|
 Oktyabrın
27-də Sumqayıt Dövlət Universitetində Azərbaycan
Elmi-Tədqiqat və Layihə-Axtarış Energetika İnstitutu ilə
birgə “Energetikanın müasir elmi-texniki və tətbiqi
problemləri” mövzusunda beynəlxalq elmi konfrans
keçirilib.
Öncə qonaqlar universitetin rektoru Elxan Hüseynovla
“dəyirmi masa” ətrafında elmin, təhsilin inkişafına
dair birgə əməkdaşlığın qarşılıqlı faydaları və
perspektivləri barədə fikir mübadiləsi aparıblar.
Sonra SDU-nun rəhbərliyi, professor-müəllim heyəti və
xarici ölkələri təmsil edən nümayəndələr ümummilli lider
Heydər Əliyevin universitetin foyesindəki büstü önünə
gül dəstələri qoyaraq onun əziz xatirəsini dərin
ehtiramla yad ediblər.
Universitetin akt zalında davam edən konfransın plenar
iclasında rektor Elxan Hüseynov tədbir iştirakçılarını
salamlayaraq bildirib ki, yüksək dinamizmlə inkişaf edən
Azərbaycan imza atdığı yeni və möhtəşəm nailiyyətlər
sayəsində getdikcə daha qüdrətli dövlətə çevrilib.
Azərbaycan Respublikası Cənubi Qafqazın yeganə ölkəsidir
ki, zəngin karbohidrogen ehtiyatlarına, inkişaf etmiş
yanacaq-energetika infrastrukturuna və özünü tam təmin
edən enerji sisteminə malikdir.
Ölkəmizin elektroenergetikasının inkişafına nəzər salan
rektor qeyd edib ki, ümummilli liderimiz Heydər
Əliyevin bilavasitə təşəbbüsü və rəhbərliyi ilə hələ
ötən əsrin 70-ci illərinin əvvəllərindən respublikanın
elektrik enerjisinə olan tələbatının yerli imkanlar
hesabına ödənilməsinə yönəlmiş layihələrin həyata
keçirilməsinə başlanmışdı. Ulu öndərin şah əsəri olan
«Əsrin müqaviləsi», Xəzərin zəngin neft və qaz
ehtiyatlarından istifadə edilməsi üzrə digər
müqavilələrdə nəzərdə tutulan tədbirlərin icrası
hesabına ölkəmizin elektrik enerjisi sistemi
respublikanın bütün ərazisini əhatə etmişdir. Ümummilli
liderin uzaqgörənliklə müəyyənləşdirdiyi mükəmməl
strateji xəttin uğurla həyata keçirilməsi və hazırda
ölkə Prezidenti cənab İlham Əliyev tərəfindən
ardıcıllıqla davam etdirilməsi ölkəmizi regionun aparıcı
dövlətinə, eyni zamanda Avropanın enerji
təhlükəsizliyinin təminatçılarından birinə çevirmişdir.
Qeyd edilib ki, universitet 1962-ci ildə iki ixtisas
üzrə energetika mütəxəssisi hazırlığına başlamış,
hazırda energetika ixtisaslarına qəbulun həcmi təxminən
2 dəfə artırılmışdır. “Azərbaycan üçün mühəndis
təhsilində tədrisin Bolonya prosesinə uyğunlaşdırılması”
mövzusunda Avropa Komissiyasının TEMPUS layihəsi
çərçivəsində universitetin 3 ixtisası - bakalavr təhsili
üzrə proseslərin avtomatlaşdırılması mühəndisliyi,
elektroenergetika mühəndisliyi və magistr təhsili üzrə
kimya sənayesində enerji menecmenti ixtisasları Avropa
Akkreditasiya Agentliyinin (ASİİN) sertifikatına layiq
görülmüşdür.
Zaporojye Dövlət Mühəndislik Akademiyasının elektron
sistemləri kafedrasının müdiri, professor Tatyana
Kritskaya, Azərbaycan Elmi-Tədqiqat və Layihə-Axtarış
Energetika İnstitutunun direktor müavini, professor Əsəf
Hüseynov, İrkutsk şəhərinin L.A.Melentyev adına
Energetik Sistemlər İnstitutunun direktor müavini Sergey
Senderov, aparıcı elmi işçisi Viktor Kupbackiy və
professor Vaqif Salmanov müxtəlif mövzularda slayd
vasitəsilə məruzə etdilər. Ölkəmizin sürətli inkişafının
onlarda heyrətamiz təəssürat yaratdığını və Sumqayıt
Dövlət Universiteti ilə əməkdaşlığın inkişaf
etdirilməsində maraqlı olduqlarını vurğuladılar.
Qonaqlar fizika və elektroenergetika fakültəsində
olublar və bütün fənlər üzrə stendlərlə təchiz olunmuş
müasir laboratoriyalar barədə məlumatlandırılıblar.
Beynəlxalq konfrans öz işini müxtəlif bölmələrdə davam
etdirib.
Mətbuat xidməti |
