|
 Noyabrın
10-da Sumqayıt Dövlət Universitetində Azərbaycanın xalq
şairi, dramaturq, Azərbaycan Milli Elmlər Akademiyasının
həqiqi üzvü, professor Bəxtiyar Vahabzadənin 90 illik
yubileyi təntənə ilə qeyd olundu.
Tədbiri giriş sözü ilə elmi işlər üzrə prorektor,
professor Ramazan Məmmədov açaraq qeyd etdi ki,
dövlətimizin başçısı cənab İlham Əliyevin Bəxtiyar
Vahabzadənin 90 illik yubileyinin keçirilməsi haqqında
imzaladığı sərəncam görkəmli şairin irsinə verilən
qiymətin bariz nümunəsidir. Əvəzsiz şair və
ədəbiyyatşünas, ictimai xadim, akademik Bəxtiyar
Vahabzadə çağdaş Azərbaycan ədəbi-bədii, ictimai-siyasi
həyatında tanınmış şəxsiyyətlərdən biri olub. O, geniş
və səmərəli bədii yaradıcılıq yolu, elmi, pedaqoji
fəaliyyəti ilə müasir Azərbaycan ziyalılığının
salnaməsinə ən qiymətli töhfələrini vermişdir.
Filologiya fakültəsinin dekan əvəzi, dosent Avtandil
Ağbaba çıxışında bildirdi ki, Bəxtiyar Vahabzadə
Azərbaycan ədəbiyyatı tarixinin xüsusi mövqeyə malik
görkəmli simalarındandır. Sənətkarın insanı daim mənəvi
ucalığa səsləyən poetik-fəlsəfi məzmunlu yaradıcılığı
milli poeziyada vətəndaşlıq ruhunun qüvvətlənməsində və
ədəbi-ictimai fikrin istiqlal ideyaları ilə
zənginləşməsində böyük rol oynamışdır. Tarixi-mədəni
dəyərlərə ehtiram və ana dilinin saflığının qorunması
Bəxtiyar Vahabzadənin fəaliyyətinin mühüm
istiqamətlərindən birini təşkil edirdi.
Azərbaycan və xarici ölkələr ədəbiyyatı kafedrasının
professoru, Dövlət mükafatı laureatı, əməkdar elm xadimi
Məhərrəm Qasımlı, universitetin qocaman müəllimi,
professor Həsən Sadıqov və professor Aslan Bayramov
ölməz xalq şairi Bəxtiyar Vahabzadə ilə bağlı
xatirələrini dilə gətirərək qeyd etdilər ki, o, şair
olmaqla yanaşı, həm də bir müəllim kimi könüllərdə sevgi
qazanıb.
Yubiley tədbirində tələbələrin ifasında şairin
şeirlərindən və poemalarından parçalar səsləndirildi.
Mətbuat xidməti |
