|
Oruc MUSTAFAYEV,
"Azərbaycan müəllimi"
Qəzetimizin 19 sentyabr 2015-ci il tarixli sayında
Böyük Britaniyanın "Quacquarelli Symonds" şirkətinin
dünyanın ən nüfuzlu ali məktəblərinin reytinq cədvəli (QS
World University Rankings) dərc olunub. Oktyabrın 1-də
isə Britaniyanın Times Higher Education jurnalı
2015-2016-cı illər üzrə dünyanın ən yaxşı 800
universitetinin növbəti reytinq cədvəlini açıqlayıb.
Ali məktəblərin akademik nüfuzunun ən böyük beynəlxalq
tədqiqatçılarından hesab olunan Times Higher
Education-un sayca 12-ci araşdırması dünya ölkələrindən
10 minə yaxın ali məktəbi əhatə edir. Reytinq Thomson
Reuters kompaniyasının təqdim etdiyi ali məktəblərin
fəaliyyətini əks etdirən məlumatlara əsaslanır.
Cədvələ Amerikanın Kaliforniya Texnologiya İnstitutu
başçılıq edir. İkinci yerdə Böyük Britaniyanın Oksford,
üçüncü yerdə isə ABŞ-ın Stenford Universiteti
qərarlaşıb. İlk ən yaxşı 10-luqda Kembric Universiteti
(4-cü yer), Massaçusets Texnologiya İnstitutu (5-ci yer),
Harvard Universiteti (6-cı yer), Prinston Universiteti
(7-ci yer), London İmperial Kolleci (8-ci yer), İsveçrə
Federal Texnologiya İnstitutu (9-cu yer), Çikaqo
Universiteti (10-cu yer) yerləşiblər.
Reytinq cədvəlində əsasən ABŞ və Böyük Britaniya
universitetləri dominantlıq təşkil edir. Siyahıda 800
universitet arasında ABŞ 147, Böyük Britaniya 78,
Yaponiya 41, Almaniya və Çin hərəsi 37, İtaliya 34,
Avstraliya 31, Fransa 27, İspaniya və Kanada hərəsi 25
ali məktəblə təmsil olunur. Reytinqin direktori Fill
Beytin sözlərinə görə, kontinental Avropada daha yaxşı
dinamikanı İsveçrə, Almaniya və Niderland, eləcə də
builki reytinqdə ilk dəfə yer almış digər 12 ölkədən
olan universitetlər nümayiş etdiriblər. Onlar getdikcə
ABŞ-Böyük Britaniya universitetlərinin üstünlüyünü
zəiflətməkdədir. Rusiyanı reytinqdə 13 universitet
təmsil edir. Onların arasında ən yüksək mövqeni 161-ci
yerlə M.V.Lomonosov adına Moskva Dövlət Universiteti
nümayiş etdirir. MDU ötənilki reytinqlə müqayisədə 35
yer qabağa keçib. Yaponiya və Cənubi Koreya
universitetləri orta hesabla öz mövqelərini itiriblər.
Çin universitetləri də öz vəziyyətlərini yaxşılaşdıra
bilməyiblər.
Qeyd edək ki, reytinq ali məktəblərin fəaliyyətini 13
əsas kriteriya - elmi-tədqiqatlar, biliklərin
ötürülməsi, beynəlxalq perspektivlər və dünya
reytinqləri üçün unikal hesab olunan - tədris mühiti və
s. üzrə qiymətləndirib. Reytinqlə daha ətraflı
www.timeshighereducation.com/world-university-rankings/2016/world-ranking
səhifəsindən tanış olmaq olar.
|
