|
 Naxçıvan
Muxtar Respublikası Ali Məclisi Sədrinin 2015-ci il
iyulun 27-də imzaladığı "Ali və orta ixtisas təhsili
müəssisələrində ixtisasların müvafiq təşkilatlara
hamiliyə verilməsi haqqında" sərəncamına uyğun olaraq
Naxçıvan Muxtar Respublikası Təhsil Nazirliyinin
tədbirlər planı hazırlanmışdır. Naxçıvan Muxtar
Respublikasının təhsil naziri Piri Nağıyev və nazirliyin
əməkdaşları həmin sərəncamdan irəli gələn vəzifələrin
icrası ilə bağlı Naxçıvan Dövlət Universitetinin
pedaqoji profilli hamiliyə götürülmüş ixtisaslarında
təhsil alan tələbələrlə görüş keçirib.
Tədbiri universitetin rektoru, AMEA-nın müxbir üzvü
Saleh Məhərrəmov açaraq, Azərbaycanda təhsilin inkişaf
strategiyasından, ümummilli lider Heydər Əliyevin təhsil
siyasətinin uğurlu davamından danışıb. Qeyd olunub ki,
Naxçıvan Dövlət Universiteti tarixi inkişaf yolu keçən,
çoxillik ənənələrə söykənən, yüksək ixtisaslı
mütəxəssislər yetişdirən, güclü maddi-texniki bazaya
malik olan, beynəlxalq əlaqələrini günbəgün
genişləndirən ali təhsil ocağıdır. Rektor 27 iyul
2015-ci il tarixli sərəncamın təhsil tarixindəki mühüm
əhəmiyyətindən danışıb.
Naxçıvan Muxtar Respublikasının təhsil naziri Piri
Nağıyev tədbirdə çıxış edərək vurğulayıb ki, bu gün
muxtar respublikamızda təhsilə diqqət və qayğı ən yüksək
səviyyədədir. Yeni məktəb binalarının tikilib istifadəyə
verilməsi, onların yüksək maddi-texniki baza və ən
müasir informasiya-kommunikasiya texnologiyaları ilə
təchizatı bu qayğının bariz nümunəsidir. Nazir Naxçıvan
Muxtar Respublikası Ali Məclisi Sədrinin 2015-ci il
iyulun 27-də imzaladığı "Ali və orta ixtisas təhsili
müəssisələrində ixtisasların müvafiq təşkilatlara
hamiliyə verilməsi haqqında" sərəncamın ali və orta
ixtisas təhsili müəssisələri, nazirliklər, komitələrlə
belə əlaqəli tədbirlər, bilik və təcrübə mübadiləsi,
mövcud problemlərin aradan qaldırılması, gələcək
pedaqoji fəaliyyət prinsiplərinin düzgün
müəyyənləşdirilməsi baxımından mühüm əhəmiyyət kəsb
etdiyini bildirib.
Ali və orta ixtisas məktəblərinə həm sənədvermə, həm də
qəbulun nəticələrinin ilbəil yaxşılaşdığını vurğulayan
təhsil naziri qeyd edib ki, 2014-cü ildə 117 ümumtəhsil
məktəbinin məzunları qəbul imtahanlarında yüksək
nəticələr göstərmişdisə, 2015-ci ildə belə məktəblərin
sayı 129-a çatıb. Piri Nağıyev vurğulayıb ki, 2015-ci
ildə 1137 nəfər, yaxud qəbul olanların 72 faizi Naxçıvan
Muxtar Respublikasında yerləşən ali təhsil
müəssisələrini seçib. Nazir bir faktı da diqqətə
çatdırıb ki, bu il yüksək balla ali məktəbə qəbul olaraq
Prezident təqaüdünə layiq görülən 8 tələbənin 4-ü
Naxçıvan Dövlət Universitetinin tələbəsidir.
Tədbirdə muxtar respublikada müəllim əməyinin
qiymətləndirilməsinin daim diqqət mərkəzində
saxlanıldığını nəzərə çatdıran Piri Nağıyev vurğulayıb
ki, Naxçıvan Muxtar Respublikası Ali Məclisi Sədrinin
"Naxçıvan Muxtar Respublikasının dövlət ümumi təhsil
müəssisələrində çalışan, bilik və bacarıqlarının
qiymətləndirilməsi aparılan müəllimlərin dərs yükünün və
əmək haqqının artırılması haqqında" 2015-ci il 22 iyun
tarixli Sərəncamı müəllim əməyinə, ümumilikdə, təhsilə
göstərilən dövlət qayğısının bariz nümunəsidir.
Sonda nazir tələbə-gənclərə vətənpərvər, dövlətçiliyə və
xalqa sədaqətli gənc nəsil kimi yetişmələrini
arzulayaraq onlara, bu yolda uğurlar diləyib.
Naxçıvan Muxtar Respublikası təhsil nazirinin müavini
Məmməd Qəribov bildirib ki, Təhsil Nazirliyinin
əməkdaşları sərəncamdan irəli gələn vəzifələrin icrası
ilə bağlı dəfələrlə Naxçıvan Dövlət Universitetində
olaraq tələbələrlə görüşüb və onlarla söhbətlər aparıb,
kurikuluma aid metodiki vəsaitlər, nazirliyin
tabeliyində olan ümumtəhsil məktəbləri haqqında yazılı
məlumatlar tələbələrə paylanılıb.
Mina QASIMOVA,
NDU-nun Mətbuat şöbəsinin əməkdaşı |
