|
 Təhsil Nazirliyi ilə Azərbaycan Milli Elmlər
Akademiyası arasında əməkdaşlıqla bağlı əldə olunmuş
razılığa əsasən “Azərbaycan müəllimi” qəzetinin yaradıcı
heyəti oktyabrın 22-də AMEA-nın İnformasiya
Texnologiyaları İnstitutuna mediatur keçirib.
Mediatur iştirakçılarını salamlayan institutun
direktoru, akademik Rasim Əliquliyev rəhbərlik etdiyi
elmi müəssisə haqqında məlumat verib.
Qısa məlumatından sonra akademik R.Əliquliyev
redaksiya əməkdaşlarını bu elm ocağında fəaliyyət
göstərən mərkəzlərlə tanış edib. Öncə tədris-innovasiya
mərkəzinə baxış keçirilib. Məlumat verilib ki,
institutun Tədris-İnnovasiya Mərkəzi doktorant və
dissertantlarla iş, tədrisin təşkili və layihələrin
idarə edilməsi kimi üç sektordan və biri Distant Tədris
Mərkəzi, digəri isə Wiki Mərkəzi olmaqla 2 mərkəzdən
ibarətdir. Mərkəzlər ən müasir İKT avadanlığı ilə yüksək
səviyyədə təchiz olunub. Burada İKT üzrə tədrisin
təşkili, eləcə də distant təhsillə bağlı son
texnologiyalardan istifadə edilir. Mərkəzin iş
pinsipləri haqında jurnalistlərə məlumat verilib.
İnstitutun Multimedia Resursları Mərkəzi də
mediatur iştirakçılarında dərin təəssürat yaradıb.
Onlara məlumat verilib ki, burada institutun əməkdaşları
tərəfindən yazılan kitab, tədris materialları və metodik
vəsaitlər çap olunur, multimedia resurslarının
yaradılması, dizayn, layihələndirmə, qrafika işləri,
elektron resursların saxlanması və s. həyata keçirilir.
İnstitutun nəşriyyatı məhsulun yüksək keyfiyyətini təmin
edən dünya standartlarına uyğun ən müasir rəqəmsal
mətbəə avadanlıqlarına malikdir. Daha sonra
internet-kafeyə baxış keçirilib. Jurnalistlər burada
institut əməkdaşları üçün yaradılmış şəraitlə tanış
olublar.
 E-kitabxana Mərkəzinə baş çəkən mediatur
iştirakçılarına məlumat verilib ki, mərkəzdə fəaliyyət
göstərən Apache platformasında yaradılmış İntellektual
İnformasiya Xidməti Sistemi institutun əməkdaşlarına
xidmət göstərir. Bu sistem vasitəsi ilə hər bir əməkdaş
online formada kitabxanaya daxil olaraq yeni ədəbiyyatla
tanış ola, rəhbərliyin ona ünvanladığı materiallara və
nəşr olunmuş elmi əsərlərinin siyahısına nəzarət edə
bilir. E-kitabxana Mərkəzində yaradılmış imkanlar
kifayət qədər genişdir. Burada həm texniki avadanlıq,
həm də proqram təminatı problemi ən yüksək səviyyədə
həll olunub. Kitabxananın təhlükəsizliyinin təmin
olunması, resursların identifikasiyası, oxucuların
özünəxidməti həyata keçirə bilməsi üçün 3M
texnologiyalarından istifadə olunur.
İTİ-nin AzScienceNet elm kompüter şəbəkəsinə baxış
da mediatur iştirakçılarının dərin marağına səbəb olub.
Jurnalistlərə bildirilib ki, şəbəkənin strukturu Cisco,
HP və İBM firmalarının məhsulları olan telekommunikasiya
və server avadanlıqları əsasında yaradılıb. AMEA-nın 32
institutu və təşkilatının kompüter şəbəkələri fiber
optik kabellə AzScienceNet şəbəkəsinə birləşdirib.
Şəbəkənin internetə çıxış sürəti 270Mbit/san-dır.
İnstitutla tanışlıqdan sonra bu elm ocağının Elmi
Şurasının üzvləri ilə görüş keçirilib. Görüşü giriş sözü
ilə açan institutun direktoru, akademik Rasim Əliquliyev
qəzetin əməkdaşlarını bir daha salamlayaraq onları
rəhbərlik etdiyi müəssisədə görməkdən məmnunluğunu
bildirib və Elmi Şuranın fəaliyyəti, keçirdiyi iclaslar,
müzakirə etdiyi məsələlər haqqında məlumat verib,
elmi-tədqiqat fəaliyyətinin istiqamətlərindən danışıb.
 Görüşdə çıxış edən “Azərbaycan müəllimi” qəzetinin
baş redaktoru, siyasi elmlər üzrə fəlsəfə doktoru,
əməkdar jurnalist Bayram Hüseynzadə Elmi Şura üzvlərini
salamlayaraq, mediatur və görüş üçün institutun
rəhbərliyinə təşəkkür edib, qəzet, eləcə də redaksiyanın
fəaliyyəti, həyata keçirilən layihələr haqqında məlumat
verib. Ölkə elmində gedən yeniləşmə, əldə olunan yeni
elmi nailiyyətlər, Azərbaycan Milli Elmlər Akademiyası
və onun elmi-tədqiqat institutlarının fəaliyyəti
haqqında oxuculara daha geniş, müntəzəm və sistemli
məlumatlar verilməsinin vacibliyini vurğulayan, bunun
üçün də ölkənin elmi qurumları ilə daha sıx əməkdaşlığı
zəruri sayan baş redaktor İTİ ilə “Azərbaycan müəllimi”
qəzeti arasında əməkdaşlığın bu baxımdan faydalı
olacağına əminliyini bildirib.
Sonra institutla redaksiya arasında əməkdaşlığın
konkret istiqamətləri, mövzuları müzakirə olunub.
Mediaturun sonunda xatirə şəkli çəkdirilib.
Yusif ƏLİYEV,
“Azərbaycan müəllimi” |
