|
 Noyabrın
6-da Sumqayıt Paralimpiya İdman Kompleksində I Uşaq
Paralimpiya İdman Oyunları keçirilib. Respublikamızda
ilk dəfə keçirilən yarışlar Milli Paralimpiya Komitəsi
və “Azercell” Telecom MMC-nin birgə təşkilatçılığı ilə
reallaşıb.
AZƏRTAC xəbər verir ki, yarışlara Bakı və Sumqayıt
şəhərlərindən, həmçinin Ağdaş və Şəki rayonlarından
sağlamlıq imkanları məhdud 50-yə yaxın uşaq qatılıb.
Açılış mərasimində Birləşmiş Millətlər Təşkilatının Uşaq
Fondunun (UNICEF) Azərbaycandakı nümayəndəsi Andro
Şilakadze, Milli Paralimpiya Komitəsinin prezidenti
İlqar Rəhimov, “Azercell” Telecom MMC-nin prezidenti
Vahid Mürsəlimov, ikiqat paralimpiya oyunları çempionu,
ikiqat dünya çempionu, beşqat Avropa çempionu, əməkdar
idman ustası, “Şöhrət” ordenli İlham Zəkiyev və Milli
Paralimpiya Komitəsinin birinci vitse-prezidenti, Uşaq
Paralimpiya Komitəsinin idarə heyətinin sədri Natiq
Qasımov yarış iştirakçılarını təbrik ediblər. Bildirilib
ki, Milli Paralimpiya Komitəsi beynəlxalq təcrübədə ilk
dəfə olaraq sağlamlıq imkanları məhdud uşaqların kütləvi
şəkildə idmana cəlb olunmalarını öz himayəsinə götürüb.
2013-cü ilin sentyabr ayında Komitənin nəzdində Uşaq
Paralimpiya Komitəsi yaradıb. Bu komitənin
yaradılmasında əsas məqsəd ehtiyat idmançıların
hazırlanması ilə yanaşı, sağlamlıq imkanları məhdud
uşaqların reabilitasiya yolu ilə cəmiyyətə inteqrasiya
olunmasına dəstək verməkdir.
Açılış mərasimindən sonra oyunlara start verilib. Uşaq
paralimpiyaçıları 4 idman növündə (cüdo, üzgüçülük,
masaüstü tennis və boccia) güclərini sınayıblar. Cüdo
üzrə müxtəlif çəki dərəcələrində Sumqayıt idmançıları
İlkin Zəkiyev, İsmayil Tapdıqlı, Polad Poladov, Gülnar
Gereyeva, Səbinə Abdullayeva birinci yeri tutublar.
Üzgüçülük yarışlarında isə üstünlük Bakı idmançılarında
olub. İmran Cəfərzadə, Sənan Ələsgərov, Şamil Şaxov,
Fərid Novruzzadə (Sumqayıt) fərqləniblər. Masaüstü
tennis üzrə Aytac Qasımova (Bakı) və boccia üzrə Rüfət
Bayramov (Bakı) oyunların çempionu olublar.
Yarışın qalibləri və mükafatçılar Milli Paralimpiya
Komitəsinin diplom, medal və kuboku, həmçinin “Azercell”
Telecom MMC-nin qiymətli hədiyyələri ilə təltif
olunublar. |
