|
 “Naxçıvan” Universitetinin pedaqoji fakültəsinin
pedaqogika və psixologiya kafedrasının təşkilatçılığı
ilə “Təhsilin müasir problemləri” mövzusunda elmi-nəzəri
konfrans keçirilib. Konfransı giriş sözü ilə
universitetin rektoru, professor İsmayıl Əliyev açaraq
“Ali təhsildə kredit sisteminin problemləri” mövzusunda
çıxış edib.
Konfransda pedaqogika və psixologiya kafedrasının
müəllimləri Aytən Məmmədovanın, Nubar Səfərlinin və
Təranə Əliyevanın mövzu ilə bağlı çıxışları dinlənilib.
Bildirilib ki, təhsil, təlim-tərbiyə hər bir dövlətin
strateji əhəmiyyətli fəaliyyət sahəsi olmaqla onun
siyasi-iqtisadi, sosial və mədəni inkişafını müəyyən
edir, yeni qurulmuş cəmiyyətin mənəvi dəyərlərini
formalaşdırır. Ona görə də hər bir suveren dövlət
təhsilin inkişafına xüsusi diqqət yetirir. Ölkəmizdə,
eləcə də onun ayrılmaz tərkib hissəsi olan muxtar
respublikamızda təhsilin inkişafı istiqamətində həyata
keçirilən zəruri tədbirlər, atılan uğurlu addımlar,
imzalanan sərəncam və fərmanlar müasir təhsilin də
keyfiyyətinin yüksəlməsinə səbəb olmuşdur. Məqsəd isə
ölkədə keyfiyyətli təhsil sisteminin qurulması və onun
müsbət nəticələrinin reallaşdırılmasından ibarətdir. O
da vurğulanıb ki, ölkənin bütün sahələrində olduğu kimi,
təhsil sferasında da inkişaf prosesi ulu öndər Heydər
Əliyevin hakimiyyətə gəlişindən sonra müşahidə olunmağa
başladı. Ümummilli liderin “Təhsil sahəsi həyatımızın ən
gərəkli, ən mühüm sahəsidir. O, milli məqsədlər,
mənafelər əsasında qurulmalıdır” məntiqi fikri bu
sferanın əsaslı inkişaf etdirilməsi üçün baza rolunu
oynadı. Bütün bunlarla yanaşı, müasir təhsil sistemində
təkzibolunmaz inkişafla bərabər həlli mümkün olan
problemlər də mövcuddur. Lakin müasir təhsil gündən-günə
inkişafa doğru istiqamət aldıqca yeniləşmə tələb edən bu
sahədə problemlərin olması labüddür. Çünki dünya
çərçivəsində elmi-texniki tərəqqi inkişaf etdikcə,
müasir təhsil sisteminin də bu sahə ilə ayaqlaşmasına
ehtiyac duyulur. Bu səbəbdən, sivilizasiya arzusunda
olan cəmiyyət dövlətlə birgə təhsil sahəsindəki
problemlərin aradan qaldırılması istiqamətində
çalışmalı, qarşıya qoyulan problemləri həll etməyə səy
göstərməlidir. |
