|
 Naxçıvan
Muxtar Respublikası Ali Məclisinin Sədri Vasif Talıbov
14 mart 2015-ci il tarixdə “Naxçıvan Muxtar
Respublikasının elm, ali və orta ixtisas təhsili
müəssisələri ilə ümumtəhsil məktəbləri arasında
əlaqələrin təşkili haqqında” sərəncam imzalayıb.
Sərəncamdan irəli gələn vəzifələrin icrası ilə bağlı
Naxçıvan Dövlət Universitetinin professor və müəllim
heyətinin iştirakı ilə muxtar respublikanın ümumtəhsil
məktəblərində ayda bir dəfə nümunəvi dərslər təşkil
olunur. Adıçəkilən sərəncama müvafiq olaraq NDU və
Naxçıvan Muxtar Respublikasının Təhsil Nazirliyi birgə
qrafik hazırlayıb.
Oktyabrın 27-də Naxçıvan Dövlət Universitetinin rektoru,
AMEA-nın müxbir üzvü Saleh Məhərrəmov Şərur rayon Alışar
kənd tam orta məktəbində “Bağırsaqboşluqlular tipinin
morfoloji, fizioloji xüsusiyyətləri” mövzusunda nümunəvi
dərs aparıb. Alim, bu tipə daxil olan hidranın quruluşu,
həyat tərzi, çoxalması haqqında danışıb. Bildirilib ki,
hidranın bədəninin iki qatlı olması, hüceyrələrin tam
diferensasiya etməməsi, digər hüceyrələrə çevrilə bilən
aralıq hüceyrələrin olması bağırsaqboşluqluların sadə
çox hüceyrəlilərdən olduğunu göstərir. Mərcan
poliplərinin quruluşu və həyat tərzini isə izah edərkən
Saleh Məhərrəmov riflərin forma və növləri haqqında
şagirdlərə ətraflı məlumat verib.
Eyni zamanda, həmin tarixdə NDU-nun informatika
kafedrasının dosenti, riyaziyyat üzrə fəlsəfə doktoru
Elşən Məmmədov Şərur rayon Tumaslı kənd tam orta
məktəbində “İnformatika fənninin predmeti. İnformasiya
nəzəriyyəsi və informasiya texnologiyaları” mövzusunda
nümunəvi dərs keçib. Dərs zamanı şagirdlərə informatika
fənni, informasiyanın saxlanması, çevrilməsi, təsviri,
eləcə də informasiyanı sintez edən qurğular haqqında
məlumat verilib. İnformasiya təhlükəsizliyinin metod və
üsulları göstərilib.
Mina QASIMOVA,
NDU-nun Mətbuat şöbəsinin əməkdaşı |
