Javascript DHTML Drop Down Menu Powered by dhtml-menu-builder.com

ARXİV

26 Dekabr 2015 - №48

 

Ümumi təhsil müəssisələri rəhbərlərinin hazırlanması və seçimi üzrə müsabiqənin keçirilməsi barədə
Azərbaycan Respublikası təhsil nazirinin əmri

 

“Azərbaycan Respublikasında təhsilin inkişafı üzrə Dövlət Strategiyası”nda nəticələrə görə cavabdeh, şəffaf və səmərəli tənzimləmə mexanizmlərinə malik, dövlət-ictimai xarakterli və dövlət-biznes partnyorluğuna əsaslanan təhsildə yeni idarəetmə sisteminin formalaşdırılması əsas strateji istiqamətlərdən biri kimi müəyyənləşdirilmiş, idarəetmənin qabaqcıl beynəlxalq təcrübə əsasında yenidən qurulması hədəf kimi qarşıya qoyulmuşdur.

Azərbaycan Respublikası Təhsil Nazirliyi ümumi təhsil sistemində idarəetmənin təkmilləşdirilməsi istiqamətində 2013-2014-cü dərs ilindən etibarən Bakı şəhərində məktəb direktorlarının seçimi üzrə yeni mexanizmin tətbiqinə başlamışdır. Bu vəzifədə işləmək arzusunda olan pedaqoji kadrlar üçün mərhələli müsabiqə təşkil edilmiş, sənədlərin qəbulu, ilkin seçimin aparılması, təlimlərin keçirilməsi, yekun imtahan və müsahibə ilə nəticələnən prosedurlar tətbiq edilmişdir.

Tətbiq edilən yeni mexanizm idarəetmə sahəsində peşəkar kompetensiyalara malik səriştəli şəxslərin ümumi təhsil müəssisələrinə rəhbər vəzifələrə təyin edilməsinə, bu prosesin şəffaf və obyektiv meyarlar əsasında həyata keçirilməsinə imkan vermişdir.

Təhsil sisteminin idarəolunmasının təkmilləşdirilməsi istiqamətində həyata keçirilmiş tədbirlərin mərhələlərlə əhatə dairəsinin genişləndirilməsi, ümumi təhsil müəssisələri rəhbərlərinin peşəkar meyarlara əsaslanan, şəffaf və ictimai nəzarət şəraitində səriştəli namizədlərdən seçilib təyin edilməsi məqsədilə, “Azərbaycan Respublikası Təhsil Nazirliyi haqqında” Əsasnamənin 8.37-ci və 13.5-ci bəndlərini  rəhbər tutaraq 

ƏMR EDİRƏM: 

1. Ümumi təhsil müəssisələrinin direktoru vəzifəsinin tutulmasının müsabiqə yolu ilə həyata keçirilməsi Sumqayıt və Gəncə şəhərləri, Abşeron, Xızı, Göygöl, Samux, Goranboy və Daşkəsən rayonlarına şamil olunsun.

2. Yeni müsabiqə mexanizminin tətbiqinə 2016-cı ilin yanvar ayından başlansın və məktəb rəhbərlərinin hazırlanması üzrə təlimlər bu əmrin 1-ci bəndində qeyd edilən rayonlar əhatə edilməklə Sumqayıt və Gəncə şəhərlərində təşkil edilsin.

Sumqayıt Şəhər Təhsil Şöbəsi, Gəncə Şəhər Təhsil İdarəsi, Abşeron, Xızı, Göygöl, Samux, Goranboy, Daşkəsən rayon təhsil şöbələri:

2.1. bu əmrin və müsabiqə qaydalarının bütün ümumtəhsil məktəblərinin rəhbərlərinə və müəllimlərə çatdırılmasını təmin etsinlər;

2.2. təlim kurslarına cəlb ediləcək məktəb rəhbərləri və müəllimlərin işdən ayrılmadan kurslarda iştirakına şərait yaratsınlar;

2.3. ümumtəhsil məktəblərində vakant direktor vəzifəsi ilə əlaqədar vəziyyəti təhlil etsinlər, vakant vəzifənin icrası müvəqqəti həvalə edilərkən həmin yerlərin yalnız Təhsil Nazirliyi tərəfindən təşkil edilən müsabiqə nəticəsində tutulacağını nəzərə alsınlar;

2.4. vakant yerlərin tutulması üçün yeni qayda tətbiq edilənədək Təhsil Nazirliyinə təqdim etdikləri namizədlərin, eləcə də bu sahədə potensialı olan müəllimlərin və direktor müavinlərinin müsabiqədə iştirakı ilə bağlı maarifləndirmə tədbirlərini həyata keçirsinlər.

3. İnsan resursları şöbəsi (F.Qədirov), QHT və KİV-lə iş sektoru (C.Valehov) məktəb rəhbərlərinin seçilib yerləşdirilməsi üzrə yeni müsabiqə mexanizminin məqsədi və mahiyyətinin təbliği istiqamətində yerli təhsili idarəetmə orqanları ilə birlikdə kommunikasiya planının hazırlanması və həyata keçirilməsini təmin etsinlər.

4. Təhsilin inkişafı proqramları şöbəsi (E.Əmrullayev):

4.1. “Azərbaycan Respublikası Təhsil Nazirliyi sisteminə daxil olan ümumi təhsil müəssisələrində rəhbər vəzifələrə namizədlərin müəyyənləşdirilməsi üzrə müsabiqə Qaydaları”na müvafiq olaraq Sumqayıt və Gəncə şəhərlərində bu əmrin 1-ci bəndində göstərilən rayonlar da əhatə olunmaqla yeni müsabiqə mexanizminin tətbiqi ilə əlaqədar tədbirləri həyata keçirsin;

4.2. təlimlərin təşkili sahəsində təcrübəsi olan ali təhsil müəssisələrinin ümumtəhsil məktəbləri rəhbərlərinin hazırlığı prosesinə cəlb edilməsi, təlim proqramlarının təkmilləşdirilməsi ilə bağlı zəruri məsələləri həll etsin. 

5. Aparat rəhbəri (M.Eynullayev), İnsan resursları şöbəsi (F.Qədirov), Təhsilin inkişafı proqramları şöbəsi (E.Əmrullayev):

5.1. namizədlərlə yekun müsahibənin Təhsil Nazirliyində aidiyyəti şöbələrin iştirakı ilə keçirilməsini təşkil etsinlər;

5.2. müsabiqənin yekunlarına görə ən yüksək nəticə göstərmiş və “Uğur sertifikatı” almış müdavimlərin vakant direktor vəzifələrinə təyin edilmələrinə dair təklifləri hazırlayıb rəhbərliyə təqdim etsinlər.  

6. İnformasiya şöbəsi (E.Əliyev) bu əmrin “Azərbaycan müəllimi” qəzetində dərc olunmasını və yerli təhsili idarəetmə orqanlarına göndərilməsini təmin etsin.

7. Əmrin icrasına nəzarət nazir müavininə (C.Bayramov) həvalə olunsun.  

Mikayıl CABBAROV,
Azərbaycan Respublikasının təhsil naziri
16 dekabr 2015-ci il

 
 
 
Səhifənin başına qalx "Qanunvericilik" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov