|
 Oktyabrın
29-da Azərbaycan Respublikasının Təhsil Problemləri
İnstitutunun rəhbərliyi ilə “İnnovativ təlim
metodologiyasının və müvafiq resursların hazırlanması”
mövzusunda seminar-treninqin həyata keçirilməsində
iştirak edən müdavimlərlə görüş keçirilib. Giriş sözü
ilə göruşü açan institutun direktoru Qulu Novruzov
bildirib ki,TPİ “Azərbaycan Respublikasında təhsilin
inkişafı üzrə Dövlət Strategiyası”nın icrası ilə bağlı
qəbul olunmuş “Fəaliyyət Planı”na əsasən Təhsil
Nazirliyi tərəfindən qəbul edilmiş “Tədbirlər
Planı”nında onlarla tədbirin icrasında iştirak edir.
Bu tədbirlərdən biri də təhsilin bütün pillələri üzrə
milli mənəvi və ümumbəşəri dəyərləri qoruyan və inkişaf
etdirən, geniş dünyagörüşünə malik olan, təşəbbüsləri və
yenilikləri qiymətləndirməyi bacaran, nəzəri və praktik
biliklərə yiyələnən, müasir təfəkkürlü və rəqabət
qabiliyyətli kadrlar hazırlamaqdır.
Q.Novruzov bildirib ki, Tədbirlər Planının müvafiq
bəndinin həyata keçirilməsi üçün seminar - treninqin
təlim proqramı və müdavimlərin siyahısı hazırlanıb,
peşəkar təlimçi heyəti təşkil olunub. “İnnovativ təlim
metodologiyasının və müvafiq resursların hazırlanması”
mövzusunda seminar-treninqin proqramı bütün təhsil
pillələri üzrə seçilmiş pedaqoji kadrlar üçün innovativ
təlim metodologiyasının, təlimin məzmununun və müvafiq
resursların yaradılması sahəsində bilik və bacarıqların
formalaşdırılmasını təmin edəcək 60 saatlıq
seminar-treninqin ümumi məzmununu özündə əks etdirir.
Seminar-treninqlərə artıq start verilib.
Direktor onu da əlavə edib ki, noyabr və dekabr
aylarında peşə, orta ixtisas və ali təhsil
müəssisələrinin pedaqoji kadrları üçün
seminar-treninqlər planlaşdırılır. Birinci ongünlükdə
iştirak edəcək məktəbəqədər və ümumtəhsil pilləsinin
pedaqoji kadrları üçün təşkil olunan seminar-treninqin
məzmununa təhsil sistemində innovativ proseslərin idarə
olunması metodologiyası, pedaqoji innovasiyalar,
innovasiyaların tətbiqi zamanı yaranan pedaqoji və
psixoloji problemlərin aradan qaldırılması üçün yeni
metodik vəsaitlərin hazırlanması, müasir təlim
texnologiyalarından istifadənin metod və vasitələri,
innovativ metodiki resursların, elektron dərsliklərin
yaradılması və vəsaitlərin hazırlanmasına verilən
tələblər, müəllimlər, valideynlər, şagirdlər üçün
informativ və maarifləndirici vəsaitlərin hazırlanması
və s. daxildir. Seminar-treninqin təşkil edilməsi
məqsədilə geniş tərkibdə təlimçi heyəti yaradılıb.
Seminar-treninqin məşgələlərini institutun nüfuzlu
alim-təlimçilərdən ibarət heyəti aparır.
Eyni zamanda seminar-treninqlər institutun Əlavə
təhsilin kurikulumu şöbəsinin təşkilatçılığı ilə həyata
keçirilir.
Seminarda TPİ-nin direktor müavini Ənvər Abbasov,
Bakıdakı 279 nömrəli tam orta məktəbin direktoru Oqtay
Səmədov və müdavimlər seminar-treninqlərin təşkilindən
söz açıb, təkliflərini bildiriblər.
Şakir CƏFƏROV,
“Azərbaycan müəllimi” |
