|
“Uşaq hüquqları aylığı”nın yekunu olaraq Qaradağ Rayon
İcra Hakimiyyətinin təşəbbüsü ilə rayondakı 6 nömrəli
uşaq somatik sanatoriyasında müalicə alan uşaqlarla
görüş keçirilib.
Rayon icra hakimiyyətindən AZƏRTAC-a bildiriblər ki,
BMT-nin Uşaq Hüquqları Konvensiyasının (UHK) 26-cı
ildönümü ərəfəsində respublikamızda “Uşaq hüquqları
aylığı” elan olunması ilə bağlı Qaradağ rayonunun orta
ümumtəhsil məktəblərində, uşaq tərbiyə müəssisələrində
müxtəlif tədbirlər, “dəyirmi masa”lar,
treninq-seminarlar keçirilib, maarifləndirmə tədbirləri,
sərgilər təşkil olunub.
Tədbirdə qeyd edilib ki, əsası ümummilli lider Heydər
Əliyev tərəfindən qoyulmuş, bu gün Prezident İlham
Əliyev tərəfindən uğurla davam etdirilən dövlət uşaq
siyasəti artıq milli strategiya kimi formalaşıb. Heydər
Əliyev Fondunun uşaqların hərtərəfli inkişafı, yüksək
standartlara cavab verən təhsil və tibbi xidmətlərlə
təmin olunması, uşaq problemlərinin həlli istiqamətində
önəmli layihələr həyata keçirdiyi vurğulanıb.
Çıxışlarda ölkəmizdə uşaqların sağlamlığının
yaxşılaşdırılması, təlim-tərbiyəsinin düzgün təşkili,
fiziki, əqli və intellektual-mənəvi inkişafı, eləcə də
onların öz istedadlarını nümayiş etdirmələri üçün lazımi
şəraitin mövcud olduğu bildirilib. Uşaqların zəngin
mədəni sərvətlərimizə, tariximizə, fundamental
dəyərlərimizə hörmətlə yanaşan layiqli vətəndaş kimi
yetişdirilməsinin və hərtərəfli şəxsiyyət olaraq
formalaşdırılmasının vacib şərt olduğu qeyd edilib.
Sonda rayonda keçirilən inşa və rəsm müsabiqəsinin
qalibləri fəxri fərmanlar və xatirə hədiyyələri ilə
mükafatlandırılıb. |
