|
Yaponiyanın Vaseda Universitetində Azərbaycan haqqında
təqdimat tələbələr tərəfindən maraqla qarşılanıb.
Universitetin professoru Hiroaki Mohri 1991-ci il
oktyabrın 18-də müstəqilliyini bərpa etmiş Azərbaycan
Respublikasının hazırda sürətlə inkişaf edərək regionun
lider dövlətinə çevrildiyini diqqətə çatdırıb. Bildirib
ki, universitetin bir qrup tələbəsi oktyabrın sonlarında
“Yaponiya-Qafqaz iqtisadi və mədəniyyət mübadiləsi
proqramı-2015” çərçivəsində Azərbaycana səfər edəcək.
Həmin tələbələri Azərbaycan haqqında daha ətraflı
məlumatlandırmaq məqsədilə Keyo Universitetinin
azərbaycanlı tədqiqatçısı Aysu Yusifzadə tərəfindən
xüsusi təqdimat hazırlanıb.
Təqdimatla çıxış edən A.Yusifzadə ölkəmizin qədim
sivilizasiyaların qovuşuğunda yerləşdiyini, zəngin
mədəniyyətə malik olduğunu bildirib, müasir Azərbaycanın
uğurları barədə məlumat verib. Qeyd edib ki, Azərbaycan
müstəqilliyini 1991-ci ildə elan etsə də, yalnız 1993-cü
ildə xalqımızın ümummilli lideri Heydər Əliyev
hakimiyyətə qayıtdıqdan sonra əsl bərpa və inkişaf
yoluna qədəm qoyub. Prezident İlham Əliyevin ulu öndərin
müəyyən etdiyi strategiyanı uğurla həyata keçirməsi
nəticəsində Azərbaycan sürətlə müasirləşmə yoluna çıxıb,
beynəlxalq səviyyədə qəbul edilən uğurlara imza atıb.
Azərbaycanın beynəlxalq tədbirlərin keçirildiyi mərkəzə
çevrilməsi, ilk Avropa Oyunlarının ölkəmizdə yüksək
səviyyəli təşkili barədə iştirakçılara ətraflı məlumat
verilib.
Tələbələrin Azərbaycanın tarixi, Ermənistan-Azərbaycan,
Dağlıq Qarabağ münaqişəsi, ilk Avropa Oyunları və digər
mövzularda sualları cavablandırılıb.
Sürətli inkişafı ilə dünyanın diqqət mərkəzində olan
Azərbaycanı daha yaxından tanımaq üçün tələbələrin böyük
həvəs göstərdiyini qeyd edən professor H.Mohri ətraflı
məlumata görə minnətdarlığını bildirib.
Səfər çərçivəsində tələbələrin Bakı şəhərindən başqa,
Quba və Qusar rayonlarına da gedəcəkləri, tarixi və
mədəniyyət abidələri ilə tanış olacaqları, Bakı Dövlət
və Azərbaycan Dillər universitetlərində görüşlər
keçirəcəkləri, müxtəlif mövzularda diskussiyalara
qatılacaqları qeyd edilib.
AZƏRTAC |
