|
 Noyabrın
23-də Qafqaz Universitetində bu tədris ocağı, Bakı
Slavyan Universiteti və Təhsil Problemləri İnstitutunun
birgə təşkilatçılığı ilə 1-ci Beynəlxalq ingilis
dilinin tədrisi forumu keçirilib. Əsas mövzusu dünyada
ən çox tədris edilən xarici dillərdən biri kimi ingilis
dilinin tədrisi ilə əlaqədar müasir üsul və metodların,
dünya təcrübəsinin öyrənilməsi və tətbiq edilməsi olan
forumda təşkilatçı ali təhsil müəssisələrinin
rektorları, Filippin, ABŞ və yerli ingilis dili
mütəxəssisləri, Bakı, Abşeron və Sumqayıtın orta
məktəblərinin ingilis dili müəllimləri iştirak ediblər.
Tədbiri Qafqaz Universitetinin rektoru, professor Ahmet
Saniç açaraq iştirakçıları salamlayıb və forumun işinə
uğurlar arzulayıb. Tədris ili müddətində pedaqoji
fakültə tərəfindən bütün ixtisaslar üzrə forumların
keçirilməsinin planlaşdırıldığını deyən rektor onlardan
birincisinə toplandıqlarını söyləyib. Qeyd edib ki,
qurulduğu gündən Qafqaz Universitetində ingilis dilinin
tədrisi prioritet sahə hesab olunur. Hazırda
universitetdə bir dillər məktəbi, ingilis dili və
ədəbiyyatı müəllimliyi kafedrası və ingilis-Azərbaycan
dili üzrə tərcüməçi və tərcümə, mütərcimlik hissəsi
mövcuddur. Qafqaz Universitetində fəaliyyət göstərən
bölmələrin 70 faizinin tədris dili ingiliscədir. 9 ildir
Qafqaz Universitetində TOEFL imtahanı keçirilir.
Bakı Slavyan Universitetinin rektoru, professor Asif
Hacıyev rəhbərlik etdiyi ali məktəb kollektivi adından
forum iştirakçılarını salamlayıb, tədbirin mühüm
əhəmiyyətə malik olduğunu qeyd edib. Bildirib ki,
ölkəmiz müstəqillik əldə etdiyi dövrdən xarici dillərin
tədrisi bizim üçün strateji məsələyə çevrilib. Bakı
Slavyan Universitetində ingilis dili slavyan dilləri ilə
yanaşı tədris olunur.
Təhsil Problemləri İnstitutunun direktoru, hüquq üzrə
fəlsəfə doktoru Qulu Novruzov forumun Təhsil Problemləri
İnstitutu üçün də kifayət qədər əhəmiyyətli olduğunu,
təhsilin inkişafı üzrə Dövlət Strategiyasının icrası
prosesində institutda 12 illik təhsilin yeni
standartlarının, yeni məzmunun hazırlandığı bir vaxtda
belə tədbirlərə, müzakirələrə ehtiyacları olduğunu
vurğulayıb. Qulu Novruzov deyib: “Bizi həmişə bir sual
da düşündürür. Biz birinci sinifdən 11-ci sinfə qədər
xarici dil tədris edirik, amma məzunlarımıza TOEFL,
IELTS beynəlxalq sertifikatlar lazım olanda, gəlin
etiraf edək ki, onları Qafqaz Universitetində də
fəaliyyət göstərən bu və ya digər kurslara göndərməli
oluruq, yaxud əlavə hazırlıq tələb olunur. Bu suallara
axtarılan cavablar, bizim bu tədbirdən olan
gözləntilərimizdir”.
Forumda Qafqaz Universitetinin ibtidai təhsilin
pedaqogikası və metodikası kafedrasının müdiri,
professor Əjdər Ağayev çıxış edərək xarici dilin
tədrisinin multikulturalizmin inkişafındakı rolundan
danışıb.
Səkkiz mövzu üzrə müzakirələrlə davam edən forumun
sonunda iştirakçılara sertifikatlar verilib.
Yusif ƏLİYEV,
“Azərbaycan müəllimi” |
