|
 Gəncə
Dövlət Universitetində 15 sentyabr - Bilik günü
münasibətilə təntənəli tədbir keçirilib. Tədbiri
universitetin rektoru, professor Yusif Yusibov açaraq
tələbələri, valideynləri, müəllim və digər
iştirakçıları təbrik edib, onlara yeni tədris ilində
cansağlığı və yeni-yeni uğurlar diləyib. Rektor qeyd
edib ki, bu il universitetə 1239 nəfər tələbə qəbul olub.
Onlardan 66 nəfəri 500-600 arası, 3 nəfəri isə 600-dən
yuxarı bal toplayıb.
Professor Y.Yusibov xüsusi qeyd edib ki, möhtərəm
Prezidentimiz cənab İlham Əliyevin təhsilə göstərdiyi
qayğı və diqqəti sayəsində universitet son illər sürətlə
inkişaf edib, tədris binaları yüksək səviyyədə təmir
edilib, müasir tələblərə cavab verəcək maddi-texniki
baza ilə zənginləşdirilib. Tədris prosesində yeni
informasiya texnologiyalarından geniş istifadə edilir.
Bu məqsədlə universitet yeni informasiya texnologiyaları
ilə müvafiq şəkildə təmin edilib, "ağıllı lövhələr", ağ
lövhələr, surətçoxaldan, digər texniki vasitələr alınıb,
bütün kafedralar, şöbə və dekanlıqlar və digər struktur
bölmələr kompüterlərlə təchiz olunub, yüksəksürətli (15
meqabit) internetə çıxış təmin edilib. Rabitə və Yüksək
Texnologiyalar Nazirliyinin dəstəyi ilə "Aztelekom" İB
tərəfindən korpuslara "Fiber optik kabel"in çəkilişi
uğurla başa çatdırılıb. Fasiləsiz işləyən İnternet xətti
professor-müəllim heyəti və tələbələrin operativ
informasiya mübadiləsini təmin edir. Gəncə Dövlət
Universitetinin xüsusi saytı yaradılıb, burada
universitet həyatı, struktur bölmələr, tədris prosesi,
elmi-tədqiqat fəaliyyəti haqqında zəruri informasiyalar
yerləşdirilib.
Universitetin onlarla tələbə, magistr və gənc müəllimi
öz təhsilini xarici ölkə universitetlərində
təkmilləşdirib. Təkcə onu demək kifayətdir ki, ötən ildə
qardaş Türkiyə Cümhuriyyətində "Mövlana" mübadilə
proqramı çərçivəsində iyrimi ali təhsil müəssisəsi,
Avropa və MDB ölkələri, həmçinin Azərbaycanın ali
məktəbləri və tədqiqat institutları ilə əməkdaşlıq
uğurla davam etdirilir.
Bundan əlavə, universitet kurikulum sisteminin Avropa
standartlarına uyğunlaşdırılması məqsədi daşıyan "CURDEUS",
beynəlxalq əlaqələrin təkmilləşdirilməsi və yenidən
qurulmasına xidmət edən "UNİVİA", əlil tələbələrin
təhsilə cəlb edilməsi məqsədilə yaranmış "ESVİDİP"
layihələrində də yaxından iştirak edir.
Tədbirdə tədrisin təşkili və təlim texnologiyaları üzrə
prorektor, dosent Fəxrəddin Məmmədov, elm və
innovasiyalar üzrə prorektor, dosent Pərvin Kərimzadə,
humanitar məsələlər üzrə prorektor Asif Cavadov,
botanika kafedrasının müdiri, biologiya elmləri doktoru,
professor, əməkdar elm xadimi Vaqif Novruzov,
valideynlərdən Azər Məmmədov, Namiq Pənahov, 115 bal
toplamış magistrant Nurənə Məmmədova, ingilis dili
müəllimliyi ixtisasına 605 balla qəbul olmuş Aysel
Qələndərova çıxış edərək öz ürək sözlərini bildiriblər.
Sonda rektor Yusif Yusibov yüksək bal toplayan
tələbələrə tələbə biletlərini təqdim edib, onlarla
xatirə şəkli çəkdirib.
Maqbet ƏHMƏDOV,
GDU-nun Mətbuat xidmətinin rəhbəri |
