|
 Bakı Dövlət Universitetində Almaniyanın Vürsburq
Universiteti ilə imzalanmış memoranduma əsasən Avropa
Hüququ Magistr Proqramının növbəti məzunlarına “ikili
diplom” verilməsinə həsr olunmuş tədbir keçirilib.
Vürsburq Universitetinin prorektoru, professor Exard
Paxenin rəhbərlik etdiyi nümayəndə heyətinin iştirakı
ilə keçirilən tədbirdə çıxış edən rektor, akademik Abel
Məhərrəmov ikitərəfli əməkdaşlıqdan məmnunluğunu ifadə
edib. Rektor Avropa Hüququ Magistr Proqramının hazırkı
vəziyyəti və inkişaf perspektivləri barədə fikirlərini
bölüşüb.
Professor Exard Paxen yenidən BDU-da olmasından
məmnunluğunu söyləyərək, proqramın əhəmiyyəti barədə
danışıb. O, məzunların ölkələrarası əməkdaşlığın
müxtəlif sahələrinin inkişafına töhfələr verəcəklərinə
əminliyini ifadə edib, proqram çərçivəsində bu il
BDU-nun daha 3 tələbəsinin Vürsburqda təhsilini davam
etdirəcəyini əlavə edib. E.Paxen universitetlə gələcək
əməkdaşlıqdan, o cümlədən noyabr ayında BDU-da
keçiriləcək birgə beynəlxalq konfransdan bəhs edib.
Hüquq fakültəsinin dekanı, professor Əmir Əliyev
proqramın həyata keçirilmə prosesindən, onun uğurlu
nəticələri və indiyədək “ikili diplom” alan 12 məzundan
6 nəfərinin BDU-da tədrisə cəlb edildiyindən danışıb.
Sonra proqramın növbəti məzunlarına diplomlar
təqdim edilib.
Qeyd edək ki, 2011-ci ilin sentyabr ayından
etibarən Bakı Dövlət Universitetində Avropa hüququ
ixtisası üzrə magistratura proqramı fəaliyyət göstərir.
Hazırda tədris ingilis və alman dillərində aparılır.
Alman tərəfi proqramda iştirak edən tələbələr üçün
intensiv alman dili kursları və Almaniyada təcrübə
təşkil edir, almaniyalı professorlar BDU-da mühazirə
oxuyurlar. Layihənin reallaşdırılması üçün maliyyə
dəstəyi Almaniyanın DAAD təşkilatı tərəfindən həyata
keçirilir və BDU bu qurumum keçənilki
qiymətləndirməsindən uğurla keçib.
Mətbuat və informasiya şöbəsi
|
