Javascript DHTML Drop Down Menu Powered by dhtml-menu-builder.com

ARXİV

12 Sentyabr 2015 - №34

 

Qubada məktəb direktorları üçün təlim keçirilib

 

Böyütmək üçün seçinSentyabrın 9-da Təhsil Nazirliyi, "Təhsildə İnnovativ Texnologiyalar" Əlavə Təhsil Mərkəzinin və Paris Sorbonna Universitetinin Abu Dabi kampusunun birgə əməkdaşlığı ilə  Azərbaycan Dövlət İqtisad Universitetinin Qubada yerləşən Tədris, İdman və  İstirahət Kompleksində təşkil olunan "Məktəb idarəetməsi 2" mövzusunda təlim kursu başa çatıb. Qeyd edək ki, kursda  Bakı Şəhəri üzrə Təhsil İdarəsi tərəfindən tövsiyə edilmiş məktəb direktorları ilə yanaşı, 2013-2014-cü ilin buraxılış imtahanlarında yüksək nəticə göstərən Sumqayıt və digər şəhər (rayon) məktəblərinin rəhbərləri iştirak edib. Nəzərə çatdıraq ki, "Məktəb idarəetməsi 1" adlı birinci təlimlər ötən il təşkil edilmiş və  həmin təlimlərdə 32  məktəbin direktoru iştirak etmişdi.

Avqustun 31-dən başlayıb sentyabrın 9-dək davam edən 10 günlük təlim Paris Sorbonna Universitetindən xüsusi dəvət olunmuş professor Florent Pratlong tərəfindən keçirilib. Kursun sonunda iştirakçılara məktəb idarəedilməsi ilə bağlı uzunmüddətli tapşırıq verilib və onun nəticələri əsasında onlayn monitorinq aparılıb.

Qeyd edək ki, təlimlərin gedişini yaxından izləmək, iştirakçıların təlimlərlə bağlı fikirlərini öyrənmək məqsədilə Quba rayonuna ezam olunduq. Təlimdə iştirak edən məktəb rəhbərlərinin və təlimçilərin fikirlərini oxucularımıza təqdim edirik:

İmran Muxtarov, Paris Sorbonna, Abu Dabi Universitetinin postsovet ölkələri üzrə müşaviri:

- Təlimlər professor Florent Pratlong tərəfindən gün ərzində iki dəfə keçirilir. Bu təlim proqramının əsas məqsədi məktəb direktorları üçün qabaqcıl təlim sistemi və effektiv məktəb idarəetməsi anlayışını tanıtmaq, məktəb rəhbərlərinin liderlik potensialını inkişaf etdirməkdir. Əlavə olaraq, kurs çərçivəsində yerli təlimçilər tərəfindən təlim zamanı liderlik, məktəb çərçivəsində şagird sağlamlığının qorunması, vaxtın idarə olunması, təqdimat bacarıqlarının inkişafı və digər mövzularda interaktiv oyunlar, sessiyalar təşkil olunub.

Nəzakət Əsgərova, Bakıdakı Humanitar fənlər təmayüllü məktəb-liseyin direktoru:

- Təlimlər çox yüksək səviyyədə keçdi.  Mən artıq ikinci dəfədir ki, bu təlimlərdə iştirak edirəm. Bu təlimlər sayəsində məktəb idarəetməsində "müasir yanaşma"nın tətbiqini daha dərindən öyrənirik. Bundan başqa məktəb direktorları ilə idarəetmənin müxtəlif mövzularında geniş müzakirələr aparırıq. Düşünürəm ki, bu müzakirələrdən də çox şeylər əldə edirik.

Yusif Cəfərov, Yevlax şəhər Aran qəsəbə 1 nömrəli tam orta məktəbin direktoru:

- Təlimlərin başlıca vəsifəsi məktəbşünaslıqda və idarəetmədə innovasiyaların tətbiqini nəzərdə tutur. Bu kimi təlimlər biz məktəb rəhbərlərinin idarəetmədə yeni üsullardan istifadə etməsinə kömək edir. Təlimləri çox səmərəli hesab edirəm. Belə təlimlərin tez-tez keçirilməsini arzulayıram.

Ceyran Novruzova, Bakıdakı 114 nömrəli tam orta məktəbin direktoru: 

- Təlimlərdə liderlik qabiliyyəti, valideyn, şagird və müəllimlərlə ünsiyyətin daha yaxşı qurulması baxımından bir çox şeylər öyrəndik. Bu təlim zamanı əldə etdiyim bilikləri yeni tədris ilindən tətbiq etməyə başlayacağam. Təlimlərin çox effektiv keçdiyini və yüksək səviyyədə təşkil olunduğunu düşünürəm.

Kəmalə Əhmədova, Zaqatala rayonu, akademik Zərifə Əliyeva adına texniki fənlər təmayüllü liseyin direktoru:

- Mən şəxsən təlim müddətində bir çox yeni yanaşmalar öyrəndim. Təlim zamanı bildiyimiz mövzular da var idi. Bu biliklərimizi daha da təkmilləşdirdik. Ən əsası isə burada respublikamızın öndə gedən məktəblərinin rəhbərləri ilə idarəetmə və digər mövzularda fikir mübadilələri apardıq. Düşünürəm ki,  bu bizim ümumi işimizə çox müsbət təsir edəcək.

Nəzərə çatdıraq ki, sentyabr ayının 21-də Fransanın ölkəmizdəki səfirliyində   təlimlərdə iştirak edən direktorlara sertifikatların verilməsi ilə bağlı mərasim keçiriləcək. 

Niyazi RƏHİMOV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov