yeni heyvan
cinslərinin yaradılması, damazlıq işlərinin təşkili,
heyvandarlıqda xəstəliklərə qarşı profilaktik
tədbirlərin hazırlanması, bitkiçilik və heyvandarlıq
məhsullarının daşınması və saxlanması, kənd
təsərrüfatının bütün sahələrində istifadə olunan
texnikaların səmərəliliyinin artırılması, fermer
təsərrüfatlarının idarə olunmasını və kənd təsərrüfatı
məhsullarının iqtisadi təhlili" istiqamətlərində
elmi-tədqiqat işlərini davam etdirirlər. Bu işlərin
yerinə yetirilməsində 31 kafedra, 2 sahəvi laboratoriya
və 534 əməkdaş iştirak edir.
2014-cü ildə ADAU əməkdaşları tərəfindən 1 monoqrafiya,
23 dərslik, 20 dərs vəsaiti, 24 broşür, 1750 məqalə (
bunlardan 132 xaricdə), 3 tövsiyə, 13 elmi əsərlər
məcmuəsi, 151 proqram nəşr edilib. Ötən il 1 nəfər
elmlər doktoru, 9 nəfər isə fəlsəfə doktoru adına layiq
görülüb.
Seleksiyanın "Qızıl fondu" hesab edilən 68 başlanğıc
material pitomnikində 312 nümunə seçilib, həmin
nümunələr kolleksiya, hibrid və seleksiya
pitomniklərində səpilib, onlar üzərində fenoloji
müşahidələr, sünbül və dərz analizləri aparılıb. Yeni
yaradılmış "ADAU-80" qarğıdalı sortunun toxumları
çoxaldılaraq bir çox rayonların qabaqcıl
təsərrüfatlarına təhvil verilib.
 Beynəlxalq
"CİMMUT" proqramının metodikasına uyğun olaraq bir sıra
ölkələrdən, o cümlədən Türkiyədən gətirilmiş 50 nümunə
sınaqdan keçirilib. 2014-cü ildə ADAU əməkdaşları
tərəfindən "Məhsuldar" qarğıdalı, "Qismət" Tritikale və
"Qırmızı buğda" yumşaq sortlarının rayonlaşdırılması
Respublika Sort Sınaq Stansiyasında davam etdirilib.
Bağçılıq kafedrasının əməkdaşları 2014-cü ildə 3 üzüm
sortunu rayonlaşdırmaq üçün Respublika Sort Sınaq
Stansiyasına təqdim ediblər.
İnək, camış, qoyun və keçilərin süd məhsullarının
identifikasiyası, ekspertizası, soyudulması,
dondurulması və saxlanması üsulları, saxlanma zamanı
onun tərkibində gedən fiziki, kimyəvi və bakterioloji
dəyişikliklər öyrənilib.
"Baytarlıq və balıqçılıq təsərrüfatı işi" ixtisası üzrə
mütəxəssis hazırlığının keyfiyyətini yaxşılaşdırmaq
məqsədilə baytarlıq təbabəti və zoomühəndislik
fakültəsində "Qapalı balıq yetişdirmə tədris təcrübə
laboratoriyası"nın tikintisi başa çatdırılıb.
Kənd təsərrüfatı məhsullarının qurudulması üçün sadə və
ucuz günəş kollektorlarının texniki şərtləri işlənib
hazırlanıb və onun əsasında Rusiyada Texniki Rezin
Məmulatları EİB-də orijinal qurğu hazırlanaraq sınaqdan
çıxarılıb.
 Yeni
laboratoriyalar
Təkcə 2014-cü ildə linqafon kabineti, "kimya",
"əczaçılıq və BSE", "fizika və riyaziyyat" kafedraları
üçün laboratoriyalar, "bitkiçilik və bitki mühafizəsi"
kafedrasına isə fitopatologiya üzrə "KARMALAB"
laboratoriyası quraşdırılıb.
Baytarlıq təbabəti və zoomühəndislik fakültəsinin
ərazisində balıqçılıq və balıq təsərrüfatı işi ixtisası
üzrə mütəxəssis hazırlıq keyfiyyətinin yaxşılaşdırılması
üçün 1 ədəd 126 kub.m-lik yeraltı hovuz hazırlanıb, 16
ədəd yerüstü hovuz (hər biri 24 kub.m) quraşdırılmışdır.
8 hovuzda hazırda balıq yetişdirilir.
Laboratoriya Türkiyə mütəxəssisləri tərəfindən
quraşdırılıb. Laboratoriyada tələbələr balıq kürüsünün
alınması, mayalandırılması mərhələsindən başlayaraq
balıq alınmasınadək bütün texnoloji prosesdə iştirak
edəcək, həmçinin müxtəlif növ balıqların yetişdirilməsi
və yemləndirilməsi texnologiyasına da yiyələnəcəklər.
Baytarlıq təbabəti və zoomühəndislik fakültəsinin
nəzdində "Quşçuluq tədris-təcrübə mərkəzi" yaradılıb.
Mərkəzin yaradılmasında məqsəd quşçuluq sahəsində yüksək
ixtisaslı mütəxəssislərin hazırlanmasıdır.
Təməli 2013-cü ilin noyabr ayında qoyulan quşçuluq
tədris mərkəzi 2014-cü ilin oktyabr ayında fəaliyyətə
başlayıb. Tədris mərkəzi 3000 baş broyler cücəsinin
yetişdirilməsi üçün nəzərdə tutulub.
Bu mərkəzdə birinci və ikinci kurs tələbələri quşçuluqda
işin birinci praktik bacarıqlarını əldə edərək
laborantlar kimi tədris təcrübəsini keçəcəklər. Üçüncü
kursun tələbələri - kiçik elmi işçilər, briqadirlər,
seleksiyaçılar, quşun yemləndirilməsi üzrə
mütəxəssislər, baytar həkimləri yeni istehsal
təcrübəsini orta əlaqənin mütəxəssislərinin dublyorları
kimi keçməlidirlər.
Quşçuluq tədris mərkəzinin əməkdaşlarınin
tədqiqatlarının materialları əsasında istehsalata
tövsiyələr hazırlanır.
"Balıqçılıq və balıqçılıq təsərrüfatı işi" ixtisası üzrə
mütəxəssis hazırlığının keyfiyyətini yaxşılaşdırmaq
məqsədilə baytarlıq təbabəti və zoomühəndislik
fakültəsinin nəzdində "Qapalı balıqyetişdirmə
laboratoriyası" yaradılmış və iki növdə 2 mindən çox
balıq yetişdirilməsinə başlanıb.
Beynəlxalq
əlaqələr
ADAU tələbə və müəllimlər üçün Erasmus Mundus INFINITY,
TEMPUS- SuToMa, "Mövlanə" Mübadilə Proqramı, Vaynştefan
proqramının, həmçinin müəllimlər üçün olan TEMPUS FLEPP
layihəsinin iştirakçısıdır.
Çin Xalq Respublikasının ölkəmizdəki səfirliyi
nəzdindəki İqtisadi Ticarət Müşavirliyi ilə əməkdaşlıq
çərçivəsində Azərbaycan Dövlət Aqrar Universitetinin
əməkdaşları Çində təşkil edilmiş kənd təsərrüfatının
müxtəlif problemlərinə həsr olunan silsilə seminarlarda
iştirak edirlər. Hər biri 20 gün olan və cari ilin
noyabr ayına kimi davam edəcək seminarların bütün
xərcləri (viza xərcləri istisna olmaqla) Çin Hökuməti
tərəfindən ödənilir. Hər bir seminarda 5 nəfər əməkdaşın
iştirakına icazə verilməklə, xarici dil bilikləri olan
gənc müəllim və doktorantların iştirakının təmin
olunmasına üstünlük verilir.
Avropa İttifaqının TEMPUS proqramı dəstəyi ilə həyata
keçirilən FLEPP (Foreign Language Education for
Professional Purposes) layihəsi ilə əlaqədar 15 dəst
kompüter, 1 ədəd proyektor, 2 ədəd printerlə
universitetin dillər kafedrasının nəzdində xüsusi
auditoriya yaradılıb.
23-24 aprel 2015-ci ildə Serbiyanın paytaxtı Belqrad
şəhərində keçirilmiş Qara dəniz regionu ölkələri ali
məktəblərinin rektorlarının 11-ci konfransının
sessiyasında Qara Dəniz Universitetləri Şəbəkəsinin Baş
Assambleyasının qərarına əsasən Azərbaycan Dövlət Aqrar
Universiteti təşkilata üzv qəbul olunub. Təşkilat
dünyanın 12 ölkəsinin 120 universitetini özündə
birləşdirməklə, üzvlər arasında təhsil, elmi-tədqiqat və
mədəniyyət sahələrində əməkdaşlığın inkişaf etdirilməsi
missiyasını yerinə yetirir. Hazırda Gəncə şəhərindən
yalnız Azərbaycan Dövlət Aqrar Universiteti qeyd olunan
təşkilatın tamhüquqlu üzvüdür.
İctimai təşkilatlar
Azad Həmkarlar İttifaqı Komitəsi.
Azərbaycan Dövlət Aqrar Universitetində həmkarlar
ittifaqı təşkilatı 1929-cu ildən fəaliyyət göstərir.
Hazırda ittifaqın 1013 üzvü var. İttifaqın fəaliyyəti
müxtəlif istiqamətlidir. İttifaq üzvlərinin əmək, sosial,
iqtisadi hüquqlarının və qanuni mənafelərinin müdafiəsi,
müəssisənin rəhbərliyi ilə əməkdaşlıq çərçivəsində
ittifaq üzvlərinin mənafelərini təmsil etməsi, kollektiv
danışıqların aparılması, kollektiv müqavilənin
bağlanması və onun yerinə yetirilməsinə nəzarətin həyata
keçirilməsi, əməyin mühafizəsinə, ətraf mühitə,
sağlamlığa mənfi təsir göstərən faktorların aradan
qaldırılmasına, üzvlərinin sağlam və təhlükəsiz iş
şəraiti ilə təmin edilməsinə ictimai nəzarətin təşkili
və s. kimi müxtəlif səpgili işlər görürlər.
ADAU Həmkarlar İttifaqı Komitəsinin 11 üzvü var.
Komitənin nəzdində 5 fakültə və 3 şöbə həmkarlar
ittifaqı təşkilatı fəaliyyət göstərir.
Tələbə Azad Həmkarlar İttifaqı Komitəsi
Tələbə Həmkarlar İttifaqı Komitəsi universitetdə 1935-ci
ildən fəaliyyət göstərir. Komitənin fəaliyyət
istiqamətlərinə həmkarlar ittifaqı üzvlərinin əmək,
sosial, hüquqlarının və mənafelərinin müdafiəsi,
həmkarlar ittifaqı üzvlərinin, onların ailə üzvlərinin
sağlamlığına qayğı göstərilməsi, onların təqaüd
təminatının, sanatoriya, kurort müalicəsinin və
istirahətinin, asudə vaxtının səmərəli təşkili, bədən
tərbiyəsi və idmanın inkişaf etdirilməsi daxildir.
Tələbə Elmi Cəmiyyəti
Tələbə Elmi Cəmiyyəti (TEC) universitet daxilində
yaradılmış ictimai təşkilat olub, universitetin elmi
işlər üzrə prorektoruna tabedir. TEC-in şurası və
redaksiya heyəti mövcuddur. TEC-in Şurası
universitetdə olan bütün fakültələri təmsil etməklə 20
nəfərdən ibarətdir. Yəni, şuraya hər fakültənin tələbə
elmi cəmiyyətinin sədri, onun rəhbərliyi altında
fəaliyyət göstərən komitə üzvləri və bir qrup əlaçı
tələbələr daxildir. TEC 30 kafedrada müxtəlif ixtisas
istiqamətli elmi dərnəklər əsasında fəaliyyət göstərir.
Cəmiyyətin əsas məqsədi tələbələrin elmə meyilinin və öz
ixtisasları üzrə biliklərinin artırılmasıdır.
Cəmiyyətin vəzifələrinə tələbələrin elmi marağının
artırılması ilə bağlı tədbirlər, intellektual oyunların
təşkili, fənn olimpiadalarında tələbələrin iştirakının
təmini, fakültədaxili yarışların keçirilməsi, əlaçı və
yaxşı qiymətlərlə oxuyan tələbələrin müvafiq kafedralara
istiqamətləndirilməsi, elmi seminar və konfransların
təşkili, fəal tələbələrin bu konfranslarda iştirakının
təmin edilməsi, tələbələrin elmi məqalələrinin nəşr
edilməsi daxildir.
Tələbə Gənclər Təşkilatı
ADAU-da TGT 2005-ci ildən fəaliyyət göstərir. Təşkilat
Azərbaycan Respublikasının Konstitusiyasına,
qanunlarına, Gənclər və İdman Nazirliyinin, Təhsil
Nazirliyinin qərar, əmr və tövsiyələrinə və təşkilatın
əsasnaməsinə uyğun fəaliyyət göstərir.
Təşkilatın əsas məqsədi dövlət gənclər siyasətinin
həyata keçirilməsi istiqamətində tələbələrin və
ayrı-ayrılıqda hər bir tələbənin maraqlarını təmsil və
müdafiə etmək, respublikanın ictimai, mədəni, sosial,
iqtisadi həyatında onların fəal iştirakını təmin
etməkdir.
Tələbələrin sosial problemlərinin həlli istiqamətində,
eləcə də tələbələr arasında maarifləndirmə işlərinin
aparılması, tələbələrin asudə vaxtının səmərəli təşkil
edilməsi, tələbələrin hüquqlarının təmin edilməsi,
respublikanın daxilində və xaricində keçirilən
müsabiqələrdə, olimpiadalarda, sərgilərdə istedadlı və
yaradıcı tələbələrin iştirakını, tələbələr arasında
narkomaniya, alkoqolizm, cinayətkarlıq və digər neqativ
meyillərə qarşı profilaktik tədbirlərin həyata
keçirilməsi, tələbələrin iştirakı ilə müsabiqələrin,
seminarların, festivalların, forumların, toplantıların,
sərgilərin, aksiyaların, "dəyirmi masa"ların, elmi
konfransların, təlim kurslarının, kütləvi təbliğat
kampaniyalarının, diskusiya klublarının, müzakirələrin,
simpoziumların, görkəmli şəxslərlə görüşlərin təşkil
edilməsi də təşkilatın işinə daxildir.
Tələbə həyatı - Enactus
Azərbaycan Dövlət Aqrar Universitetinin "Enactus" (SIFE)
komandası ilk olaraq 2008-ci ildə yaranıb. 2009-cu ildə
keçirilən yarış zamanı respublika çempionu adını
qazanıb. Almaniya Federativ Respublikasında Dünya kuboku
yarışında Azərbaycanı təmsil edib. 2012-ci ildə MDB
dövlətləri arasında keçirilən "SIFE SİLK ROAD" adlı
Beynəlxalq konfransda universitetlərarası dörd komanda
içərisində Azərbaycan Dövlət Aqrar Universitetinin "Enactus"
(SIFE) komandası seçilib və bütün komanda üzvləri
sertifikatla təltif olunub. 2012-ci ildə isə Milli
çempionatda iştirak edərək "SPRİT of SIFE" (SIFE-ın ruhu)
kubokunu əldə etmiş və "İlin komandası" nominasiyasında
fərqlənmişdir.
2013-cü ildə isə milli çempionatda iştirak edərək "Ən
güclü region komanda" adına və həmçinin komandanın
yarışda təqdim etdiyi layihələrdən biri olan "Qida
məhsullarının təhlükəsizliyi" layihəsi münsiflər
heyətinin üzvləri tərəfindən "İlin ekoloji və sosioloji
layihəsi" fəxri diplomu ilə mükafatlandırılıb.
Hazırda ADAU-nun "Enactus" (SIFE) komandası başqa
ölkələrin komandaları və digər universitetlərin
tələbələri ilə də əməkdaşlıq edir. ADAU "Enactus" (SIFE)
komandası Azərbaycan Respublikası Kənd Təsərrüfatı
Nazirliyi, Almaniyanın GTZ şirkəti, Elba MMC, "Çinar
Otel" İstirahət Mərkəzi, "My Way otel", "Pal Market" ,
"Kəpəz Alçı" MMC, AURA PARK və başqa sponsorlarla
layihələr həyata keçirib. Layihələrdən bir neçəsi bitsə
də "Virtual Market", "Yaşıl Çay" "TRASEKA" (Qədim İpək
yolu ) layihələri davam edir.
Məzun
yarmarkası
Hər il universitetdə məzun yarmarkası təşkil olunur.
Yarmarkalarda rayonların icra hakimiyyətləri, Kənd
Təsərrüfatı Nazirliyi, Ekologiya və Təbii Sərvətlər
Nazirliyi, Əmək və Əhalinin Sosial Müdafiəsi Nazirliyi
Dövlət Məşğulluq Xidməti və digər orqan və təşkilatların
tabeliyində olan firma, müəssisə və təşkilatın
nümayəndəsi iştirak edir, məzunlarımıza yüzlərlə vakant
iş yeri təklif olunur. Bu il ulu öndər Heydər Əliyevin
anadan olmasının 92-ci ildönümü və 2015-ci ilin "Kənd
təsərrüfatı ili" elan olunmasi ilə əlaqədar Azərbaycan
Dövlət Aqrar Universitetində Kənd Təsərrüfatı Nazirliyi,
"Aqrolizinq" ASC-nin təşkilatçılığı ilə əmək yarmarkası
keçirilib. Yarmarkada respublikanın kənd təsərrüfatı
sahəsində fəaliyyət göstərən 15-dən çox şirkəti, 500
nəfərdən çox iş axtaran məzun iştirak edib.
ADAU-nun uğurları
Azərbaycan Respublikasının Prezidenti yanında Elmin
İnkişafı Fondu tərəfindən ölkənin bir sıra ali təhsil
müəssisələrində aparılan əhəmiyyətli elmi araşdırma və
tədqiqatların daha yüksək səviyyədə dəstəklənməsinə
yönəlmiş layihələrin həyata keçirilməsi qrantların yolu
ilə ünvanlı şəkildə maliyyələşdirilməsi məqsədilə ilk
dəfə olaraq keçirilmiş "Universitet qrantı"
müsabiqəsində Azərbaycan Dövlət Aqrar Universitetindən
təqdim olunmuş "Azərbaycanın qərb bölgəsində
meyvə-tərəvəz bitki genetik ehtiyatlarının
müəyyənləşdirilməsi və səmərəli istifadənin təşkili" və
"Üzümün başlıca xəstəlik törədiciləri - Oidium (Uncinula
necator) və Milyunun (Plasmopara viticola) erkən
diaqnostikasının təşkilində DNT əsaslı texnologiyanın
tətbiqi" layihələrdə qalib olub.
Təhsil Nazirliyinin "İctimai Təşəbbüslərin dəstəklənməsi
layihəsi" çərçivəsində Azərbaycandan Kənarda Təhsil
Almış Məzunlar Təşkilatının hazırladığı Azərbaycanda ali
məktəblərin reytinq cədvəlinə əsasən universitet Gəncə
şəhərində yerləşən ali təhsil müəssisələri arasında 1-ci
və respublikada 7-ci yeri tutub. Universitetin
tələbələrdən ibarət "Enactus" komandası 30-31 may
2015-ci ildə Bakı şəhərində keçirilmiş tələbələrin azad
sahibkarlıq fəaliyyəti proqramı üzrə X milli çempionatın
qalibi olaraq Cənubi Afrika Respublikasında keçiriləcək
beynəlxalq çempionatda ölkəmizi təmsil etmək hüququ
qazanıb.
Universitetdə mütəxəssis hazırlığı aparılan ixtisaslara
peşəyönümü üzrə abituriyentlərin maarifləndirilməsi
məqsədilə alimlər Gəncənin və rayonların orta
məktəblərində pedaqoji heyət və buraxılış sinif
şagirdləri ilə görüşlər keçirir.
Bununla yanaşı, universitetin fəaliyyətini əks etdirən
20 dəqiqəlik film AzTV, ATV, Kəpəz TV və Tovuz TV
vasitəsilə yayımlanıb, AzTV-nin "Günün nəbzi"
proqramında universitet rəhbərliyi nümayəndələrinin
iştirakı ilə "dəyirmi masa" keçirilib.
2014/2015-ci tədris ilinin payız semestrinin imtahan
sessiyasını əla qiymətlərlə başa vuran əyani təhsil
forması üzrə 236 əlaçı tələbədən 53-ü öz arzusu ilə "2
fevral-Azərbaycan gəncləri günü" münasibəti ilə yeddi
gün müddətində respublikamızın Qax və Zaqatala
rayonlarının istirahət mərkəzlərinə qış tətilinə
göndərilib.
Universitetdə aqrar sahə üçün mütəxəssis hazırlığı ilə
yanaşı çoxlu sayda mədəni-kütləvi tədbirlər keçirilib.
Bu tədbirlər tələbələrin hərbi vətənpərvərlik ruhunda
tərbiyə olunmalarında müstəsna əhəmiyyət kəsb edir.
Bu il Tələbə Gənclər Təşkilatının təşəbbüsü ilə Milli
Qəhrəman, Azərbaycanın igid oğlu Mübariz İbrahimovun
doğum günü münasibətilə Biləsüvar rayonuna səfər təşkil
olunub.
Mayın 6-da Azərbaycan Dövlət Aqrar Universitetində
ümummilli lider Heydər Əliyevin anadan olmasının 92-ci
ildönümünə və 2015-ci ilin Azərbaycanda "Kənd
təsərrüfatı ili" elan edilməsinə həsr olunmuş
"Azərbaycanda aqrar sektorun yeni infrastrukturu: aqro
parklar, onların yaradılmasının zəruriliyi və
innovasiyalı inkişafda rolu" respublika elmi-praktik
konfransı keçirilib. Həmçinin 23-24 oktyabrda
universitetdə Azərbaycan Respublikasında "Kənd
təsərrüfatı ili" elan edilməsinə həsr olunmuş "Aqrar
elmin və təhsilin innovativ inkişafı: dünya təcrübəsi və
müasir prioritetlər" mövzusunda Beynəlxalq elmi-praktik
konfrans keçiriləcək.
Mərkəzlər
Distant və Əlavə Təhsil Mərkəzi 2008-ci ildə yaradılıb.
Mərkəzdə aşağıdakı şöbələr fəaliyyət göstərir:
* Yenidənhazırlanma şöbəsi
* İxtisasartırma və təkmilləşdirmə şöbəsi
* Distant təhsilə xidmət şöbəsi
* Əhaliyə pullu xidmət şöbəsi
Yenidənhazırlanma şöbəsi
Yenidənhazırlanma şöbəsində təhsil - xalq təsərrüfatının
ayrı-ayrı sahələri üçün mütəxəssislərin diplomdansonrakı
təhsilinin yenidən hazırlanma formasının həyata
keçirilməsi "Təhsil haqqında" Azərbaycan Respublikasının
Qanunu və bu istiqamətdə olan mövcud normativ sənədlərə
uyğun aparılır. Həmin qaydalar bu sahədə fəaliyyət
göstərən tədris müəssisələrinin (strukturlarının) işini
tənzimləmək, eləcə də diferensiallaşdırılmış
proqramlarla çevik strukturların yaradılması və bununla
da müxtəlif istehsalat sahələri, iqtisadiyyatın
ayrı-ayrı strukturları, konkret idarə, müəssisə və
təşkilatların mütəxəssislərə olan tələbatının ödənilməsi
məqsədini daşıyır.
Bazar iqtisadiyyatına keçidlə əlaqədar istehsalatın
müxtəlif sahələrində əmələ gələn dəyişikliklər
nəticəsində yeni yaxın ixtisaslı mütəxəssislərə yaranan
tələbatı adi qaydalarla ödəmək mümkün olmadığından
ayrı-ayrı idarə, müəssisə və təşkilatlar, eləcə də
tək-tək vətəndaşlarla bağlanmış müqavilələr əsasında
xüsusi statusu olan tədris müəssisələrində yenidən
hazırlanır.
Yenidənhazırlanma təhsili, baza təhsilinə müvafiq olaraq
əyani formada 9-18 ay, distant və axşam formada 18-24 ay
ola bilər. Təhsil haqqı ixtisaslara uyğun olaraq
fərqlənir.
Yenidənhazırlanma təhsilini müvəffəqiyyətlə başa vuran
müdavimlərə universitetin Dövlət Standartlarına uyğun
diplomu təqdim olunur.
İxtisasartırma və təkmilləşdirmə
şöbəsi
İxtisasartırma və təkmilləşdirmə şöbəsində kənd
təsərrüfatı kadrlarının peşə ustalığının və elmi nəzəri
biliklərinin genişləndirilməsi, elm və texnikanın ən
yeni nailiyyətlərinin mənimsənilməsini və kənd
təsərrüfatı məhsullarının istehsalı prosesində istifadə
olunması məqsədi ilə respublikanın kənd təsərrüfatı
mütəxəssisləri üçün Kənd Təsərrüfatı Nazirliyinin
göndərişi və ya vətəndaşlarla bağlanmış fərdi
müqavilələr əsasında müxtəlif sahələr üzrə (baytarlıq,
zootexnika, mexanikləşdirmə, elektrikləşdirmə,
aqronomluq, bitki mühafizəsi, meliorasiya, ekologiya,
kənd təsərrüfatının iqtisadiyyatı, aqrar siyasət və s.)
ixtisasartırma kursları təşkil edir.
Distant təhsilə xidmət şöbəsi
Distant və Əlavə Təhsil Mərkəzində mövcud olan təhsil
formalarından ən çox tələb olunan distant təhsil olduğu
və həmin təhsil formasının müasir informasiya
texnologiyaları və xüsusilə internetlə bağlılığı və
digər özəllikləri nəzərə alınaraq mərkəzdə Distant
təhsilə xidmət şöbəsi yaradılıb. Şöbə distant təhsilin
təşkili üçün bütün lazımi avadanlıqlar, texnoloji
vəsaitlər və proqram təminatı ilə təmin edilib. Hazırda
şöbə təhsilin elektronlaşdırılma, elektron kitabxananın,
müəllim və tələbələrin elektron məlumat bazasının
yaradılması ilə məşğuldur.
Magistr hazırlığı mərkəzi
Magistr hazırlığı mərkəzi ADAU-nun Elmi Şurasının
qərarına əsasən yaradılıb. Mərkəzin məqsədi ölkədə
yüksək ixtisaslı mütəxəssislərə olan tələbatın təmin
edilməsi, elmi-pedaqoji və elmi-tədqiqat sahəsi üçün
kadrların hazırlanmasından ibarətdir. Magistr hazırlığı
mərkəzi dövlət təhsil standartlarına uyğun olaraq
təhsilin verilməsini, magistrantların müvəffəqiyyət
dərəcəsinə cari, aralıq və yekun attestasiyanı təşkil
edir.
Mərkəzə 17 istiqamətin 44 ixtisaslaşması üzrə magistrant
qəbulu aparılır. Hazırda Magistr hazırlığı mərkəzində
120 nəfər magistrant təhsil alır ki, onlardan 78 nəfəri
əyani, 42 nəfəri isə qiyabi şöbə üzrə olmaqla 8 nəfəri
xarici ölkələrin (İraq və Türkiyə) vətəndaşlarıdır.
Magistrantların təhsili ilə 40-dan çox professor və
universitetin alimləri məşğuldur. Onların rəhbərliyi ilə
magistrantlar ixtisasları üzrə magistrlik dissertasiyası
üzərində işləyir, aparılan elmi-tədqiqatların nəticələri
respublikanın və xarici ölkələrin elmi nəşrlərində dərc
olunur. |
